Lucas 2:40-52

⁴⁰Y ri ralko akꞌa katajin ukꞌiyik, katajin ukꞌojiꞌik uchuqꞌabꞌ y katajin ukꞌojiꞌik unaꞌoj. Yey ri unimal rutzil ukꞌuꞌx ri Dios kꞌo rukꞌ.

⁴¹Ronoje junabꞌ ruchu-uqaw ri Jesús kebꞌek Jerusalem re keꞌkiꞌana ri nimaqꞌij Pascua.

⁴²Echiriꞌ ri Jesús xukꞌis kabꞌlajuj junabꞌ, ruchu-uqaw xebꞌek Jerusalem jelaꞌ pachaꞌ xex kakiꞌan wi, yey xkikꞌam bꞌi ri Jesús kukꞌ.

⁴³Ekꞌuchiriꞌ xkꞌis ri nimaqꞌij, ruchu-uqaw xkimaj lo kibꞌe. Noꞌj ri Jesús xkanaj kan Jerusalem, yey waꞌ na xkinaꞌbꞌej ta ruchu-uqaw.

⁴⁴E pa kinaꞌoj rike petinaq ri Jesús chikixoꞌl ri e kachbꞌiꞌil. Xebꞌin kꞌu jun qꞌij; kꞌa tekꞌuchiriꞌ, xkijeq kakitzukuj ri Jesús chikixoꞌl ri katz-kichaqꞌ y taq ri ketaꞌam kiwach,

⁴⁵pero na xkiriq taj. Ruma kꞌu riꞌ, xetzelej pa ri tinamit Jerusalem chaꞌ kekitzukuj chilaꞌ.

⁴⁶Ekꞌuchiriꞌ ikꞌowinaq chi oxibꞌ qꞌij kakitzukuj, xeꞌkiriqa ri Jesús chupa ri Rocho Dios tzꞌul chikixoꞌl doctorabꞌ re ri tzijpixabꞌ. Rire kebꞌutataꞌ y kuꞌan tzꞌonobꞌal chike.

⁴⁷Y konoje ri ketaw re lik kakam kanimaꞌ che runaꞌoj y che ri kꞌulubꞌal uwach kuꞌan chike.

⁴⁸Echiriꞌ xkil waꞌ ruchu-uqaw, lik xkam kanimaꞌ che y jewaꞌ xubꞌiꞌij ruchu che: —Walabꞌ, ¿suꞌchak jewaꞌ kaꞌan chiqe? Raqaw y riꞌin lik paxinaq chi qakꞌuꞌx che atzukuxik —xcha che.

⁴⁹Ekꞌu ri Jesús xubꞌiꞌij chike: —¿Suꞌchak kintzukuj alaq? ¿Na etaꞌam ta nebꞌa alaq pa kinriqitaj wi? Ma lik chirajawaxik kinkꞌojiꞌ che ri chak re ri Nuqaw —xcha chike.

⁵⁰Noꞌj rike na xkimaj tane usukꞌ ri xubꞌiꞌij chike.

⁵¹Tekꞌuchiriꞌ, ri Jesús xtzelej Nazaret junam kukꞌ ruchu-uqaw y e riꞌ lik uyaꞌom ribꞌ chitaqik kuma rike. Ekꞌu ruchu katajin chukꞌuꞌx taq waꞌ y lik ukꞌolom ronoje pa ranimaꞌ.

⁵²Y ri Jesús katajin unimarik y katajin ukꞌojiꞌik más runaꞌoj ri Dios rukꞌ. Ronoje ri kuꞌano lik utz chwach ri Dios y chikiwach konoje ri tikawex.