Lucas 2:40-52

⁴⁰Nagdako an bata kag nagin masarig kag madunong kag ginaataman siya sin maayo san Dios.

⁴¹Tuig-tuig nakaugalian na san mga ginikanan ni Jesus na magpakadto sa Jerusalem para sa Pyista san Paskwa.

⁴²San dose anyos na siya nagpakadto sinda para sa Pyista pareho san dati na ninda na ginahimo.

⁴³San mauli na sinda pakatapos san Pyista si Jesus nagpabilin sa Jerusalem na waraʼn kaaraman an iya mga ginikanan.

⁴⁴Nagahuna sinda na si Jesus kaupod san iba na nagaralakat. San mausad na ka adlaw an inda paglakat ginparahanap na ninda si Jesus sa inda mga igmanghod kag mga kakilala.

⁴⁵San wara na ninda makita nagbalik sinda sa Jerusalem na nagaparahanap sa iya bisan diin.

⁴⁶San ikatulo na ka adlaw nakita ninda si Jesus sa templo. Didto nagaingkod siya kaurupod san mga maestro san Kasuguan, nagapamati kag nagahinunga sa inda.

⁴⁷An tanan na nakabati sa iya nangawa san iya kadunungan kag mga panabaton.

⁴⁸San makita siya nginarat man an iya mga ginikanan. Pakatapos ginhunga siya san iya iloy, “Anak, nano kay sugad ka sana? Kitaa, kay nahandal kag nagparahanap kami sa imo.”

⁴⁹Ugaling ginhunga man sinda ni Jesus, “Nano kay ginaparahanap niyo ako? Dili ba niyo aram na dapat ako nasa balay man san akon Ama?”

⁵⁰Pero wara ninda masabuti an iya gusto sabihon.

⁵¹Tapos, nag-uli siya kaupod na ninda pa-Nazaret kag didto masinunudon na sa inda pero an tanan ginsabuot na lang san iya iloy.

⁵²Nagdako si Jesus, nagdugang an iya kadunungan kag nakapalipay sa Dios kag sa mga tawo.