Lucas 1:20-63

²⁰Tandai ini! Magigin apa ka kag dili ka makasurmaton hasta na dili ini mangyari tungod na dili ka nagatuod san mga ginapangsabi ko sa imo na matuod man gayod na mangyayari sa tama na panahon.”

²¹Myintras an mga tawo sa luwas na nagahulat kan Zacarias nagngaralas kun nano kay nadugay siya sa sulod.

²²San pagluwas niya wara na siya makasurmaton sa inda kag nagapasabot na lang sa inda paagi san kamot kay apa na siya. Kaya napanginanuhan ninda na si Zacarias nakakita sin pangitaon didto.

²³San matapos na an panahon san iya pagtrabaho bilang padi nag-uli na siya.

²⁴Wara madugay an iya asawa na si Elisabet nagbudos kag sa sulod san lima ka bulan nagkulong siya sa inda balay.

²⁵Ginsabi niya, “Himo ini san Ginoo sa akon kay sa iya kagustuhan hinali an kaaluhan na akon gintios sa mga tawo.”

²⁶San ikaunom ka bulan san pagbudos ni Elisabet sinugo san Dios an anghel na si Gabriel pakadto sa Nazaret na usad na lungsod sa Galilea.

²⁷Nagpakadto siya kan Maria na usad na birhen na ginapangasawa ni Jose hali sa lahi san dati na hadi na si David.

²⁸Pag-abot san anghel sa balay sani nagsabi siya, “Maglipay ka. Ikaw an pinalabi san Dios kag ada sa imo an Ginoo.”

²⁹Kinulbaan gayod si Maria san ginapanurmaton sa iya kag gin-isip-isip kun nano an gusto sabihon sani.

³⁰Pero ginsabihan siya san anghel, “Ayaw kahadlok, Maria, kay pinalabi ka sa mata san Dios.

³¹Tandai! Magabudos kag magaanak kaʼn lalaki kag pagangaranan mo siyaʼn Jesus.

³²Palabawon siya kag pagatawagon na Anak san Pinakalabaw na Dios. Pareho san iya kalulululuhan na si David pagapahadion siya san Ginooʼn Dios.

³³Didto magahadi siya san lahi ni Jacob hasta na lang kag an iya kahadian waraʼn katapusan.”

³⁴Niyan, ginhunga ni Maria an anghel, “Pero pan-o ini mangyari na adi wara akoʼn asawa?”

³⁵Ginsabat siya san anghel, “Mapakada sa imo an Espirito Santo kag pagapabuduson ka san gahom san Pinakalabaw na Dios. Kaya an imo iaanak magin banal kag pagatawagon na Anak san Dios.

³⁶Kitaa, bisan ngani an imo primahon na si Elisabet apisar san iya kagurangon nagbudos. Siya na ginatawag san mga tawo na baog yana ikaunom na ka bulan an iya pagbudos,

³⁷kay waraʼn imposible sa Dios.”

³⁸Kaya nagsabat si Maria, “Suruguon ako san Ginoo. Mangyari lugod ini sa akon na ginsabi mo.” Tapos ginbayaan na siya san anghel.

³⁹Pakalipas sin pira ka adlaw nag-apura si Maria pakadto sa usad na lungsod sa kabukidan san Judea,

⁴⁰kag pagsulod sa balay ni Zacarias ginkumusta si Elisabet.

⁴¹Pakabati lang ni Elisabet san pangumusta ni Maria ada na sa iya an gahom san Espirito Santo kag insigida an bata sa iya tiyan naghiwag.

⁴²Tapos nagsurmaton si Elisabet sin makusog, “Pinalabi ka sa tanan na mga babayi kag pinalabi man an bata na ada sa imo tiyan.

⁴³Malipay gayod ako na ginabisita san iloy san akon Ginoo

⁴⁴kay pakabati ko lang san imo pangumusta an bata sa akon tiyan naghiwag sa dako na kalipay.

⁴⁵Oo, malipay ka na nagtuod na matutuman an gintuga sa imo san Ginoo.”

⁴⁶Didi nagsabi si Maria, “O kalag ko, umawon mo an Ginoo.

⁴⁷Nalilipay gayod ako dahilan sa Dios na akon Parasalbar,

⁴⁸kay napanginanuhan niya ako na mapainubuson niya na suruguon! Tuna niyan pagasabihon san tanan na katawuhan na palabi ako,

⁴⁹kay siya na makagagahom na Dios ginhimuan ako sin maayo na mga gawi. Banal an iya ngaran.

⁵⁰Tuna pa kasadto hasta yana ginakaluuyan niya an bisan sin-o na may paggalang sa iya.

⁵¹Ginpakita niya an kusog san iya butkon kag binurulag an mga nagaisip na labaw sinda.

⁵²May mga makagagahom na hadi na ginpalusad niya sa inda mga ingkudan pero an mga mapainubuson ginpahitaas niya.

⁵³Ginpabuganaan niya an mga nagugutom pero an mga mayaman ginpahali sin waraʼn dara.

⁵⁴Ginbuligan niya si Israel na iya suruguon kay nadumduman niya na maluoy kan Abraham kag san iya mga kaapu-apuhan hasta na lang. Kaya natuman niya an iya gintuga sa aton mga kalulululuhan.”

⁵⁶Nagdayon si Maria kanda Elisabet sin matulo ka bulan, pakatapos nag-uli na.

⁵⁷Nag-abot an panahon na magaanak si Elisabet kag nag-anak siya sin lalaki.

⁵⁸San mabatian san iya mga katarakin kag mga kaigmanghudan ini na dako na kaluoy na ginpakita sa iya san Ginoo, nakiusad sinda sa iya kalipay.

⁵⁹Pag-ikawalo ka adlaw nagtiripon sinda agod ipaturi an bata. Didi ginaisip ninda na siya pagangaranan sin Zacarias na pareho san sa iya ama.

⁶⁰Pero nagsurmaton an iya iloy, “Dili! Pagangaranan siyaʼn Juan.”

⁶¹Ginsabihan ninda si Elisabet, “Aba! Wara man gali sin usad sa iyo pamilya an may ngaran na sugad sana.”

⁶²Tapos, ginpasabot ninda an ama kun nano an gusto niya na ngaran sa bata.

⁶³Nagpasabot sin masuratan an ama kag may ginsurat, “An ipangaran sa iya Juan.” Nangawa sinda tanan.