Lucas 1:20-63

²⁰Jatihuahacaxëhi quiha ë yoahana ra. Noho chani mi chahahuayamaha iqui tsi jaro, chaniti mëtsama ixëqui mia ra, mi baquë coquë rohari —nëa tsi ja qui ángel nëcaniquë.

²¹Jabi Zacarías ó pasohi nohiria bo iniquë tsëquëti. Yama a. Yopahi tsi, —¿Jëniriahax bamahi ni sa? —itsi jaca niquë.

²²Jatsi Zacarías tsëquëniquë. Tsëquëhax tsi quiha nohiria bo qui chaniti mëtsama ja iniquë. Jaro quiha. Jatsi ja tënamëha nori nohiria bá cahëniquë. Japi Zacariás jato qui bëëbëëniquë, chaniti mëtsama ja iqui ca jismaxëna.

²³Jaquirëquë arati xobó tsi ja yonocohai ca xaba jatiquë tsi quiha jahuë xobo qui Zacarías caniquë.

²⁴Jaquirëquë jahuë ahui Elisabet tohoyaniquë. Jatsi cinco oxë no tsi xobó tsi ja chitëniquë.

²⁵—Nëca tsi ëa Diós shomahuaquë ra. Jaboqui pi nohiria yahi tsi bërabiyamaxëquia, baquë ë jayaxëhai quëshpi na —i Elisabet niquë.

²⁶Oxë huëtsa huinocaquë tsi quiha Diós jahuë ángel Gabriel raaniquë Nazaret icanai ca yaca qui. Jabi Galilea maí tsi naa yaca ini quiha.

²⁷Jabi Gabriel raahacani quiha María icanai ca yoxajahi qui Dios Chani bëti. Jari bënë yama María ini quiha. Jasca, jahuë bënë ti ca José ini quiha, naa David yamaba chahitaxocobo huësti ca iquiina.

²⁸Xobo qui jicohax tsi quiha, —Shoma xo mia ra; yoxa bo huëtsa oquë quiha. Mi bëta xo Ibo ra —i María qui Gabriel niquë.

²⁹Angel chani nicahax shinati pi Mariá cahëyamaniquë. —¿Jënihi ni sa? —i ja niquë jahuë shinaná no.

³⁰Jatsi, —Raquëyamatsihuë, Mariá —i ángel niquë—. Diós mia shomahuaquë ra.

³¹Tohoyaxëqui mia. Baquë comaxëqui mia ra. Comaxo tsi Jesu mi janëno.

³²Jasca, oquëxëhi quiha mi baquë. Dios-diosria Baquë ja quënahacaxëti xo. Jahuë jahëpa David yamaba yonati chama ja qui axëhi quiha Ibo Dios, jahuë nohiria yonati.

³³Jabi Israél ca nohiria yona-yonapaoxëhi quiha. Jatiyamaxëhi quiha ja yonahaina —nëa tsi María qui ángel nëcaniquë.

³⁴Jatsi ángel Mariá nicaniquë: —Yoxajahi xo ëa ra. ¿Jënahuariaxo raca baquë ë comana? —iquiina.

³⁵Jatsi angél quëbiniquë: —Mi qui joxëhi quiha Espíritu Santo. Tsëmo jascaria tsi mia mapaxëhi quiha Dios chama. Ja quëshpi tsi Dios Baquë jiaxëni ca quënahacaxëti xo mi Baquë, ja coquë no.

³⁶‘Mi rëquëmë Elisabet tsayahuë. “Tohoyatimaxëni xo” i nohiria bo paoni quiha mi rëquëmë yoati na. Jama, seis oxë no tsi ja tohoyaquë, sirixëni ja iqui ri.

³⁷Tsayahuë. Jatihuahacaxëti xo Diós yoahai tëquë. Jatiroha ca ati mëtsa xo ra —nëa tsi quiha María qui ángel nëcaniquë.

³⁸Jatsi Mariá quëbiniquë: —Ibo yonati xo ëa ra. Jabija xo toa mi yoahana ra —iquiina. Jatsi ángel jisbayaniquë.

³⁹Toatiyá tsi bamahaxma tsi quiha Elisabet yaca qui María caniquë. Jabi jodioba mai maca bo xërëquë ó tsi jahuë yaca ini quiha.

⁴⁰Cahëhax Zacarías xobo qui María jiconiquë. Jicoxo tsi quiha Elisabet ja joihuaniquë.

⁴¹Jatsi María joihuahai ca Elisabét nicaquë tsi quiha jahuë xamá ca baquë mohiniquë. Jatsi Espíritu Santó Elisabet chanimaniquë:

⁴²—Yoxa huëtsa bo oquë tsi mi shomahuahacaquë ra. Shomahuahacaquë mi baquë ri —itsi María qui Elisabet niquë joi pistiama cató no—.

⁴³E qui shishohi noho Iboba jahëhua joquë pa. Shoma xo ëa ra.

⁴⁴Jabi mi joihuahai ca ë nicaquë tsi rani tsi ëa xara ca baquë mohiquë ra.

⁴⁵Mi qui angél yoahitaha ca jatihuaxëhi quiha Ibo Dios ra. Raniria xo mia ra, Dios qui mi chitimihai ca quëshpi na —i María qui Elisabet niquë.

⁴⁶Jatsi María chaniniquë: —Oquë xo Dios ra iquia.

⁴⁷Noho Xabahamati Ibo Dios tahëhax tsi raniquia.

⁴⁸Ea, naa jahuë yonati nori ca ja noiquë ra. Jaboqui “Shomahuahaca ca tsi xo toa” ixëhi quiha nohiria bo ëa yoati na.

⁴⁹Jiaria tsi xo ë qui Chamaxëni cató acana. Jiaxëni xo jahuë janë ra.

⁵⁰Jasca, ja qui aracanaibo noi-noipaohi quiha.

⁵¹Anomaria tsi xo Diós acana jahuë chamá no. Jamë shinamisxëni cabo, oquë ca manëcascanaibo, tihi cabo pacanamahi quiha.

⁵²Nohiria chama-chamaria bo niahi quiha, jato oquë ja bënocano. Noitiria cabo oquëhuahi quiha.

⁵³Jasca, jahuë jahuë jia bá tsi paxnacanaibo sëyamaxëhi quiha. Jama, jahuëmishni jayaria cabo mëquëya tsi raaxëhi quiha.

⁵⁴Jahuë Israél ca nohiria mëbihi johi quiha, jato noihi na.

⁵⁵Jabi noba rëquëbo yamabo qui ja yoani ca shina-bënoyamahi quiha Dios ra, “Mato shomahuaxëquia” i Abraham, jahuë chahitaxocobo, tihi cabo qui ja ni quëshpi na —nëa tsi quiha María nëcaniquë.

⁵⁶Jatsi tres oxë no tsi quiha Elisabet ya tsi María chitëniquë. Jaquirëquë jahari jahuë xobo qui ja caniquë.

⁵⁷Tsëquëniquë Elisabet comati xabaca ra. Jatsi baquë ja comaniquë.

⁵⁸Jabi Elisabet Diós shomahuani nori ca jahuë yacatá ca nohiria, jahuë jimibo, tihi cabá nicaniquë. Ja raniyocani quiha jato ri, nicahax na.

⁵⁹Jatsi ocho bari huinocaquë tsi quiha jahuë baquë jibirishahi jahuë jimibo bëcaniquë. Jato jodioba jabi quiha. Jatsi jahuë jahëpa janë, naa Zacarías janë baquë qui ja acascaniquë toatiyá no.

⁶⁰Jatsi jahuë jahëhuá quëbiniquë: —Juan ja quënahacaxëti xo ra —iquiina.

⁶¹—Majia. Yama tsi xo mi jimibo xërëquë ó ca toa janë jaya cato ra —i ja qui jaca niquë.

⁶²Jatsi jato mëquë bá tsi jisti bo ja acacaniquë baquë jahëpa qui. Toca tsi Zacarías ja nicacaniquë: —¿Jahuë janë mi baquë qui axëhi ni noa ra? —iquiina.

⁶³Jatsi jahuë mëquënë́ tsi Zacarías bëëbëëhaniquë papi ja qui ja acano. Jatsi, “Jahuë janë tsi xo Juan” i ja quënëni ca ni quiha. Jatsi quiha ja ratëyocaniquë.