San Lucas 1:20-63

²⁰Le' bi gac ṉio' ṉa'a, ḻe bi chejḻi'o xtiža' nga. Cate' žin ža gac da' nga, cana' gac yeṉio' da' yoble. Na' da' ḻi gwžin ža gac can' gwnia'.

²¹Na' beṉe' ca' že' chyo'ole chesebeze' Zacaríasen' besyebande' da' gwžede' ḻo' yodao' blaona'.

²²Na' cate' bechoj Zacaríasen', bene' señw len ne'e da' bi goc ṉie'. Nach gosacbe'e beṉe' ca' ble'ebande' ḻo' yodao'na'.

²³Na' cate' beyož bdelaze' dan' bene' žin ḻo' yodao'na', beyej liže'.

²⁴Gwde na' no'ol c̱he' Elisabeten' gwchendao' bidaon' ḻo' ḻe'e. Na' gayo' bio' gwzoaze'.

²⁵Na' gwne': ―Güenchguan' ba ben X̱ancho Diosen' len neda'. Ba bžin ža beži'ilaže'de' neda', cont bich yeson beṉac̱ha' xbab bibi zaca'.

²⁶Goc x̱op bio' noa' Elisabeten' bidaon', Diosen' beseḻe' anglen' ben' le Gabriel, gwyeje' to yež da'na' nzi' Nazaret gan' mbane distritw Galilea.

²⁷Gwseḻe' ḻe' gan' zoa to no'ol güego' le' María. Na' Marían' napši'ichgua cuine'. Na' to beṉe' le' José bac̱h naquen gwšagna'lene' ḻe' cont gaque' xo'ole'. Na' Joséna' naque' diaža c̱he rey David ben' gwzoa cani'.

²⁸Na' bžin to angl beṉe' za' yaban' gwyo'e gan' zoa María na' gože'ne': ―Patiox. X̱ancho Diosen' nži'ide' le' na' zoe' len le'. Na' gone' cont so' mbalazch ca yogo'ḻoḻ no'ole yezica'chle.

²⁹Cate' ble'e Marían' anglen', bebanchgüede' ca nac dižan' dan' gože' ḻe'. Na' bene' xbab bi zejen dan' gwne' caten' bguape'ne' tiox.

³⁰Na' anglen' gože'ne': ―Bitw žebo' María, Diosen' nži'ide' le'.

³¹Ṉa'a gua' xi'iṉo' to bi' byo dao', na' sano'be', na' go'o labe' Jesús.

³²Na' Jesúsen' gaque' to beṉe' blao na' beṉac̱hen' yososi'ene' Xi'iṉ Dios, Dios ben' naque' ḻa'zelagüe beṉe' blao. Na' X̱ancho Diosen' gone' cont ṉabi'e nación Israel c̱hele ca gwnabia' da' x̱ozxta'ogüe' rey David.

³³Na' ḻe' ṉabi'e nación Israelen' toḻi tocaṉe, na' gwbat te yeḻa' gwnabia' c̱hen'.

³⁴Nach gož Marían' angla': ―¿Nacxe gac sana' bdaon'? Bitw nžaga' beṉe' byo.

³⁵Nach gož angla' ḻe': ―Spiritw c̱he Diosen' yiden gana' zo'na', na' yeḻa' guac c̱he Diosa' soan len le', Dios ben' naque' ḻa'zelagüe beṉe' blao. Da'nan' bidaon' za' galje gacbe' laždao' xilaže' na' yososi'ebe' Xi'iṉ Dios.

³⁶Na' beṉe' xṉa'o Elisabeten' ḻecze bac̱h gwchendao' bidao' ḻo' ḻe'e ḻa'czḻa' ba naque' beṉe' gole. Ba goc x̱op bio' no'e to bi' byo dao', ḻen gosene' naque' no'ole güiž.

³⁷Bibi de da' ṉacho da' cbi gac gon Dios.

³⁸Nach gož Marían' anglen': ―Ni zoa' naca' xmos X̱ana' Diosen'. Gacšca c̱hia' con can' ba gwnao'. Nach beza' anglen' gan' zoa Marían'.

³⁹Gwde na' ḻa' gwyejte Marían' to yež da' žia to ḻo ya'a gan' mbane distritw Judean',

⁴⁰na' bžine' liž Zacaríasen'. Na' gwyo'e bguape' Elisabeten' tiox.

⁴¹Na' cate' Elisabeten' bende' choḻ güiž Marían' ḻe', nach gocbe'ede' chxite' chžia bidaon' ḻo' ḻe'e. Na' Spiritw c̱he Diosen' gwnabian' yic̱hjlaždao' Elisabeten'

⁴²na' gwṉe' zižje da' bebechgüede', gože' Marían': ―Zo' mbalazch ca yogo'ḻoḻ no'ole yezica'chle. Na' ḻecze bidaon' no'ona' soabe' mbalaz.

⁴³Chebanda' le' naco' xṉa' X̱ana' zedeṉa'o neda'.

⁴⁴Con cate' benda' chguapo' neda' tiox, bidao' c̱hian' ḻecze bebebe', bxite' bžiabe' ḻo' ḻian'.

⁴⁵Zo' mbalaz da' gwyejḻi'o gac can' gwna xtiža' Diosen' dan' gož anglen' le'.

⁴⁶Nach Marían' gwne': Chonxena' X̱ancho Diosen' do yic̱hj do laža'.

⁴⁷Na' do yic̱hj do laža' chebechgüeda' Dios ben' bebeje' neda' ḻo da' malen'.

⁴⁸Ba beyaše'de' neda' naca' xmose' ḻa'czḻa' bibi zaca'. Na' ṉa'a beṉe' yesenita' toḻi tocaṉe yesene' neda' zoa' mbalaz.

⁴⁹Dios ben' chac chon da' nono gac gon ba bene' da' güen juisyw len neda'. Toz ḻen' naque' beṉe' laždao' xilaže' juisyw.

⁵⁰Na' note'teze beṉe' chesape' ḻe' bala'aṉ do yic̱hj do laže', Diosen' cheži'ilaže'de' ḻegaque'. Cheži'ilaže'de' beṉe' že' ṉa'a na' yeži'ilaže'de' xi'iṉ diaža c̱hegaque' ca'.

⁵¹Bac̱h blo'e Diosen' beṉac̱hen' yeḻa' guac c̱he'. Na' ba bolague' beṉe' ya'laže' ca'.

⁵²Ba bene' cont beṉe' gwnabia' ca' bich yesenabi'e. Na' beṉe' bi naque' beṉe' blao, Diosen' ba bnežjue' latje yesaque' beṉe' blao.

⁵³Na' beṉe' chesedon, Diosen' ba bnežjue' ḻegaque' da' zan da' güen. Na' beṉe' gwṉi'a ca', ba bose'e ḻegaque', bibi bonežjue' ḻegaque'.

⁵⁴Nach ba goclene' chio' beṉe' Israel naccho ca xmose'. Ba blo'ede' bitw ganḻaže' chio', san ba cheyaše' cheži'ilaže'de' chio'.

⁵⁵Ba bene' can' gože' da' Abraham len yezica'chle da' x̱ozxta'ocho. Na' soacze' yeyaše' yeži'ilaže'de' xi'iṉ diaža c̱he da' Abrahanṉa' toḻi tocaṉe.

⁵⁶Na' cate' ba goc šoṉe bio' zoa Marían' len Elisabeten', nach Marían' beyej liže'.

⁵⁷Na' cate' bžin ža san Elisabeten', gwzane' bi' byo dao'.

⁵⁸Na' cate' goseṉeze beṉe' gualiž c̱hegaquen' na' diaža c̱hegaquen' X̱ancho Diosen' ba beyaše' beži'ilaže'de' Elisabeten', nach besyebechgüede' len ḻe'.

⁵⁹Na' goc x̱ono' ža goljbe' na' jasezoe'be' señw dan' že' circuncisión can' gosone' len yogo' bi' byo dao' bi' gosaljbe' ḻo diaža c̱he da' Abraham. Na' gosaclaže' si' labe' Zacarías can' le x̱aben',

⁶⁰perw xṉa'be' gwne': ―Bi gac. Cheyaḻa' si'be' Juan.

⁶¹Na' ḻegaque' gose'ene': ―Notno diaža c̱hele nita' beṉe' zjale ca', ṉeca x̱ozxta'ole.

⁶²Na' gosone' señw goseṉabde' x̱aben' nac che'nde' si' labe'.

⁶³Nach bene' señw gwṉabe' to yagla' dao' da' bzoje': “Si' labe' Juan.” Na' yogüe' besyebande'.