Leviticus 9:10-19

¹⁰Midtutung din diyà te pemuhatà is menge tavà, is menge vuwà, wey is deisey he vahin te atey, sumalà te insuǥù te Nengazen ki Moises.

¹¹Is usa wey is lundis kayi midtutung din diyà te ǥawas te kampu.

¹²Ne midlapà daan ni Aaron sikan is uyaǥen he pemuhat he edtutungen. Is lengesa kayi, mid-uwit te menge anak din diyà te kandin, ne in-itis din heini ziyà te peliǥuy zuen te pemuhatà.

¹³Mid-uwit dan daan diyà te kandin sikan is sinapù he uyaǥen ragkes is ulu kayi, ne midtutung din heini ziyà te pemuhatà.

¹⁴Midlùluan din is menge parti he ziyà te seled te ǥetek wey is menge paa, ne midtutung din diyà te pemuhatà duma te zuma he parti zuen te uyaǥen.

¹⁵Ne kegkepasad dutun mid-uwit din is menge pemuhat te menge etew. Midlapè din sikan is kambing, ne impemuhat din para melumpiyuwi is menge etew iring duen te mibeelan din diyà te pemuhat he para melumpiyuwi sikandin.

¹⁶Ne mid-uwit din daan sikan is uyaǥen he pemuhat he edtutungen diyà te teliwazà, ne impemuhat din heini sumalà te paaǥi te kebpemuhata kayi.

¹⁷Mid-uwit din daan is pemuhat he gasa ziyà te teliwazà. Midtarin sikandin dutun te sengekemkem, ne midtutung din diyà te pemuhatà he in-uman duen te pemuhat he edtutungen kada meselem.

¹⁸Midlapà daan ni Aaron sikan is baka wey sikan is meemahan he kerehidu he para te menge etew he pemuhat he para te meupiya he kedepità. Is lengesa kayi mid-uwit te menge anak din diyà te kandin, ne impirikpirik din heini ziyà te peliǥuy zuen te pemuhatà.

¹⁹Is menge tavà kayi he menge uyaǥen, is melambù he ikug, is menge tavà diyà te seled te ǥetek, is menge vuwà, wey is deisek he menge parti te menge atey,