Leviticus 26:38-45

³⁸Ebpematey kew ziyà te lugar te menge kuntada niw.

³⁹Is egkesamà keniyu ednaneynaney ebpematey tenged te menge salè niw wey te menge salà te menge kepuun niw.

⁴⁰Tenged te kedluivi wey kedsupaka niw kediey egkuntedahan ku sikiyu ne ibpevihag ku pehendiyà te lugar te menge kuntada niw. Iyan, emun ed-engkezan niw is menge salè niw wey menge salà te menge kepuun niw wey ed-engkezan niw en is ke bmesinupaken niw, wey edewaten niw is silut tenged te menge salè niw,

⁴²edtumanen ku is kebpekid-uyun ku te menge kepuun niw he si Abraham, si Isaac, wey si Jacob ne idlikù ku sikiyu ziyà te tanè niw.

⁴³Piru kinahanglan he ibpaawè ku zèpa sikiyu puun te tanè niw he iyan bayad niw te menge salè niw, tenged te kedselikwaya niw te menge suǥù ku wey menge sulunuzen he ibpesunud ku. Ne ebpekehimeley is tanà dutun te egkeewaan niw.

⁴⁴Piru minsan edsilutan ku sikiyu, ne kenè ku sikiyu idselikwey ziyà te lugar te menge kuntada niw; kenè ku sikiyu edezeetan he wazè en egkesamà keniyu. Ne kenà egkehimu he id-awè ku is kebpekid-uyun ku keniyu, su iyan a is Nengazen Megbevayè niw.

⁴⁵Edtumanen ku ziyà te keniyu is kebpekid-uyun ku te menge kepuun niw he impeǥawas ku puun te Ehipto su impeehè ku ziyà te menge nasyun is gehem ku. Mibeelan ku heini ziyà te menge kepuun niw su para siak is Nengazen mehimu he Megbevayè dan. Iyan a kes Nengazen.