Leviticus 17:10-15

¹⁰Is minsan hentei he egkaan te lengesa egkeepesan te Nengazen ne kenè niw en sikandin isipa he zuma niw.

¹¹Su is untung te linimbag ne ziyà te lengesa zin, ne insuǥù te Nengazen he gemita niw heini para mevelukasi kew puun te menge salè niw, su is lengesa he iyan mibeǥey te untung, iyan ebpekevelukas te etew puun te menge salà.

¹²Iyan heini hinungdan ke maan is kenè kew ereg he egkaan te lengesa.

¹³Is minsan hentei keniyu te menge Israilihanen wey te kenà menge Israilihanen he mid-ubpà duma keniyu he ed-utel te langgam etawa tagbis he egkehimu he egkeenen, kinahanglan he ibpetiǥis din is lengesa kayi ne tembuni zin te tanà,

¹⁴su is untung te linimbag ne ziyà te lengesa zin. Umbe migkeǥiyan kew te Nengazen he kenè niw keena is lengesa te minsan hengkey he linimbag; ne is minsan hentei he egkaan kayi ne kenè niw en isipa he zuma niw.

¹⁵Is minsan hentei keniyu te menge Israilihanen wey kenà menge Israilihanen he mid-ubpà duma keniyu he egkaan te langgam he minatey zà etawa midhimetayan te zuma he langgam, kinahanglan he pìpii zin is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.