Kölfel 9:5-14

⁵Ka apwüngü chon ekewe mwü, ka arosala ekewe aramasangau, esap wor eman epwe chüen chechemeniir tori feilfeilachök.

⁶Ekewe chon oputem ra feiengau o rosola. Ka ataela ar kewe telinimw pwe esap wor eman epwe chüen chechemeniir.

⁷Nge ewe Samol mi Lapalap a king tori feilfeilachök, a anüküchara an lenien motun king pwe epwe eäni kapwüng.

⁸Iwe, a apwüngü chon fanüfan fän pwüng, a apwüngü chon ekewe mwü fän wenechar.

⁹Ewe Samol mi Lapalap eu lenien op mi pöchökül fän iten ekewe mi riaföü, eu lenien manau lon fansoun riaföü.

¹⁰Chokewe mi silei en ra anomu ar apilükülük womw, pun en, ai Samol mi Lapalap, kosap kul seni chokewe mi feito reöm.

¹¹Oupwe kölün mwareiti ewe Samol mi Lapalap mi imweimw lon Sion, oupwe apworausa an kewe föför ngeni chon ekewe mwü.

¹²Kot a chechemeni chokewe mi riaföü, esap manlükala ar siö, nge epwe ngeni ekewe chon föföringau chappen ar föför.

¹³Ai Samol mi Lapalap, kopwe ümöümöch ngeniei! Kopwe nenengeni ai riaföü ren chokewe mi oputaei. Ai Samol mi Lapalap, kopwe angasaeila seni mäla,

¹⁴pwe üpwe tufichin pwärätä mwen ekewe aramasen Jerusalem ekewe metoch meinisin üa mwareituk ren. Üpwe pwal pwapwa pun ka angasaeei.