Kölfel 9:13-20

¹³Ai Samol mi Lapalap, kopwe ümöümöch ngeniei! Kopwe nenengeni ai riaföü ren chokewe mi oputaei. Ai Samol mi Lapalap, kopwe angasaeila seni mäla,

¹⁴pwe üpwe tufichin pwärätä mwen ekewe aramasen Jerusalem ekewe metoch meinisin üa mwareituk ren. Üpwe pwal pwapwa pun ka angasaeei.

¹⁵Iwe, chon ekewe mwü ra turulong lon ewe pwang ra püsin tuw, ra tup lon ewe sär ra püsin aopala.

¹⁶Ewe Samol mi Lapalap a pwärala püsin i ren an eäni kapwüng fän pwüng. Ekewe aramasangau ra tup lon püsin ar föför.

¹⁷Iwe, ekewe aramasangau repwe fokun feil ngeni mäla, pwal chon ekewe mwü meinisin mi pöütala Kot.

¹⁸Kot esap manlükala ekewe chon mwelele tori feilfeilachök, pwal än chon wöüngau apilükülüköch esap tala tori feilfeilachök.

¹⁹Ai Samol mi Lapalap, kopwe feito! Kosap mwütätä pwe aramas repwe ü ngonuk. Chon ekewe mwü repwe kapwüng fän mesom.

²⁰Ai Samol mi Lapalap, kopwe eniweer. Kopwe asile ngeniir pwe ir aramas echök repwe mäla.