Kölfel 96:3-10

³Oupwe asilefeili an ling me lein chon ekewe mwü, pwal an föför mi amwarar me lein ekewe aramas meinisin.

⁴Pun ewe Samol mi Lapalap a tekia. Sipwe alapala ach mwareiti i, sipwe pwal niuokusiti i lap seni ekewe kot meinisin.

⁵Pun än chon ekewe mwü kewe kot ra chök uluulun anümwäl. Nge ewe Samol mi Lapalap a föri ekewe läng.

⁶Iteüöch me manaman ra nonom mwan, pöchökül me ling ra nonom lon imwan mi pin.

⁷Oupwe mwareiti ewe Samol mi Lapalap, ämi chon ekewe mwü meinisin, oupwe mwareiti än ewe Samol mi Lapalap ling me manaman.

⁸Oupwe mwareiti lingen iten ewe Samol mi Lapalap. Oupwe uwato eu asor o feito lon imwan.

⁹Oupwe fel ngeni ewe Samol mi Lapalap fän üf mi pin. Ämi chon fanüfan meinisin, oupwe chechech me mwan.

¹⁰Oupwe apasa me lein chon ekewe mwü, “Ewe Samol mi Lapalap a nemenem. Ewer, fanüfan a fokun nükünük, esap tongeni mwöküt seni lenian. Kot epwe apwüngü chon ekewe mwü fän wenechar.”