Kölfel 89:1-48

¹Echö kölün kait än Etan eman mwirimwirin Esra. Ai Samol mi Lapalap, üpwe kölü om tong ellet tori feilfeilachök. Üpwe arongafeili om allükülük ngeni ekewe täppin aramas meinisin.

²Üpwe pwärätä pwe om tong ellet a nomopos tori feilfeilachök, pwe om allükülük a nüküchar usun ekewe läng.

³En ka apasa, “Üa eäni eu pwon ngeni ätewe üa filätä, üa pwon fän akapel ngeni Tafit nei we chon angang:

⁴Üpwe föri pwe mwirimwirum kana repwe king tori feilfeilachök o anüküchara mwum tori ekewe täppin aramas meinisin.”

⁵Ai Samol mi Lapalap, ekewe läng repwe mwareiti om kewe manaman, nge ewe mwichen chon pin kana repwe ingeiti om allükülük.

⁶Pun esap wor eman lon läng mi wewe ngonuk en Samol mi Lapalap. Esap wor eman me lein ekewe chon läng a usun chök en.

⁷En ewe Kot ewe mwichen chon pin a niwelapeituk. Ka kon eniwokus lap seni meinisin mi nom ünükumw.

⁸Ai Samol mi Lapalap, en ewe Kot mi Unusen Manaman, iö a manaman usun en? Ai Samol mi Lapalap, ka allükülük lon mettoch meinisin.

⁹En ka nemeni ewe matau mi nono. Lupwen ekewe no ra pwotä, en ka alüaar.

¹⁰Ka atatakisi Rahap pwe a usun chök eman mi ninnila, ka atoropasa ekewe chon oputom ren poum mi manaman.

¹¹Ekewe läng om, ewe fanüfan pwal om. En ka föri fanüfan me masouan meinisin.

¹²En ka förätä efeng me ör. Ekewe chuk Tapor me Hermon ra mwareituk fän pwapwa.

¹³En ka fokun manaman. Poum a pöchökül, pöüifichum a ititä.

¹⁴Pwüng me apwüng longolongun mumw, tong ellet me allükülük a pwä lon meinisin mine ka föri.

¹⁵Ra feiöch ekewe aramas mi silei ewe kölün mwareituk, ir mi fetal lon saramen won mesom, ai Samol mi Lapalap.

¹⁶Repwe mwareituk iteiten rän o ingeiti om pwüng.

¹⁷En ar ling me ar pöchökül. Ren om kirikiröch mökürem a chimwetä.

¹⁸Pun ewe mi tümwünükich nöün ewe Samol mi Lapalap, ach king nöün Ewe mi Pin lon Israel.

¹⁹Me lom en ka kapas ngeni noum we chon angang mi allükülük lon künan o apasa, “Üa alisi eman sounfiu mi pwora. Üa seikätä eman alüal seni lein ekewe aramas.

²⁰Üa awisa nei we chon angang Tafit pwe epwe king. Üa epiti ren ai lö mi pin.

²¹Üpwe alisi i fansoun meinisin, ai manaman epwe apöchöküla.

²²Ekewe chon oputan resap tongeni pwora ngeni, nge ekewe aramasangau resap tongeni akufu.

²³Üpwe atatakisi chokewe mi ü ngeni, üpwe pwal niela chokewe mi oputa.

²⁴Ai allükülük me tong ellet epwe nom ren, nge i epwe chimwätä möküran pokiten itei.

²⁵Ngang üpwe awisa pwe epwe nemeni ewe matau watte, epwe pwal fokun nemeni ekewe chanpupu.

²⁶Iwe, epwe apasa ngeniei, ‘En semei me ai Kot, en ewe chon tümwünüei me ai Chon Amanau.’

²⁷Üpwe filätä i pwe epwe nei mwänichi, epwe tekia me lein ekewe kingen fanüfan.

²⁸Üpwe chök eäni ai tong ellet ngeni tori feilfeilachök, nge ai pwon ngeni epwe nükünük.

²⁹Üpwe föri pwe mwirimwirin kana repwe king tori feilfeilachök, nge mwün epwe nonom ükükün fansoun än ekewe läng nonom.

³⁰Nge are nöün kana resap aleasochis ngeni ai kewe allük, resap pwal apwönüetä ai kewe pwüüng,

³¹are repwe puri ai kewe allük pwe resap tümwünüür,

³²mürin üpwe apwüngüür pokiten ar pupungau, üpwe pwal ariaföüür pokiten ar tipis.

³³Nge üsap ükütiu le tongei Tafit, üsap pwal föri pwe ai allükülük ngeni epwe mwäl.

³⁴Üsap atai ai pwon ngeni ika siwili eu ai kewe kapas üa apasa ngeni.

³⁵Fän eu chök üa pwon fän akapel ren ai pin, nge üsap pwal apinisefäli. Üsap chofana ngeni Tafit.

³⁶Epwe wor mwirimwirin Tafit tori feilfeilachök, nge mwün epwe nonom mwei usun chök akkar a nom mwei.

³⁷Epwe chök nonom tori feilfeilachök usun ewe maram a nonom, iei ewe pisekin pwärätä mi allükülük fän läng.”

³⁸Nge iei ka fokun song ngeni noum we mi kepit, ka likitala o pöütala.

³⁹Ka atai om we pwon ngeni noum we chon angang, ka asapwilätiu seni wisan wisen king.

⁴⁰Ka ataetiu tittin an telinimw meinisin o atatakisi an kewe leni mi pöchökül.

⁴¹Meinisin mi pwerela lükün ra soläni pisekin. A küna turunufas me ren chon arun.

⁴²Ka fokun awinna chon ü ngeni, ka föri pwe ekewe chon oputan meinisin ra pwapwa ren ar akufu.

⁴³Ewer, ka föri pwe nöün ketilas esap wor nian, kosap pwal alisi lon maun.

⁴⁴Ka angei seni lepöün wokun wokun king, ka pwal aturätiu lepwül an lenien motun king.

⁴⁵Ka föri pwe a chinlapala, lupwen a chüen alüal, o pwölüla ren säw.

⁴⁶Ai Samol mi Lapalap, ifa usun, kopwe aopok tori feilfeilachök? Ifa ükükün fansoun om lingeringer epwe kü usun ekkei?

⁴⁷Ai Samol mi Lapalap, kopwe chechemeni pwe ränin manauei a mochomoch, pun ka föri aramas meinisin pwe repwe chök mäla.

⁴⁸Ifa usun, meni aramas a tongeni manau, nge esap fokun mäla? Iö a tongeni angasa manauan seni manamanen ewe lenien sotup?