Kölfel 80:8-17

⁸En ka uwato efoch irän wain seni Isip, ka asüela chon ekewe mwü o fotukätiu ewe irä lon fanüer.

⁹Ka limeti eu leni fän iten ewe irä pwe epwe tongeni märitä. A tötiu waran fän pwül lealolol, a pwal amasoua ewe fanü.

¹⁰Ekewe chuk ra pwölüla ren nürün, nge palan kewe ra usun chök palen ekewe irä setar mi fokun watte.

¹¹Palen ewe irän wain ra meresiwu tori ewe matau watte, nge fasaran kewe ra tori ewe chanpupu Oifrat.

¹²Pwota ka ataetiu tittin kewe, pwe meinisin mi pwerela won ewe al ra kini uan?

¹³Pik mi mwacho seni ewe wöllap ra tipwei ewe irä, nge ekewe manmwacho ra mongö seni.

¹⁴Ai Kot mi Unusen Manaman, kopwe kul ngenikem, kopwe netiu seni läng o nenengenikem. Kopwe ekieki ei irän wain.

¹⁵Kopwe tümwünü, pun en ewe ka püsin fotukätiu. Kopwe tümwünü palan we ka ämärätä o apöchöküla fän itom.

¹⁶Ra pöküetiu om we irän wain o kenala. Kopwe netiu wor fän om song o aroserela.

¹⁷Nge kopwe fokun tümwünü noum aramas ka filätä, ewe mwü ka fokun apöchöküla fän itom.