Text copied!
CopyCompare
Paipel - Kölfel - Kölfel 78

Kölfel 78:9-66

Help us?
Click on verse(s) to share them!
9Ekewe mwän seni ewe ainangen Efraim mi uwei nöür likapich ra kulsefäl o sü lon ewe rän a fis maun.
10Resap tümwünü än Kot pwon, resap pwal mochen aleasochisi an kewe allük.
11Ra manlükala mine a föri, ekewe manaman a pwäri ngeniir.
12Kot a föri föför mi amwarar fän mesen ar kewe lewo lon ewe fanü Isip me lon ewe maasiesin Soan.
13A kinifeseni ewe matau o emwenirela tori epek, a föri pwe ekewe koluk ra ütä usun chök eu tit.
14Lerän a emweniir ren eu kuchu, nge lepwin a emweniir ren ekkei mi saramaram.
15A asangafeseni achau lon ewe fanüapö o aünü ngeniir chomong koluk seni ekewe leni mi alolol.
16A föri pwe öüwö a towu seni ewe achau, nge koluk a puputiu usun chanpupu.
17Nge ra chök sopwela le tipis ngeni Kot, ra ü ngeni Ewe mi Unusen Tekia me lon ewe fanüapö.
18Ra sotuni Kot seni mochenin letiper ren ar tüngormau ener mongö ra mwäräräiti.
19Ra ü ngeni Kot ren ar kapas o apasa, “Ifa usun, Kot a tongeni ngenikich mongö lon ewe fanüapö?
20A wichi ewe achau pwe koluk a towu, nge ekewe öüwö ra urourela. Nge ifa usun, a pwal tongeni fangeto pilawa ika amolätä fituk fän iten nöün aramas?”
21Iei mine, lupwen ewe Samol mi Lapalap a rongorong ar kewe kapas, a fokun song. A tinala ekkei pwe a keni chon Israel, nge an song a wattela ngeniir,
22pun esap wor ar lükülük won Kot, resap pwal lükü an manaman pwe a tongeni amanaueer.
23Nge Kot a chök allük ngeni ekewe läng o sukala ekewe asamen läng.
24A apüngätiu wor mana, ekewe föün wiichen läng, pwe repwe tongeni mongö,
25Aramas ra mongö enen ekewe chon läng. A tinala rer chomong mongö.
26A pwal föri pwe asepwälin ötiu a enien fän läng, nge ren an manaman a emwenawu ewe asepwälin ör.
27A apüngätiu wor fituk usun chök pwül moromor, ekewe machang ra chomong usun chök chomongun föün pien aroset.
28A apüngüretiu lukalapen lenier pwelin ünükün imwer.
29Iwe, ekewe aramas ra mongö o fokun mötüla, pun Kot a ngeniir mine ra fokun mwäräräiti.
30Nge mwen an esamwo wesöchüla ar mwärä, lupwen ra chüen mongö ewe mongö,
31Kot a song ngeniir, pwe a niela ekewe mi fokun pöchökül me leir me ekewe alüal me lon Israel.
32Iwe, ekei mettoch meinisin ra fis, nge ekewe aramas ra chök sopwela le tipis. Kot a föri an kewe manaman, nge resap fokun lükü.
33Iei mine Kot a föri pwe ränin manauer a wesila usun chök enienin asepwäl, nge ierin manauer a chök sopolong lon niuokus watte.
34Nge lupwen Kot a niela ekoch me leir, ekewe mi chüen manau ra kütta i. Ra ekieksefäl o tiliken le iotek ngeni.
35Ra chechemeni pwe Kot ar achau, pwe ewe Kot mi Unusen Tekia ar Chon Amanau.
36Nge ar kewe kapas resap pwüng, meinisin mine ra apasa a chök mwakel.
37Leluker esap wenechar ngeni, resap pwal allükülük won an we pwon.
38Nge Kot a tongeer, a amusala ar tipis, esap pwal aroserela, Fän chomong a amwöchü an song, nge esap amüchawu an lingeringer ngeniir.
39A chechemeni pwe ir aramas echök, ra usun chök asepwäl mi enila, nge esap chüen enito.
40Fän chomong ra ü ngeni i me lon ewe fanüapö o achouu me lon ewe fanüpwas.
41Ra sotuni Kot fän chomong o asonga Ewe mi Pin me lon Israel.
42Resap chechemeni an manaman ika ewe rän, lupwen a amanaueer seni chon oputeer,
43resap pwal chechemeni an kewe föför mi amwarar me an kewe manaman a föri lon Isip me lon ewe maasiesin Soan.
44Iwe, Kot a awili lölön ekewe chanpupu ngeni cha, pwe ekewe chon Isip resap tongeni ün seniir.
45Kot a tinato pwiin nikken leir pwe repwe küür, pwal kairü mi ataela irän fanüer.
46A amongöü ngeni ekewe müün fotar irä, nge ekewe lifichimas ra eni uän ar tanipi.
47A ataela ar tanipin wain ren ütten fau me ar irä sikamor ren patapat.
48A niela nöür pwiin kow ren ütten fau, pwal nöür pwiin sip ren inefi.
49Ren an song mi fokun watte ngeniir, ren an lingeringer me an koput a esen ngeniir pwe repwe tolong lon riaföü. Ei a usun chök eu mwichen chon läng mi feito o afeiengaueer.
50Esap chüen engila lon an song, esap pwal achika manauer seni mäla, nge a asechirela pwe repwe mäla ren mätter.
51A niela ekewe mwänichi meinisin lon Isip, ir mwen pöchökülen mwirimwirin Ham me lon ewe fanü.
52Mürin, Kot a emwenawu nöün aramas usun eman chon mas a emweni nöün pwiin sip, o emweniir lon ewe fanüapö.
53A emwenirela fän kinamwe pwe resap niuokus, nge ewe matau a pwölüela ekewe chon oputeer.
54Iwe, a emwenirela ngeni fanüan we mi pin, ngeni ewe chuk püsin i a liapeni.
55A asüela chon ekewe mwü me mwer. A aineti ngeni ekewe ainangen Israel fanüer pwe repwe fanüeni o ngeniir imwer.
56Nge ir ra sotuni ewe Kot mi Unusen Tekia o ü ngeni. Resap aleasochisi an kewe allük,
57nge ra tokola seni Kot o kirikiringau usun chök semelaper kewe, ra lomotongau usun chök efoch esefich mi pwor.
58Pun ra asonga Kot ren ar lenien fel won ekewe leni tekia, ra pwal föri pwe a lingeringeritiir ren ar kewe uluulun anü mi fal.
59Iwe, lupwen Kot a küna ei, a fokun song o wesewesen pöütala chon Israel.
60A likitala lenian me lon Silo, ewe imw mangaku ia Kot a nom ie me lein ekewe aramas.
61A föri pwe ewe pworofel, asisilen an manaman me ling, epwe oolong lepöün chon oputeer.
62A lingeringeriti nöün aramas o mwüt ngeni chon oputeer pwe repwe nirela ren ketilas.
63Nöür alüal ra mäla lon maun. Esap chüen wor alüal repwe pwüpwülü ngeni nöür föpwül.
64Nöür souasor ra mäla ren ketilas, nge nöür fefin mi mä pwülüer resap tongeni ngüngüres.
65Mürin, ewe Samol a pwök usun eman a pwök me annut. A usun eman mwän mi pöchökül a akkapwas pokiten an ün wain.
66Iwe, a akufu chon oputan pwe ra sü o asäweer ren säw esemüch.

Read Kölfel 78Kölfel 78
Compare Kölfel 78:9-66Kölfel 78:9-66