Kölfel 78:3-43

³usun ekewe mettoch sa rongorong o silei, semalapach kewe ra apworausa ngenikich.

⁴Sisap aopa ekewe kapas seni nöüch, nge sipwe apworausa ngeni ewe täppin aramas epwe feito me mürich usun än ewe Samol mi Lapalap föför mi amwarar, usun an kewe manaman me an kewe asisil a föriir.

⁵A awora ekewe pwüüng fän iten ekewe mwirimwirin Jakop o föri ekewe allük fän iten chon Israel. A allük ngeni ach kewe lewo pwe repwe aiti ngeni nöür kewe an kewe allük,

⁶pwe ekewe täppin aramas me müriir repwe silei ekewe allük, pwal ekewe mönükol resamwo uputiu, mürin, pwal ir repwe apworausa ngeni nöür.

⁷Ren ei repwe anomu ar apilükülük won Kot, nge resap manlükala än Kot kewe föför. Repwe pwal aleasochisi an kewe allük,

⁸pwe resap wewe ngeni ar kewe lewo, ewe täppin aramas mi ülöförea me lükümach, ewe täppin aramas leluker esap pos, resap pwal allükülük ngeni Kot.

⁹Ekewe mwän seni ewe ainangen Efraim mi uwei nöür likapich ra kulsefäl o sü lon ewe rän a fis maun.

¹⁰Resap tümwünü än Kot pwon, resap pwal mochen aleasochisi an kewe allük.

¹¹Ra manlükala mine a föri, ekewe manaman a pwäri ngeniir.

¹²Kot a föri föför mi amwarar fän mesen ar kewe lewo lon ewe fanü Isip me lon ewe maasiesin Soan.

¹³A kinifeseni ewe matau o emwenirela tori epek, a föri pwe ekewe koluk ra ütä usun chök eu tit.

¹⁴Lerän a emweniir ren eu kuchu, nge lepwin a emweniir ren ekkei mi saramaram.

¹⁵A asangafeseni achau lon ewe fanüapö o aünü ngeniir chomong koluk seni ekewe leni mi alolol.

¹⁶A föri pwe öüwö a towu seni ewe achau, nge koluk a puputiu usun chanpupu.

¹⁷Nge ra chök sopwela le tipis ngeni Kot, ra ü ngeni Ewe mi Unusen Tekia me lon ewe fanüapö.

¹⁸Ra sotuni Kot seni mochenin letiper ren ar tüngormau ener mongö ra mwäräräiti.

¹⁹Ra ü ngeni Kot ren ar kapas o apasa, “Ifa usun, Kot a tongeni ngenikich mongö lon ewe fanüapö?

²⁰A wichi ewe achau pwe koluk a towu, nge ekewe öüwö ra urourela. Nge ifa usun, a pwal tongeni fangeto pilawa ika amolätä fituk fän iten nöün aramas?”

²¹Iei mine, lupwen ewe Samol mi Lapalap a rongorong ar kewe kapas, a fokun song. A tinala ekkei pwe a keni chon Israel, nge an song a wattela ngeniir,

²²pun esap wor ar lükülük won Kot, resap pwal lükü an manaman pwe a tongeni amanaueer.

²³Nge Kot a chök allük ngeni ekewe läng o sukala ekewe asamen läng.

²⁴A apüngätiu wor mana, ekewe föün wiichen läng, pwe repwe tongeni mongö,

²⁵Aramas ra mongö enen ekewe chon läng. A tinala rer chomong mongö.

²⁶A pwal föri pwe asepwälin ötiu a enien fän läng, nge ren an manaman a emwenawu ewe asepwälin ör.

²⁷A apüngätiu wor fituk usun chök pwül moromor, ekewe machang ra chomong usun chök chomongun föün pien aroset.

²⁸A apüngüretiu lukalapen lenier pwelin ünükün imwer.

²⁹Iwe, ekewe aramas ra mongö o fokun mötüla, pun Kot a ngeniir mine ra fokun mwäräräiti.

³⁰Nge mwen an esamwo wesöchüla ar mwärä, lupwen ra chüen mongö ewe mongö,

³¹Kot a song ngeniir, pwe a niela ekewe mi fokun pöchökül me leir me ekewe alüal me lon Israel.

³²Iwe, ekei mettoch meinisin ra fis, nge ekewe aramas ra chök sopwela le tipis. Kot a föri an kewe manaman, nge resap fokun lükü.

³³Iei mine Kot a föri pwe ränin manauer a wesila usun chök enienin asepwäl, nge ierin manauer a chök sopolong lon niuokus watte.

³⁴Nge lupwen Kot a niela ekoch me leir, ekewe mi chüen manau ra kütta i. Ra ekieksefäl o tiliken le iotek ngeni.

³⁵Ra chechemeni pwe Kot ar achau, pwe ewe Kot mi Unusen Tekia ar Chon Amanau.

³⁶Nge ar kewe kapas resap pwüng, meinisin mine ra apasa a chök mwakel.

³⁷Leluker esap wenechar ngeni, resap pwal allükülük won an we pwon.

³⁸Nge Kot a tongeer, a amusala ar tipis, esap pwal aroserela, Fän chomong a amwöchü an song, nge esap amüchawu an lingeringer ngeniir.

³⁹A chechemeni pwe ir aramas echök, ra usun chök asepwäl mi enila, nge esap chüen enito.

⁴⁰Fän chomong ra ü ngeni i me lon ewe fanüapö o achouu me lon ewe fanüpwas.

⁴¹Ra sotuni Kot fän chomong o asonga Ewe mi Pin me lon Israel.

⁴²Resap chechemeni an manaman ika ewe rän, lupwen a amanaueer seni chon oputeer,

⁴³resap pwal chechemeni an kewe föför mi amwarar me an kewe manaman a föri lon Isip me lon ewe maasiesin Soan.