1Ngeni ewe mi emweni chon köl: Echö än Tafit köl. Ra feiöch chokewe mi ekieki ekewe mi apwangapwang o wöüngau. Ewe Samol mi Lapalap epwe angaserela lon ränin ar riaföü.
2Ewe Samol mi Lapalap epwe tümwünüür o amwöchü manauer, nge ir repwe iteni chokewe mi feiöch me lon ewe fanü. Iwe, esap atolongeer lepöün ekewe chon oputeer.
3Ewe Samol mi Lapalap epwe tümwünüür won ar kiekien samau, nge lupwen ra apwangapwang, epwe apöchöküleer seni ar samau meinisin.
4Nge ngang üa apasa, “Ai Samol mi Lapalap, kopwe ümöümöch ngeniei o apöchökülaei, pun üa tipis ngonuk.”
5Chon oputaei ra kapas usi lon ar ekingau, “Inet ätei epwe mäla pwe itan epwe mola?”
6Lupwen eman a feito pwe epwe churiei, a chök eäni kapas pön. Nge lon lelukan a ioi ekiekingau usi. Mürin a towu lükün o apworausafetalei.
7Meinisin mi oputaei ra mwöngününgünfengen usi, ra ekiekietä mine a fokun ngau ngeniei.
8Iwe, ra apasa, “A üri och samaungau, esap chüen tongeni pwätä seni an kiekien samau.”
9Pwal chiechiei mi fokun kan ngeniei, üa pwal fokun lükü, ätewe mi mongö rei, a ü ngeniei.
10Nge en, ai Samol mi Lapalap, kopwe ümöümöch ngeniei o apöchökülaei, pwe üpwe tongeni liwini ngeni ekewe chon oputaei ükükün ar föför.
11Üa silei pwe en ka pwapwaitiei, pun ekewe chon oputaei resap tongeni akufuei.
12En ka alisiei, pun üa föri mine a pwüng, ka pwal anomuei fän mesom tori feilfeilachök.