Kölfel 38:2-20

²Pun ka akinasaei ren wokum kewe föün esefich, ka pwal amiritiei.

³Esap wor pöchökülen inisi pokiten om song, esap pwal wor pöchökülen lechüi pokiten ai tipis.

⁴Üa pwölüla fän ai kewe föför mi ngau, ra chou usun och mettoch mi kon chou ngeniei.

⁵Kinasei kewe ra pwongau o not pokiten ai umwesila lon tipis.

⁶Üa wesewesen pworetiu o chapala, fansoun meinisin üa lolilen.

⁷Üa samaun pwichikar, esap fokun wor pöchökülen inisi.

⁸Üa aiemalü o fokun apwangapwang, üa ngüngü pokiten riaföün lelukei.

⁹Ai Samol, en ka silei mochenin letipei meinisin, ka rongorong ai ngüngü meinisin.

¹⁰Lelukei a chechech, ai pöchökül a sü seniei, pwal mesei esap chüen neneöch.

¹¹Pwii kewe me chiechiei resap kaneto rei pokiten ai samau, pwal mwo nge aramasei ra ütä me toau.

¹²Chokewe mi mochen nieila ra amolätä ar kewe sär, nge chokewe mi mochen ariaföüüei ra kapas usun ar repwe afeiengauaei, ra chök ekiekin rawangauaei fansoun meinisin.

¹³Nge ngang üa usun eman aramas mi selingapwas esap tongeni rongorong. Üa usun eman aramas mi awemwöch esap tongeni fos.

¹⁴Ewer, ngang üa usun eman aramas esap tongeni rongorong, esap pwal wor an kapasen pälüeni.

¹⁵Nge ngang üa apilükülükuk, ai Samol mi Lapalap. Ai Samol me ai Kot, en ätewe mi pälüeniei.

¹⁶Pun üa iotek, pwe kosap fokun mwüt ngeni ekewe chon oputaei pwe repwe takirin ämängauaei o esitaei, lupwen üa mit.

¹⁷Pun üa arap ngeni ai üpwe turula, üa chök memetek fansoun meinisin.

¹⁸Üa pwärätä ai kewe föför mi ngau, üa pwal lolilen ren ai tipis.

¹⁹Chokewe mi oputaei ra fokun pöchökül, nge chokewe mi oputafateei ra chomong.

²⁰Chokewe mi liwini ngeniei ingau fän iten ai föför mürina, ir chon ü ngeniei, pun üa föri mine a pwüng.