Kölfel 119:67-162

⁶⁷Mwen om atolongaei lon riaföü üa mwälechfeil, nge iei üa aleasochisi om kapas.

⁶⁸En ka kirikiröch o föri mine a mürina. Kopwe aiti ngeniei om kewe allük.

⁶⁹Ekewe mi lamalamtekia ra aitengauaei ren ar chofana, nge üa aleasochisi om kewe öüröür ren unusen lelukei.

⁷⁰Leluker esap wor memmef lon, nge ngang üa pwapwaäsini om allük.

⁷¹A mürina ngeniei pwe üa riaföü, pun ren ei üa tongeni kaiö om kewe allük.

⁷²Ewe allük ka ngenikem a mürina ngeniei lap seni ngeröün föün kolt me silifer.

⁷³En ka föriei o tümwünüei. Kopwe fang ngeniei mirit pwe üpwe tongeni kaiö om kewe allük.

⁷⁴Chokewe mi niuokusituk repwe pwapwa, lupwen repwe künaei, pun üa apilükülükü om kewe kapas.

⁷⁵Ai Samol mi Lapalap, üa silei pwe om kewe apwüng ra pwüng, fän om allükülük ka ariaföüüei.

⁷⁶Om tong ellet epwe achipaei, usun ka pwon ngeniei ngang noum we chon angang.

⁷⁷Om ümöümöch epwe toriei pwe üpwe tongeni manau, pun üa pwapwaäsini om allük.

⁷⁸Amwo ekewe chon lamalamtekia repwe säw, pun ra atipisiei, nge ese wor popun. Nge me rei, üpwe ekinlonei om kewe öüröür.

⁷⁹Amwo chokewe mi niuokusituk repwe feito rei, ir chokewe mi silei om kewe allük.

⁸⁰Amwo üpwe fokun aleasochisi om kewe allük, pwe üsap säw.

⁸¹Üa fokun apwangapwangala ren ai positi om kopwe amanauaei, nge üa apilükülükü om kapas.

⁸²Mesei ra toputopula ren ai akköürü mine ka pwon. Üa ais, “Inet kopwe achipaei?”

⁸³Inamwo ika üa lomotongau usun chök eu rumen wain seni silin man mi nürüfengen ren ötüöt, nge üsap manlükala om kewe allük.

⁸⁴Ifa ükükün fansoun ngang noum ei chon angang üpwe engila? Inet kopwe apwüngü chokewe mi ariaföüüei?

⁸⁵Ekewe chon lamalamtekia ra tuw pwang pwe üpwe turulong lon, ir chokewe resap aleasochisi om allük.

⁸⁶Om kewe allük meinisin ra let. Nge aramas ra chök ariaföüüei ren ar kapas chofana. Kose mochen kopwe alisiei.

⁸⁷Arapakan ar repwe ärieila me won fanüfan. Nge ngang üsap likitala om kewe öüröür.

⁸⁸Lon om tong ellet kopwe amwöchü manauei, pwe üpwe tongeni aleasochisi om kewe allük.

⁸⁹Ai Samol mi Lapalap, om kapas a nüküchar me lon läng, a nom tori feilfeilachök.

⁹⁰Om allükülük a nonom tori ekewe täppin aramas meinisin. En ka anomu fanüfan lon lenian, nge a nonomopos.

⁹¹Om kewe allük ra nonom tori ikenai, pun mettoch meinisin ra angang ngonuk.

⁹²Are üsap pwapwaiti om allük, üpwe mäla lon ai riaföü.

⁹³Üsap fokun manlükala om kewe öüröür, pun ka amanauaei pokiter.

⁹⁴Ngang noum, kopwe amanauaei, pun ngang üa kütta om öüröür.

⁹⁵Ekewe aramasangau ra okoperiei pwe repwe nieila, nge ngang üpwe ekinlonei om kewe allük.

⁹⁶Üa küna pwe mi wor öükükün mettoch meinisin, nge om allük esap wor öükükün.

⁹⁷Üa fokun aücheani om allük, üa ekinlonei fansoun meinisin.

⁹⁸Om allük a atipachemaei pwe üa tipachem lap seni chon oputaei, pun a nonom rei fansoun meinisin.

⁹⁹A wor ai sile lap seni än nei kewe sense sile, pun üa ekinlonei om kewe allük.

¹⁰⁰Üa mirit lap seni ekewe reikewe, pun üa aleasochisi om kewe öüröür.

¹⁰¹Üsap föri sokun föför mi ngau, pun üa aleasochisi om kewe kapas.

¹⁰²Üsap tok seni om kewe pwüüng, pun püsin en ai chon kait.

¹⁰³Om kewe kapasen pwon ra fokun arar me rei, ra arar seni chönün chunen me lon awei.

¹⁰⁴Üa angei ai mirit seni om kewe öüröür, iei mine üa oput ekewe föför mi ngau meinisin.

¹⁰⁵Om kapas eu lamp a aiti ngeniei ia üpwe ipwela ie, a pwal asarama alei.

¹⁰⁶Üa pwon fän akapel o anükünükü pwe üpwe aleasochisi om kewe öüröür mi pwüng.

¹⁰⁷Üa fokun riaföü. Ai Samol mi Lapalap, kopwe amanauaei, usun ka pwon lon om kapas.

¹⁰⁸Ai Samol mi Lapalap, kopwe aüselinga ai iotekin kilisou o aiti ngeniei om kewe pwüüng.

¹⁰⁹Üa fangala manauei pwe üpwe tolong lon feiengauen mäla fansoun meinisin, nge üsap manlükala om kewe allük.

¹¹⁰Ekewe aramasangau ra anomu eu sär fän itei, nge ngang üsap aleasolap ngeni om kewe öüröür.

¹¹¹Om kewe allük wöüi tori feilfeilachök. Ewer, ra apwapwai lelukei.

¹¹²Üa filätä pwe üpwe apwönüetä om kewe allük fansoun meinisin tori sopolan manauei.

¹¹³Üa oput ekewe aramas mi tiperuu, nge üa aücheani om allük.

¹¹⁴En ai lenien op me ai chon tümwün. Üa anomu ai apilükülük won om kewe kapas.

¹¹⁵Oupwe sü seniei, ämi chon föri mine a ngau, pwe üpwe aleasochisi än ai Kot kewe allük.

¹¹⁶Kopwe alisiei pwe üpwe tongeni manau, usun ka fen pwon, nge kosap mwütätä pwe üpwe lichipüng lon ai apilükülük.

¹¹⁷Kopwe amwöchüeitä pwe üpwe manau, üpwe meniniti om kewe allük fansoun meinisin.

¹¹⁸Ka oput chokewe meinisin mi aleasolap ngeni om kewe allük. Ewer, ar tipachemsolä esap wor lomotan.

¹¹⁹Ekewe aramasangau meinisin won fanüfan ra usun chök mettoch mi limengau me fän mesom, iei mine üa aücheani om kewe öüröür.

¹²⁰Inisi a chechech ren ai niueituk. Üa niuokus ren om kewe kapwüng.

¹²¹Üa fen föri mine a wenechar o pwüng, kosap likitiei ngeni chon ariaföüüei.

¹²²Kopwe pwon pwe kopwe alisiei ngang noum chon angang, nge kosap mwüt ngeni ekewe chon lamalamtekia pwe repwe ariaföüüei.

¹²³Mesei ra toputopula ren ai aköürü om kopwe amanauaei, pwal ren ai aköürü om kopwe apwönüetä om kewe pwon mi pwüng.

¹²⁴Lon om föför ngeniei ngang noum chon angang kopwe pwäri om tong ellet o aiti ngeniei om kewe allük.

¹²⁵Ngang noum chon angang, kopwe ngeniei mirit pwe üpwe tongeni silei om kewe allük.

¹²⁶Ai Samol mi Lapalap, a tori fansoun pwe kopwe föri om angang, pun aramas ra puri om allük.

¹²⁷Ellet, üa aücheani om kewe allük lap seni kolt me kolt mi mürina.

¹²⁸Iei mine üa apwönüetä om kewe öüröür meinisin, nge üa oput ekewe föför mi mwäl.

¹²⁹Om kewe allük ra fokun amwarar, iei mine üa aleasochisiir ren unusen lelukei.

¹³⁰Lupwen a suk ngenikem masouen om kewe kapas, a wor saram, a ngeni ekewe chon wewemang tipachem.

¹³¹Lon ai positi om kewe allük üa amassaw o ngasepwich.

¹³²Kopwe kuluto o ümöümöch ngeniei, usun ka föri ngeni chokewe mi echenuk.

¹³³Kopwe anükücharaei pwe üsap tur, usun ka pwon, nge kosap mwüt ngeni tipis epwe nemenieila.

¹³⁴Kopwe angasaei seni ekewe aramas mi ariaföüüei, pwe üpwe tongeni aleasochisi om kewe öüröür.

¹³⁵Kopwe netiu woi ngang noum chon angang fän om kirikiröch o aiti ngeniei om kewe allük.

¹³⁶Chönün mesei ra pupu usun chanpupu, pun aramas resap aleasochisi om kewe allük.

¹³⁷Ai Samol mi Lapalap, en ka pwüng, nge om kewe kapwüng ra pwüng.

¹³⁸Om kewe allük ka ngenikem ra pwüng, ra pwal unusen allükülük.

¹³⁹Ai tiliken a apwangapwangaeila, pun chon oputaei ra tümwününgauei om kewe kapas.

¹⁴⁰Om kewe pwon ra asosotöch, ngang noum chon angang üa aücheaniir.

¹⁴¹Üa itengau o küna koput, nge üsap manlükala om kewe öüröür.

¹⁴²Om we pwüng a nom tori feilfeilachök, nge om allük a let.

¹⁴³Weires me eniweniw ra toriei, nge om kewe allük ra apwapwaei.

¹⁴⁴Om kewe allük ra pwüng tori feilfeilachök. Kopwe ngeniei mirit pwe üpwe manau.

¹⁴⁵Üa siö ngonuk ren unusen lelukei. Ai Samol mi Lapalap, kopwe pälüeniei. Ngang üpwe aleasochisi om kewe allük.

¹⁴⁶Üa siö ngonuk. Kopwe amanauaei pwe üpwe apwönüetä om kewe allük.

¹⁴⁷Üa pwätä wünümweerän o siö pwe kopwe alisiei. Üa apilükülükü om kewe kapas.

¹⁴⁸Üa nenela lon unusen pwin pwe üpwe ekinlonei om we pwon.

¹⁴⁹Kopwe aüselinga mweliei lon om tong ellet. Ai Samol mi Lapalap, kopwe amanauaei fän om pwüng.

¹⁵⁰Chokewe mi ariaföüüei ra kaneto fän ar ekingau, nge resap fokun apwönüetä om kewe allük.

¹⁵¹Nge en ka arap ngeniei, ai Samol mi Lapalap, om kewe allük meinisin ra let.

¹⁵²Seni me lomlom üa silei seni om kewe allük, pwe ka anüküchareer tori feilfeilachök.

¹⁵³Kopwe nengeni ai riaföü o angasaei, pun üsap manlükala om allük.

¹⁵⁴Kopwe peniei o angasaei, kopwe amanauaei, usun ka pwon.

¹⁵⁵En kosap amanaua ekewe aramasangau, pun resap aleasochisi om kewe allük.

¹⁵⁶Ai Samol mi Lapalap, om ümöümöch a lapalap, kopwe amanauaei fän om pwüng.

¹⁵⁷Ra men chomong chon ariaföüüei me chon ü ngeniei, nge ngang üsap tok seni om kewe allük.

¹⁵⁸Fän koput üa nenengeni ekewe aramas resap allükülük, pun ir resap aleasochisi om kewe allük.

¹⁵⁹Kopwe ekieki usun ai aücheani om kewe öüröür. Kopwe tümwünü manauei fän om tong ellet.

¹⁶⁰Masouen om kewe kapas meinisin a let. Om kewe allük mi pwüng meinisin ra nonom tori feilfeilachök.

¹⁶¹Ekewe samol ra ariaföüüei nge esor popun, nge ngang üa meniniti om kewe kapas.

¹⁶²Üa pwapwa ren om kewe pwon usun eman mi angei chomong liapan.