Josua 2

1

2

3

4

5

6

10

24

¹Dokopa Josuame akali lama yuu Akasia wambu palyuo paleyaminyi dokona yaki nyuo yuu Kenane doko yalu pyuo kandala pena leya. Yuu Kenane doko kando nyepala yuu taone andake mende Jereko lenge doko angingyuo poraiyuo kandena leya. Nakamba yuu Jereko dokona epo yuu gii kukwa dokopa enda pamuku mende kingi Oreapa lenge dokona anda pali peyambi.

²Kukwa dokopa Isaraele akali lapome yuu doko yalu pyuo kandala imi leyaminyipa Jereko kiŋi dokome siya.

³Sepala dokona lao baame Oreapa keta pii nembapala lao, Akali embena anda petambinyi dolapome yuu dake peparae yalu pyuo kandala imbi. Dokona nakamba kamanda lanyuo ipupi, leya.

⁴Leyamo dokopa enda dokome isingi lao, Kinyi akali lapo nambana anda iminyipape nakamba anja range lao namba see nalyo. Doko nakamba neta anda pupyamopa yuu taone kambu kii doko palyapa naminyipa nambana anda yaki nyuo pumbi. Doko anja pelyambinyi lao piso see napu. Embame pumbinyi dokona waiya lao moko minyuo pare ramo doko kapa kando nyere, leya. (Enda Oreapame akali dolapo anda ketae dorena lanyuo papala puu yaki dopale reteya dokona minyalyapala yalu pyuo koko petena leya.)

⁷Dokopa kiŋinya akali lapo yuu taone doko yaki nyuo papeyami dokopa kambu kii doko paleya. Nakama Isaraele akali lama yalu pyuo yuu waa kandala epeyambi dolapo koto pao ama nanesa wakasa kata ipwa Jotane yalo penge dokona peyami.

⁸Yuu gii kukwa dokopa akali dolapo luu palipa nayambinyipa enda Oreapa doko anda ketae dokona peya.

⁹Papala nakamba lamaiyuo lao, Kamongo dokome yuu dake nakamba jipyamo doko namba silyu. Doko yuu dakena range wambu peparae dupwa nakamba kando pakalyaminyi.

¹⁰Nakama yuu Isipi yaki nyuo epeyaminyipa Kamongo dokome ipwa Kota Kone lenge doko soko rali piyamopa nakama dokona kata siyamo epeyami doko namwa siyama. Dee ipwa Jotane epenge yuu neta pyakalyingi dorena Amote akali kiŋi lama kingi Sayone dee Oke lenge dolapo pyao kumakayami doko namwa siyamako.

¹¹Namwa doko siyama dokopa aopa pakayama. Nakama ama porai ingilyaminyi leyami doko sepala namwana porai renge doko isa puu pao peya. Nakamana Kamongo Anatu doko yake panda ketae dokona baako karenge dee isa yuu pandape peparaena baako karenge.

¹²Epapu banya kingi lao, nambame nakamba anjiki pyuo rapu pilyu doko suu pyao nakambame nambana ree palu dupwa anjiki pyuo rapu pyakaramba lao lalu lao lalapape. Dee nambame nakamba kinyi angiŋi lao suu pyaroleŋe yulu mende pyuo lasaka pipwape.

¹³Pipala nambana anyipi rakanepe kakingipi pemalengepe dee dupwana ree palu peparaepe kyawa lete nyakaramaŋa lao namba kando lalu lao lalapape. Dee namwa pyao kumakana lao kyawa yaki nyii nalapape, leya.

¹⁴Leyamo dokopa akali dolapome enda doko lamaiyuo lao, Namwa letamanuli pyuo pii narama ramo doko namwana Anatu dokome namwa pyao kumakana. Nambwa yulu pimbwano doko embame mendali lamai nare ramo doko Kamongome yuu dake namwa jeramo dokopa emba poraiyuo rapu pyuo kararama lao lalu lao letambano, leyambi.

¹⁵Enda Oreapa banya anda doko pyuo pao yuu taone dokona kana kame dokona suu lasindena palenge. Dokome akali dolapo puu karapala windowa kata dokona isa pena lao malyiya.

¹⁶Dopa pipala enda dokome nakamba lamaiyuo, Kiŋi dokona akali dupwame koto kando nyisarimiŋi yuu kyau pingi dulunya papala yuu gii rema yalu pyuo karalapape. Kararaminyipa akali dusipa anda kapu kyuo eparaminyipa nakamba range kata nyuo parambi, leya.

¹⁷Dokopa akali dolapome enda doko kando lao, Nambwame emba kando pii lalu lao lenge doko minyuo kararamba, leyambi.

¹⁸Dokona embame dopa pepe. Namwame embena yuu dakena sukusa epo pyao nyela epeyama kande dokopa puu kone dokome windowa kata nambwa pupwa lao nembelene dokona puu pyanyi palyape. Palyapala embena endakinyi rakanepe dee embena kakingi pemalengepe dee embena rakanena ree palu wambu dupwape malu palyuo embena anda dokona petena lare.

¹⁹Doko kaepala mendali anda doko yaki nyuo nyisa kama epo paramo dokopa pyao kumarami ramo doko baa rangena yulu. Dokona namwana yulu mende daa. Dopa piraminyipape mendali embena anda dokona pisipala randa nyera ramo doko namwana yulu.

²⁰Dopa piramopape embame nambwa yalu pyuo epo pelyambano doko wambu dupwa lamairi ramo doko nambwame emba keta lalu lao letambano pii doko minyaro kararamba ingya nara, leyambi.

²¹Dokopa enda baame kapa lapala nakamba pena leya. Dopa pipala enda dokome puu kone doko windowa dokona puu pyanyi palyiya.

²²Dokopa akali yalu pyuo yuu waa kandala epeyambi dolapo yuu kyau dokona papala yalu piyambi. Dokopa kiŋi dokona akali dupwame yuu wangu dupwana yuu gii rema nakama koteyami. Koteyaminyipape koto kando nyii napala nakama kapu kyuo Jereko epeyami.

²³Dokopa enakana akali lama dolapo yuu kyau dokona lupyuo epo ipwa yalapala kapu kyuo epo Josua peteyamo dokona peyambi. Papala yulu peparae piyamo dupwa baa lamaiyambi.

²⁴Lamaipala dee lao, Kamongo dokome yuu doko peparae namwa jipyamo doko nambwa silyambano. Doko wambu yuu dokona palaminyi dupwa peparaeme namwa kando pakalyaminyi, leyambi.