Isaías 32

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

51

52

53

54

55

56

57

58

59

60

61

62

63

64

65

66

¹Ur putar amo 'ar nehe. A'e 'ar mehe amo tuwihawete upureruze'egatu putar ukatu haw rupi nehe. Tuwihaw upureruze'eg putar umunar 'ym pà wà nehe.

²A'e paw uzekaiw putar teko wanehe wà nehe. Nuzawy kwaw ywytuaiw wi àmànuhu wi purupykaw wà nehe. Nuzawy kwaw yrykawhu ywy uxinig ma'e rupi uwyryk ma'e wà nehe. Nuzawy kwaw itahu i'àgaw ywyxiguhu rehe har wà nehe.

³Na'e teko paw upuner ma'e hexak katu wi haw rehe wà nehe. Wenu katu wi ma'e paw wà nehe no.

⁴Wiko putar ma'e kwaw katu har romo wà nehe. Ukwaw katu putar ma'e wà nehe. Upuner ma'e kwaw katu har ài uze'egaw rehe wà nehe. Uze'egatu putar wà nehe. A'e rupi teko ukwaw putar waze'eg wà nehe.

⁵— Hemu'em ma'e ikatuahy a'e wà, ni'i kwaw teko wà. — Imunar ma'e ikatuahy a'e wà, ni'i kwaw teko wà.

⁶Hemu'em ma'e umume'u temu'emaw a'e. Tuweharupi ima'enukwaw wemiapo ràm iaiw ma'e rehe. Hemu'em Tupàn Tuweharupi Wiko Ma'e rehe no. Uzapo ma'e Tupàn pe iro ma'e oho iko. Nomono kwaw temi'u ima'uhez ma'e wanupe. Nomono kwaw 'y iziwez ma'e wanupe a'e no.

⁷Imunar ma'e imunar a'e. Umume'u temu'emaw amo wama'e ipyro pà. Aze teko nuzapo kwaw ikatu 'ym ma'e wà, nezewe rehe we imunar wama'e rehe.

⁸Ikatu ma'e ima'enukwaw ikatu ma'e wemiapo ràm rehe. Hemiapo ikatu paw rupi.

⁹Kuzà uma'ereko 'ym ma'e wà, pezeapyaka heze'eg rehe nehe: Peme'egatu nehe, kuzà ma'e rehe uzekaiw 'ym ma'e wà.

¹⁰Pemumaw putar pitài kwarahy amogwemogwer 'ar wamumaw pà nehe. Na'e pepuraraw putar ma'erahy pezemumikahy pà nehe, ta'e naheta kwaw uwà ipo'o haw a'e 'ar mehe nehe xe.

¹¹Ko 'ar rehe peiko ma'e rehe pezekaiw 'ym pà. Peryryryryz nehe kury, pezemumikahy nehe kury. Penuhem penopoz nehe. Pemunehew pàn iànàm ma'e ma'eryru iapo pyr nehe.

¹²Pekwar pepuxi'a rehe pezemumikahy haw hexak kar pà nehe. Pezai'o nehe, ta'e zauxiapekwer umuaiw ywy ikatu kwer wà xe. Umumaw uwà tyw i'a katu kwer wà no.

¹³Xu hezuz putar ka'a rehe we heremiaihu waiwy rehe nehe. Pezai'o tawhu hurywete ma'e kwer rehe nehe. Pezai'o tàpuz teko hurywete ma'e pupe tynehem ma'e kwer rehe nehe.

¹⁴Naheta kwaw teko tuwihawete hàpuzuhu pupe wà nehe. Naheta kwaw teko tawhu pupe wà nehe. Tàpuztàtà uzeapo putar ywy ikaika pyrer ywytyr romo uzeapo ma'e kwer romo nehe. Zumen hehaite ma'e wiko putar a'e pe wà nehe. Ni amo nomono kar kwaw a'e wi wà nehe. Àràpuhàràn u'u putar ka'api'i a'e pe wà nehe no.

¹⁵Tupàn uzakook putar wekwe zanerehe 'y ài nehe. A'e 'ar mehe ywyxiguhu uzeapo putar ma'etymaw romo ywy katu romo nehe. Ma'e itym pyrer umuezuz kar wera'u putar temi'u nehe.

¹⁶Ko ywy nànàn heta putar katu haw nehe. Teko paw uzapo putar ikatu ma'e wà nehe.

¹⁷Teko waneko haw ikatu putar nehe. A'e rupi naheta kwaw zeàmàtyry'ymaw nehe. Teko wiko putar uzeàmàtyry'ym 'ym pà wà nehe. Zauxiapekwer amo ywy rehe har nur pixik kwaw ko ywy rehe har waàmàtyry'ym pà wà nehe. Waneko haw ikatu putar tuweharupi nehe.

¹⁸Heremiaihu wiko putar ywy ikatu ma'e rehe ukyze 'ym pà wà nehe. Paw rupi wiko putar uzeàmàtyry'ym 'ym pà wà nehe. Wiko putar wàpuz me ukyze 'ym pà wà nehe.

¹⁹(Ita tetea'u ukyr putar àmàn ài ka'aete imumaw pà nehe. Umumaw putar tawhu nehe no.)

²⁰Penurywete paw rupi nehe. Heta tetea'u putar 'y penemitygwer pe nehe. Heta tetea'u putar ka'api'i peneimaw zumen wanupe nehe, tapi'ak wanupe nehe no.