Iosua 7:1-6

¹Muga e BAKOVI DAGI i taki e huriki a Israel nahea ri gi bole ranga maki. A maki lobo ge nono. Pali e Akan i longotaroa a ngava iea, i panaho ranga maki. Lakea e BAKOVI DAGI i madihi a hatena ne huriki a Israel. E Akan e tune Karmi, e Karmi e tune Sapdi, e Sapdi e tune Sera na kabu ne Iuda.

²E Iosua i made o Ieriko i rudu e huriki a bakovi ri lakea o Ai, ra tanga i pesi na tabeke na nirikena haro na tanga e Betel, tabukoi na tanga e Betaven. I taki ria ri gi lokovonga ri gi kasisia a tanga iea. Lakea e huriki nga ri vano, ri rata manga a ngava i taki e Iosua.

³Muri ri hamule, ri vakalongoa e Iosua, ri ta maea, “Naha ni taki e huriki lobo ri gi lokovonga, a vuhuna a tanga i kiroko. O rudu kunana e huriki ri gi ala 2,000 o ge ala 3,000, ri gi lokovonga ri gi vaubi vona a tanga e Ai.”

⁴Muri e huriki a nugumaheto ri ala 3,000 ri lokovonga. Pali e huriki a bakovi o Ai ri valili mule ne ria.

⁵Ri tubu ni valili ne huriki a Israel na nihebi dagi na tanga dagi i harena o Sebarim. Ri rabalaki e huriki ri ala ravulu tolu a polona i polotara (36) na dala lakea na lolo. Ni rata mavonga e huriki a Israel ri mangenge, i uka ma ri pesi tora.

⁶E Iosua i longo a vuranga i bele ne ria, i dodo hateka i rape a maka varakia vona. I mahita ngalatudu tabukoi na Tava ne BAKOVI DAGI. E huriki a gare o Israel ranga ri mahita ngalatudu turana, ri tabuli mavonga i harena na haro i rolo. Ri vorotapa na gine ria a habulo, ge a kilakila ne ria ri dodo hateka.