Iosua 11:3-16

³tadav ra tarai Kanaan ta ra papar a taur ma ta ra papar a taoai, ma ra tarai Amor, ma ra tarai Ket, ma ra tarai Peres, ma ra tarai Iebus ta ra lualuana, ma ra tarai Kivi ta ra bit a luana Kermon ta ra gunan Mispa.

⁴Ma dia ga vana rikai, diat ma kadia lavur kor na tarai na vinarubu par, mangoro na tarai da ra veo ara ra valian, ma i ga peal kadia umana os ma ra umana kiki na vinavana ure ra vinarubu.

⁵Ma go ra lavur king par dia ga vana guvai; dia ga vut ma dia ga ki guvai ta ra tava Merom, upi diat a varubu ma ra tarai Israel.

⁶Ma ra Luluai i ga biti tai Iosua: Koko una burutue diat, tago ta ra pakana bung dari ningene ina tul tar diat a umana virua ta ra luaina mata i ra tarai Israel; ma una poko vakaina kadia umana os, ma una tun vue kadia umana kiki na vinavana ma ra iap.

⁷Damana Iosua, diat ma ra tarai na vinarubu par, dia ga vut vakaian tadav diat ta ra tava Merom, ma dia ga vila taun diat.

⁸Ma ra Luluai i ga tul tar diat ta ra lima i ra tarai Israel, ma dia ga ubu diat, ma dia ga korot mur diat tuk tar ta ra ngala na pia na pal Sidon, ma tuk tar Misrepot-Maim, ma tuk tar ta ra male Mispe ta ra papar a taur; ma dia ga ubu diat tuk tar ta ra pakana bung ba pa ta na i ga laun valili mulai.

⁹Ma Iosua i ga pait nam ra magit ta diat ba ra Luluai i ga tatike tana; i ga poko vakaina kadia umana os, ma i ga tun vue kadia umana kiki na vinavana ma ra iap.

¹⁰Ma Iosua i ga talil ta nam ra e, ma i ga uvia pa Kasor, ma i ga ubu ra king tana ma ra pakat na vinarubu; tago lua Kasor i ga lualua ta nam ra lavur gunan.

¹¹Ma dia ga ubu ra tarai par tana ma ra mangi na pakat na vinarubu, dia ga nila rit vue diat, ma pa ta launa mulai i ga mat valili; ma i ga tun vue Kasor ma ra iap.

¹²Ma Iosua i ga uvia pa ra lavur pia na pal kai nam ra lavur king, ma i ga uvia pa ra lavur king tana, ma i ga ubu diat ma ra mangi na pakat na vinarubu, ma i ga kamare rit vue diat, da Moses ra tultul kai ra Luluai i ga vartuluai tana.

¹³Ma ra lavur pia na pal dia tur ta kadia buabuana tikatikai, a tarai Israel pa dia ga tun vue diat; ia kaka Kasor, Iosua i ga tun vue nam.

¹⁴Ma ra lavur tabarikik ta go ra lavur pia na pal, ma ra lavur vavaguai, ra tarai Israel dia ga ra pa diat upi kadiat, ma dia ga ubu ra tarai par ma ra mangi na pakat na vinarubu, tuk tar ta nam ba di ga nila vue diat, ma pa dia ga doko valili ta tikai ta diat dia ga laun.

¹⁵Da ra Luluai i ga vartuluai pire Moses kana tultul, damana Moses i ga vartuluai pire Iosua, ma damana Iosua i ga pait ia; pa i ga pait valubane ta magit ta nam parika ra Luluai i ga tul tar ia tai Moses.

¹⁶Damana Iosua i ga vatur vake nam ra gunan parika, a gunan na lualuana, ma ra papar Negeb parika, ma ra gunan Gosen, ma ra male, ma ra tamataman Araba, ma ra gunan i lualuana kai Israel, ma ra male tana,