يٌسُوٍ 11:3-16

³كَنَانكَيٍ نَشٍيٍ نُ نَ سٌفٍتٍدٍ نُن سٌفٍفٌرٌدٍ، عَمٌرِكَيٍ، شِتِكَيٍ، ثٍرِ سِكَيٍ، يٍبُسُكَيٍ نَشٍيٍ نُ نَ فٍيَيٍ قَرِ، عَ نُن هِوِكَيٍ نَشٍيٍ نُ نَ شٍرِ مٌن فٍيَ بُنيِ مِسِثَ بْشِ مَ.

⁴نَ مَنفّيٍ نَشَ عٍ شَ سْورِيٍ بِرِن مَلَن، نَشٍيٍ وُيَ عَلْ مّيّنيِ بَا دّ رَ. سٌي فبٍفبٍ نُن سْورِ رَفِسٍ فبٍفبٍ قَن نُ نَ عٍ يِ.

⁵يِ مَنفّيٍ نَشَ لَن قٍ كٍرٍن مَ، عٍ نَشَ سَ عٍ شَ يٌنكِندٍ تِ مٍرٌ مِ شُرٍ قّ مَ عِسِرَيِلَكَيٍ فٍرٍقٍ مَ.

⁶عَلَتَلَ نَشَ عَ مَسٍن يٌسُوٍ بّ، «هَلِ عِ مُ فَاشُ عٍ يَ رَ، بَرِ مَ تِنَ يِ تّمُي مَ، ﭑ تَن عٍ بِرِن سَمَ نّ عِ بّلّشّ، عِ عٍ قَشَ عِسِرَيِلَكَيٍ يَ شْرِ. عِ قَمَ نّ عٍ شَ سٌي سَن قَسّيٍ بٌلٌندٍ، عِ قَمَ نّ عٍ شَ سْورِ رَفِسٍيٍ فَندٍ.»

⁷يٌسُوٍ نُن عَ شَ فٍرٍ سٌييٍ نَشَ سِن عٍ مَ مٍرٌ مِ شُرٍ قّ مَ.

⁸عَلَتَلَ نَشَ عٍ سَ عِسِرَيِلَ بّلّشّ. عٍ نَشَ عٍ بْنبْ، عٍ عٍ كٍرِ هَن سِدْن تَا شُنفبٍ كُي، هَن مِسِرٍقٌتِ مَيِمِ، هَن مِسِثَ فُلُنبَ رَ سٌفٍتٍدٍ بِرِ. عٍ نَشَ عٍ بْنبْ، عٍ مُ مِشِ كٍرٍن لُ.

⁹يٌسُوٍ نَشَ عٍ شَ قٍ رَبَ عَلْ عَلَتَلَ عَ مَسٍن عَ بّ كِ نَشّ. عَ نَشَ عٍ شَ سٌي سَن قَسّيٍ بٌلٌن، عَ عٍ شَ سْورِ رَفِسٍيٍ قَن فَن.

¹⁰عَ فبِلٍن فبِلٍن مَ، يٌسُوٍ نَشَ شَسٌرِ بْشِ قَن سُشُ، عَ نَشَ عَ مَنفّ قَشَ سَنتِدّفّمَ رَ، بَرِ مَ عَ تَن نَن نُ نَ مَنفَتَا رَ نَ بْشِ بِرِن شُن.

¹¹يٌسُوٍ شَ سْورِيٍ نَشَ عٍ سْنتْ سَنتِدّفّمَ رَ، عٍ مُ مِشِ كٍرٍن لُ عَ سِ رَ. نَ دَنفِ شَنبِ عٍ نَشَ شَسٌرِ تَا فَن.

¹²يٌسُوٍ نَشَ نَ تَايٍ بِرِن سُشُ، عَ مّننِكَيٍ نُن عٍ مَنفّيٍ قَشَ سَنتِدّفّمَ رَ، عَ مّننِ رَتْن عَلْ عَلَتَلَ شَ كٌنيِ مُنسَ عَ قَلَ عَ بّ كِ نَشّ.

¹³كْنْ عِسِرَيِلَ شَ سْورِيٍ مُ تَايٍ فَن نَشٍيٍ نُ نَ فٍيَيٍ قَرِ، قٌ شَسٌرِ كٍرٍن يٌسُوٍ دّننَشّ فَن.

¹⁴عِسِرَيِلَ نَشَ عَ وَ سَسٌ يِ تَايٍ هَرِفٍ نُن عٍ شَ شُرُ سٍيٍ رَ، كْنْ عٍ نَشَ مِشِيٍ تَن بِرِن قَشَ سَنتِدّفّمَ رَ. عٍ مُ مِشِ كٍرٍن لُ عَ حِحّ رَ.

¹⁵عَلَتَلَ نَشَن يَمَرِ عَ شَ كٌنيِ مُنسَ بّ، عَننَبِ مُنسَ قَن نَشَ نَ يَمَرِ يٌسُوٍ بّ. يٌسُوٍ نَشَ نَ بِرِن نَبَ عَلْ عَلَتَلَ عَ مَسٍن عَننَبِ مُنسَ بّ كِ نَشّ.

¹⁶يٌسُوٍ نَشَ نَ بْشِ بِرِن مَسْتْ؛ فٍيَ يِرٍ، نٍفٍوِ فبٍنفبٍرٍنيِ، فٌسٍن بْشِ، سٍقٍلَ بْشِ، نُن يُرُدّن فُلُنبَ، كٍلِقٍ عِسِرَيِلَ فٍيَيٍ مَ هَن بَا دّ رَ.