Josua 11:3-16

³Iwe, a titi ekewe chon Kanaan mi nom ötiu me lotou, ekewe chon Amor, chon Hit, chon Peris me chon Jepus mi nom lon ewe fanü mi chukuchukutä, pwal ekewe chon Hiw mi nom fäsonun ewe chuk Hermon lon ewe fanü Mispa.

⁴Iwe, ra feito me nöür kewe sounfiu meinisin lon mwicheicher mi fokun watte, ükükün chochor usun föün pien aroset. A pwal wor rer chomong oris me woken.

⁵Iwe, ekei king meinisin ra achufengeni nöür kewe mwichen sounfiu, ra feito o nonomfengen arun ewe kolukun Merom, pwe repwe maun ngeni Israel.

⁶Nge ewe Samol mi Lapalap a üreni Josua, “Kosap niuokusitiir, pun iei otun lesor üpwe atolongeer meinisin lepöün chon Israel, nge ir mei mä. Kopwe pökü selin pechen nöür kewe oris o kenala war kewe woken.”

⁷Iwe, Josua me nöün kewe sounfiu meinisin ra aserengaueer me arun ewe kolukun Merom o maun ngeniir.

⁸Iwe, ewe Samol mi Lapalap a awinna chon Israel, pwe ra akufuur o tapweriir tori Sitonlap me Misrefot-maim, pwal tori ewe lemolun Mispa mi nom ötiu. Iwe, ra nirela meinisin tori esap chüen wor eman mi manau.

⁹Iwe, Josua a föri ngeniir usun mine ewe Samol mi Lapalap a allük ngeni. A pökü selin pechen nöür kewe oris o kenala war kewe woken.

¹⁰Mürin Josua a kulsefäl, a liapeni Hasor o niela an king. Lon ena fansoun Hasor a samolun telinimwen ekewe mwü.

¹¹Iwe, ra niela chon ewe telinimw meinisin o fokun aroserela. Esap chüen wor eman mi manau me lon. Josua a pwal kenala Hasor.

¹²Iwe, Josua a liapeni ekewe telinimw me ar kewe king meinisin, a niela aramasen lor o fokun aroserela, usun Moses nöün ewe Samol mi Lapalap we chon angang a fen allük.

¹³Nge ekewe chon Israel resap kenala ekewe telinimw mi kaütä won chukutekison, chilon chök Hasor Josua a kenala.

¹⁴Ekewe chon Israel ra angei mine ra liapeni me lon ekewe telinimw pwal ekewe pwiin man pwe choon wokur. Nge ekewe aramas meinisin ra nirela. Resap fokun amanaua eman.

¹⁵Usun mine ewe Samol mi Lapalap a allük ngeni nöün we chon angang Moses, iei usun Moses a allük ngeni Josua. Nge Josua esap likiti och, pwe a föri meinisin mine ewe Samol mi Lapalap a allük ngeni Moses.

¹⁶Iwe, Josua a liapeni unusen ewe fanü: Ewe fanü mi chukuchukutä me ewe fanü tekison mi nom efeng me ör, unusen ewe fanü Kosen me ewe fanü Nekep pwal ewe lemolun Jortan.