Joshua 11:3-16

³Miki pi’ e thin nge yan ngak piyu Kanaan ni yad bay u ruw raba’ fare Jordan, nge pi Amorite, nge pi Hittite, nge pi Perizzite, nge pi Jebusite u lan fare binaw ni go’ burey, ma ku errogon ni yan e thin ngak pi Hivite ni yad ma par u enggin fare Burey ni Hermon u lan e binaw nu Mizpah.

⁴Marbad nike un urngin e salthaw rorad — barba’ i salthaw nib yo’or girdi’en, ya ta’reb urngirad ko yan’ nu dap’elay. Ma ku errogon e os nge chariot ni yo’or.

⁵Urngin e pi pilung ney nra pethgad nga ta’bang ngari gel gelngirad marbad ra pired nga charen fa chipa’ i lul’ nu Merom ni ngar chamgad ngak yu Israel.

⁶I SOMOL e ga’ar ngak Joshua, “Dab mu rus ngorad. Re ngiyal’ i n’ey gabul e bay gu li’rad ngarm’ad ni fan ngak yu Israel. Me gur e ngam th’ab e garaw u ay e pi os rorad ma ga urfiy e pi chariot rorad.

⁷Ere Joshua nge urngin e salthaw rok e ra chamgad nib tomgin ngak e pi to’ogor rorad ko fa chupa’ i lul’ nu Merom.

⁸Me gelnag SOMOL piyu Israel ngak e pi to’ogor rorad ko mael. Cham yu Israel ngorad ngar tulufedyad i yan ngalan e lel’och ngar mada’gad nga Misrefoth Maim ngu Sidon, mu kuyad tulufrad ngalan e ngek ngar mada’gad ko loway nu Mizpah. Min cham nge mada’ ko ngiyal nri dakuriy ta’reb fapi to’ogor rorad ni kabfos.

⁹I rin’ Joshua ngorad e tin ke tay SOMOL chiylen: i th’ab e garaw u ay e os rorad me urfeg fapi chariot rorad.

¹⁰Ma aram me sul Joshua, nge kol yu Hazor nge li’ e pilung riy. (Ngiyal’nem e yu Hazor e th’abi ga’ lungun ko gubin e lungun e pulung.)

¹¹Miyad thang e pogofan rok urngin e girdi’ u rom; dariy be’ nni pag ni kabfos, min ufiy fare binaw nu Hazor.

¹²Me kol Joshua gubin fapi binaw nge pilung riy, me thang e pogofan rok urngin e girdi’, nri bod ni yog Moses ni fare tapigpig rok SOMOL.

¹³Yug aram rogon, ma piyu Israel e dar urfiyed reb ko fapi binaw nni toy nga daken yung i but’ nib tolang’, kemus nu Hazor e urfiy Joshua.

¹⁴Girdi’ nu Israel e ra feked urngin e pin’en nib tolang puluwon nge gamanman u lan e pi binaw ney ngar cha’riyed ni nge milfan ngorad. Machane miyad thang e pogofan rok gubin e girdi’; ni dariy be’ nra paged nib fos.

¹⁵Tin ngan rin’ e ke mu’ i yog rok SOMOL ngak Moses ni tapigpig rok, me yog Moses ni gubin ngak Joshua, me fol Joshua riy. Me rin’ urngin ban’en nike yog SOMOL ngak Moses ni ngan rin’.

¹⁶Me kol Joshua urngin fapi binaw — ni go’ burey nge binaw u enggin e burey, ni tin bay ko lel’och nge yimuch, nge urngin e yang e binaw u Goshen nge fa gi dep’eted nib mlik ni bay ko yimuch riy, ni kub mu’un fare Loway ni Jordan ngay.