IOANE 6:10-44

¹⁰Vadaeni Iesu ia gwau, “Taunimanima dekenai do umui hereva henia, do idia helai diho.” Unai gabu dekenai be rei momo ia noho. Vadaeni idia helai diho taudia be 5000 bamona.

¹¹Iesu ese inai aniani gaudia ia abia, ia hanamoa, vadaeni idia helai diho taudia ta ta ibounai dekenai ia henia. Gwarume danu unai bamona ia henia, taunimanima edia ura hegeregerena.

¹²Idia boga kunu, vadaeni Iesu ese iena diba tahua taudia dekenai ia hereva henia, ia gwau, “Aniani orena do umui haboua, kahana maragimaragi ta do ia boio lasi.”

¹³Unai dainai idia ese aniani orena idia haboua, vadaeni bosea 12 idia hahonua, unai paraoa maragi 5 sibona, taunimanima ese idia ania haorea lasi gaudia, idia rakatania dekena amo.

¹⁴Taunimanima be unai toa Iesu ese ia karaia gauna idia itaia, vadaeni idia gwau, “Momokani, tanobada dekenai do ia mai peroveta tauna be inai.”

¹⁵To Iesu ia diba idia be do idia mai, do idia dogoatao, edia king dekenai do idia halaoa gwauraia. Unai dainai ia be sibona ororo dekenai ma ia daekau lou.

¹⁶Adorahi neganai, Iesu ena diba tahua taudia be idia diho kone dekenai.

¹⁷Vanagi ta dekenai idia guia, gohu dekenai idia heau hamatamaia, Kaperanauma hanua dekenai do idia lao gwauraia. Hanuaboi dibura ia mai vadaeni, to Iesu be do ia ginidae lasi idia dekenai.

¹⁸Vadaeni lai goada ia toreisi dainai, gohu be ia hurehure bada.

¹⁹Kilomita 5 o 6 bamona idia bara karaia, vadaeni Iesu idia itaia, gohu ena kopina dekenai ia raka lao vanagi dekenai, vadaeni idia gari dikadika.

²⁰To Iesu ia gwau, “Inai be lau! Umui gari lasi!”

²¹Vadaeni mai edia moale danu, vanagi dekenai Iesu idia abia daekau, vadaeni nega tamona idia lao gwauraia tano dekenai idia ginidae.

²²Kerukeru dabai, taunimanima momo be gohu unai kahana dekenai idia gini noho, idia diba vanagi ta be lasi, Iesu ena diba tahua taudia ese idia abia lao gauna sibona. Idia diba danu Iesu be iena diba tahua taudia danu ia guia lasi, to diba tahua taudia sibona.

²³To vanagi haida be Tiberia dekena amo idia heau hanaia, inai Lohiabada ese Dirava ia hanamoa bona aniani ia henidia gabuna badibadina dekenai idia ginidae.

²⁴Unai dainai, taunimanima idia diba vadaeni, Iesu bona iena diba tahua taudia be idia noho lasi, vadaeni idia ese inai vanagi haida dekenai ma idia guia, Kaperanauma dekenai idia lao, Iesu idia tahua.

²⁵Gohu ena kahana dekenai Iesu idia davaria, vadaeni idia nanadaia, idia gwau, “Rabi e, edena negai oi mai?”

²⁶Iesu ia haere idia dekenai,ia gwau, “Momokani, momokani umui lau hamaoroa, umui ese lau umui tahua noho, toa umui itaia dainai lasi, to aniani gaudia umui ania, vadaeni umui boga kunu dainai.

²⁷Umui gaukara lasi aniani ia ore gauna abia totona, to do ia noho, ia lao bona mauri hanaihanai, ena aniani abia totona do umui gaukara. Unai be Taunimanima ena Natuna ese do ia henia umui dekenai, badina be iena Tamana Dirava ese, ia hamomokania ena toa be ia dekenai ia henia vadaeni.”

²⁸Vadaeni idia nanadaia ia dekenai, idia gwau, “Ai be edena bamona do ai karaia, Dirava ena gaukara karaia totona?”

²⁹Iesu ia haere, ia gwau, “Dirava ena gaukara be inai: Ia siaia tauna dekenai do umui abidadama henia.”

³⁰Ma Iesu idia nanadaia, idia gwau, “Toana be dahaka do oi karaia, do ai itaia, vadaeni do ai abidadama henia oi dekenai? Oi be dahaka do oi karaia?

³¹Aiemai sene taudia ese mana idia ania noho taunimanima idia noho lasi tano dekenai, Buka Helaga dekenai ia torea hegeregerena, ia gwau, ‘Edia aniani be ia ese guba dekena amo ia henia diho.’ ”

³²Iesu ia haere idia dekenai, ia gwau, “Momokani, momokani umui lau hamaoroa, Mose ese aniani be guba dekena amo ia henia diho lasi umui dekenai. To egu Tamana ese aniani guba dekena amo ia siaia diho noho umui dekenai, aniani momokani be inai.

³³Badina Dirava ena aniani, be guba dekena amo ia diho mai Tauna, bona ia ese mauri be tanobada dekenai ia henia noho.”

³⁴Vadaeni idia noinoi ia dekenai, idia gwau, “Lohiabada e, inai aniani be dina ibounai do oi henia ai dekenai.”

³⁵Iesu ia gwau, “Mauri ena aniani be lau inai. Lau dekenai ia mai tauna be do ia hitolo lasi, bona lau dekenai do ia abidadama henia tauna be do ia ranu mase lasi, lasi bona lasi momokani.

³⁶To umui lau hamaoroa vadaeni, ani, umui itaia lau, to umui abia dae lasi lau.

³⁷Lauegu Tamana ese lau dekenai ia henia taudia ibounai be lau dekenai do idia mai, bona lau dekenai do ia mai tauna be do lau lulua lasi, lasi bona lasi momokani.

³⁸Badina be guba dekena amo lau diho mai vadaeni, lauegu ura karaia totona lasi, to lau ia siaia Diravana ena ura karaia totona.

³⁹Bona lau ia siaia Diravana ena ura be inai: Lau dekenai ia henia taudia ibounai be ta do ia boio lasi lau dekena amo, to inai taudia do lau hatorea isi, dokona dina dekenai.

⁴⁰Badina be egu Tamana ena ura be inai: Iena Natuna do idia itaia noho, bona do idia abidadama henia taudia ibounai be mauri hanaihanai do idia abia, bona lau ese dokona dina dekenai idia do lau hatorea isi.”

⁴¹Vadaeni Iuda taudia idia maumau Iesu dekenai, badina be ia gwau, “Lau be guba dekena amo ia diho anianina.”

⁴²Idia gwau, “Be! Inai be Iesu lasi, a? Iosepa ena natuna lasi, a? Iena tamana bona iena sinana be ita diba vadaeni. Edena bamona ia be ia gwau, ‘Lau be guba dekena amo lau diho’?”

⁴³Iesu ia haere idia dekenai, ia gwau, “Unai bamona umui maumau lasi.

⁴⁴Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba, vadaeni dokona dina dekenai unai tauna do lau hatorea isi.