Hebrews 4

1

2

3

4

5

6

7

8

9

10

11

12

13

¹Wankalana barri yanybayi Kud jangkurr miku nangkiyi yangkalamba. Yanybayi Kud yalungi, jala yalu ngayangayijba nangangi, baki jayalu ngankijba kunybana yajina, baki jayalu wuyalijba nanaba. Nani barri yanybayi Kud wankalana. Baki yuwajiwa nanda jangkurr duja nanijba barri. Baki ngambala jingkijba Kud, janyulu munyajba ngambalanya ngankiykurri nananyina kunybana yajina kingkarri, baki nanaba jangambala wuyalijba barri. Ngala marda ngambalakimi najbawa. Marda ngambalimi yurrngumba ngayangayijba nanganginkanyi jangkurranyi Kudkanyi, bakiyi nyulu miku munyajba ngambalanya ngankiykurri nananyina yajina kingkarri, bakiyi nyulu miku munyajba ngambalanya wuyaliykurri nanaba. Yi. Marda ngambalakimi najbawa. Marda ngambalimi ngayangayijba nangangi Kudkanyi yurrngumba barri.

²Ngambala mankuyi nanda kunyba jangkurr nangangi Kudkanyi, barrinani nanamukunyi wankalamukunyi, jali manku nangangi kunyba jangkurr wankalana barri. Ngala nanda jangkurr nangangi Kudkanyi, yalu wuyaliykanyi, miku nanda jangkurr yalungi wankalamukuyngka. Miku nanda jangkurr yalungi, mikungangi yaliyanyi kuyu nanda jangkurr, ngala yali yurlwa nanankanyi jangkurranyi. Miku yaliyanyi yanyba, “Nayinda jangkurr nangangi Kudkanyi duja barri. Ngambala jingkijbangka Kud, janyulu yabimba nanda jali nyulu yanyba, janyulu yabimba.” Miku yaliyanyi yanyba nani. Miku yaliyanyi nani kuyu nanda jangkurr nangangi, ngala yali yurlwa nanganginkanyi jangkurranyi. Baki nanankardi barri ngambala jingkijbangka barri, nanda jangkurr Kudkanyi yalu wuyaliykanyi, mikukiyanyi yanyba Kud nanda jangkurr yalungi barri.

³Ngala ngambala barri, ngambala marda mankuyi nanda kunyba jangkurr nangangi Kudkanyi. Karuyi ngambalanya nanankanyi jangkurranyi Jisus Krayiswanyi. Baki ngambala barri, jala kuyu nangangi jangkurr, jangambala ngankijba nananyina kunybana yajina kingkarri, baki jangambala ngambala wuyalijba nanaba kingkarri. Nanda jangkurr Kudkanyi wuyaliykanyi, nanda duja jangkurr. Yanybayi Kud, “Nanginmuku Jumuku, yalu jardibirringujba muwa. Baki nanankardi barri ngayu ngarrangarrangka muwa yalungi. Miku yalimi ngayangayijba ngakinkanyi jangkurranyi. Baki nanankardi barri miku ngayiyi yalilijba yalunya nanankurri kunybarri yajiyurri langku. Miku ngayiyi munyajba yalunya ngankiykurri nanaba langku. Miku yaliyi wuyalijba nanaba kunybana yajina.” Barriwa. Wabula kamambarra yabimbayi bukamba yaji Kudwanyi. Yabimba nyuli laliji baki jamba baki wabuda, baki bukamba yaji. Yabimba nyuli bukamba yaji kajana kambana, 6 kambana. Yabimbayi bukamba yaji Kudwanyi, 6 kambana, baki munganawa nyuli wuyalijba. Wuyalijba nyuli munganawa barri.

⁴Nanda jangkurr najana Kudkanyi yanybaka, nayi barri, “Yabimbayi bukamba yaji 6 kambana Kudwanyi, baki munganawa nyuli wuyalijba. Miku nyuliyanyi mili waki, ngala wuyalijba nyuli.” Barriwa.

⁵Baki mili nanda jangkurr najana Kudkanyi yanybaka nayi barri. “Miku ngayiyi yalilijba yalunya nanankurri kunybarri yajiyurri langku. Miku ngayiyi munyajba yalunya ngankiykurri nanaba langku. Miku yaliyi wuyalijba nanaba.” Barriwa. Yanybayi Kud nanda jangkurr yalungi, narringinkanyi wankalanyi mungkijimukuyngka. Yanybayi Kud nanda kunyba jangkurr, yalu wuyaliykanyi nananyina kunybana yajina, ngala miku yaliyanyi kuyu nanda kunyba jangkurr. Miku yaliyanyi ngayangayijba nanganginkanyi jangkurranyi Kudkanyi. Baki nanankardi barri mikukiyanyi munyajba yalunya Kudwanyi, yalu ngankiykurri nanaba langku. Miku nyuliyanyi munyajba yalunya wuyaliykurri nanaba. Ngala yuwajiwa duja barri nanda jangkurr nangangi Kudkanyi, yalu wuyaliykanyi kunybana yajina. Miku yaliyanyi wuyalijba kunybana jambana, nanamuku wankalamuku, ngala yingkamuku jayalu wuyalijba kunybana jambana. Yingkamukunyi jayalu kuyu nangangi jangkurr Jisus Krayiskanyi, jayalu durrijba nangangi jangkurr, baki jayalu yalu wuyalijba kunybana yajina kingkarri barri.

⁷Nanda wankalanyi mambuka yalungi Jumukuyngka, niji Musis, jali barri nangka janyba, baki yarrijbayi yingka mambuka yalungi bayngkani nangandu Kudwanyi. Yarrijba nyuli yingka mambuka yalungi, niji nangangi Jujuwa. Jandanyimuku baki kulunganjamuku yalungi, jali yalungka janyba mangkurruna yajina kularra, nyuli kuyu yalunya nanankurri kunybarri yajiyurri langku Jujuwawanyi. Yalu barri ngankijbayi nananyina kunybana yajina, jali wajba yalunya Kudwanyi. Ngankijba yali, ngala miku yaliyanyi wuyalijba nanaba. Miku. Jayijba yalili nanamuku mungkijimuku nanankanyi yajinyi. Miku yaliyanyi wuyalijba, ngala yurrngumba yalunjalili jayijba, wudumbikanyi nanda yaji yalunginmirra yaji. Baki mili baku barri juju, yingka wankalanyi mambuka, nangangi niji Dayibid. Yanybayi Kud nangangi, nayi barri, “Jala narri manku nanda jangkurr nangangi Kudkanyi, baki marda narrimi miku jardibirringujba muwa nanankanyi jangkurranyi. Marda narrimi miku jardibirringujba muwa, ngala marda narrimi kuyu nanda jangkurr.” Barriwa. Nani barri yanybayi Kud nangangi Dayibidkanyi, baki yarrijbayi nanda jangkurr najana Kudkanyi Dayibidwanyi.

⁹Nanda barri duja jangkurr. Baki nanankardi barri ngambala jingkijbangka barri, nanamuku jala yalu kuyu nangangi jangkurr Kudkanyi, jala yalu jungku yurlurrmba nangangi, janyulu munyajba yalunya, ngankiykurri nanaba kunybana yajina. Janyulu munyajba yalunya, wuyaliykurri nanaba. Wuyalijbayi Kud, jali bukamba nyulu yabimbikanyi yaji, baki nani barri jayalu wuyalijba nanaba kingkarri nangandu Kudnyina.

¹⁰Nanda jala munyajba wuyaliykurri Kudwanyi, janyulu wuyalijba barrinani nyulu wuyalijbayi Kud. Wakiyi barri Kud 6 kambana, baki jali nyulu bukamba yabimbikanyi yaji, baki wuyalijba nyuli. Baki nani barri nanda jalija wuyalijba kingkarri nangandu Kudnyina. Jalija nyulu bukamba wakinkanyi nangangi Kudkanyi, baki janyulu wuyalijba nanaba kingkarri nangandu yurrngumba barri.

¹¹Nanankardi barri, marda ngambalimi jungku yurlurrmba nangangi Kudkanyi yurrngumba barri. Marda ngambalimi kuyu nangangi jangkurr, marda ngambalimi durrijba nangangi jangkurr, baki marda ngambalakimi miku yangkalamba nanganbunanyi Kudnanyi. Jaliyi ngambala nani jungku yurlurrmba nangangi yurrngumba barri, baki munyajbaja ngambalanya Kudwanyi, ngambala wuyaliykurri nanganginyina yajina kingkarri. Ngala jaliyi ngambala miku jungku yurlurrmba nangangi Kudkanyi, baki miku nyuliyi munyajba ngambalanya wuyaliykurri nanaba kingkarri. Barriwa.

¹²Nanda jangkurr nangangi Kudkanyi duja barri. Nanda jangkurr ngiruka marda. Nanda jangkurr barrinani jankunbijinyi jala wadankurru langkiya wilina baki kulaya. Jala ngarrkadaba yingka nganinyiwanyi nananjudinyi jankunbijinyiyudinyi, baki ngankijbangka jankunbijinyi juju kalawuyngkurru nangandu mankanyina. Baki nani barri nanda jangkurr nangangi Kudkanyi, barrinani nanda wadankurru jankunbijinyi. Jala ngambala manku nangangi jangkurr, baki miku ngambaliyi yurlwa nanankanyi jangkurranyi. Nangangi jangkurr ngankijbangka ngambalandu kalawuyngkurru kurduluna. Nangangi jangkurr ngiruka yabimbikanyi ngambalanya jungunkanyi yurlurrmba nangangi Kudkanyi. Nangangi jangkurr ngiruka yabimbikanyi ngambalanya, ngambalaka yanybikanyi muwa. Nangangi jangkurr ngiruka yabimbikanyi ngambalanya, ngambalaka mankumankunkanyi nanankanyi, jala ngambala nulijba yabimbikanyi yaji. Ngambalaka mankumankunkanyi, jaliyi nanda kunyba yaji, jaliyi nanda balki yaji. Nani barri nanda jangkurr nangangi Kudkanyi barrinani nanda jankunbijinyi jala wadankurru langkiya wilina baki kulaya.

¹³Miku nangkiyi ngadijba nganinyi nanganbunanyi Kudnanyi. Baki miku nyuliyi ngadijba nangangi yaji nanganbunanyi. Najbangka bukamba yaji Kudwanyi. Jingkijbangka nyulu bukamba yaji. Nyulu jingkijbangka nanda jala ngambala yabimba. Nyulu jingkijbangka nanda jala ngambalaka mankumanku marda. Baki baku barri jalija nyulu bukamba yaji, baki janyulu karrinjarrijba bukambiju ngambalanya walu nangandu Kudwanyi. Barriwa.

¹⁴Nanamukunyi Jumukunyi yalili yarrijba walkurra mambuka yalunginkanyi jurjkanyi. Ngala Jisus Krayis nyulu walkurra mambuka ngambalangi Krisjinmukuyngka. Nyulu walkurra mambuka jurjkanyi ngambalangi barri. Nyulu barrinani nanda walkurra mambuka jurjkanyi yalungi Jumukuyngka, ngala miku nyulimi jungku nayiba wayka jambana. Miku nyulimi walkurra mambuka jurjkanyi nayiba jambana. Miku barri. Ngala nyulu jungkuka kingkarri barri. Nyulu jungkuka kingkarri nangandu Kudnyina. Nanda mambuka jurjkanyi, nyulu walkurra nganinyi, ngala Jisus Krayis barri, nyulu mili walkurra nangangi. Nyulu mili walkurra nangangi, nyulungangi jandanyi nangangi Kudkanyi, baki nyulu jungkuka kingkarri nangandu barri. Baki nanankardi barri marda ngambalimi miku mamanumba nanda jangkurr nangangi Jisus Krayiskanyi. Marda ngambalimi kudanyu marrimba nangangi jangkurr yurrngumba barri. Ngambalaka nijarrijbangka Krisjinmuku, baki nanankardi barri marda ngambalimi kudanyu durrijba nangangi jangkurr. Marda ngambalimi yabimba nanda kunyba yaji, jali milidimba ngambalanya Jisus Krayiswanyi.

¹⁵Wabula barri jali jungku Jisus Krayis wayka jambana, baki balanjayi Jisus Krayis Sayidinwanyi. Balanja nyuli Jisus Krayis, barrinani nyulu balanjaka ngambalanya nanijba barri. Balanja nyuli Jisus Krayis. Nulijba nyuli nangangi Jisus Krayiskanyi, nyulu yabimbikanyi balki yaji, ngala miku nyuliyanyi yabimba balki yaji Jisus Krayiswanyi. Miku nyuliyanyi durrijba jangkurr nangangi Sayidinkanyi, ngala nyuli jungku kunyba nangangi Kudkanyi yurrngumba barri. Baki nanankardi barri nyulu jingkijbangka ngambalanya, balanjaka ngambalanya marda Sayidinwanyi. Nyulu jingkijbangka ngambalanya, nulijbangka Sayidin ngambalangi, ngambala yabimbikanyi balki yaji. Nani barri nyulu jingkijbangka ngambalanya Jisus Krayiswanyi, miku ngambaliyi jungku ngiruka nangangi yurrngumba barri, baki ngindu nangka muwa ngambalangi. Baki nani barri nyulu nanda walkurra mambuka jurjkanyi ngambalangi. Nanda walkurra mambuka yalunginkanyi jurjkanyi Jumukuyngka, nyulu kandimbayi yalunya jali yalu kuyu barnyi nangandurri, nangangi Kudkanyi. Baki nani barri nyulu kandimbaka ngambalanya Jisus Krayiswanyi. Nyulu kandimbaka ngambalanya, jala ngambalanya balanjaka Sayidinwanyi. Ngala nyulu mili walkurra nanankanyi mambukanyi yalunginkanyi jurjkanyi Jumukuyngka. Jungkuyi nanda walkurra mambuka jurjkanyi wayka jambana, ngala nyulu jungkuka kingkarri nangandu Kudnyina nanda walkurra mambuka jurjkanyi ngambalangi barri.

¹⁶Nanankardi barri marda ngambalimi miku marrala yanybikanyi mududu nangangi Kudkanyi. Ngala marda ngambalimi yanyba mududu nangangi. Marda ngambalimi ngajaka Kud, nyulu yabimbikanyi ngambalanya ngiruka, jala balanjaka ngambalanya Sayidinwanyi. Marda ngambalimi ngajaka Kud, nyulu yabimbikanyi ngambalanya ngiruka, mikungangi ngambaliyi ngiruka, barrinani nyulu jungkuka ngiruka Jisus Krayis. Miku ngambalimi ngiruka yabimbikanyi ngawamba kunyba yaji yurrngumba, barrinani nyulu yabimbayi kunyba yaji yurrngumba Jisus Krayiswanyi. Nani barri marda ngambalimi miku marrala yanybikanyi mududu nangangi Kudkanyi. Nyulu barri kunyba ngambalangi. Jaliyi ngambala ngajaka Kud, baki janyulu yabimba kunyba yaji ngambalangi, janyulu kandimba ngambalanya, jungunkanyi mili ngiruka baki mili ngiruka nangangi yurrngumba barri. Barriwa.