1Wà Pwiduée, âna é mara ina tà tèpa jojoorojè pâ, ée mwa poparà pâ naa na aunao ma pinaanapô na é jèe mara ipwabwàti ba kàra. Â ê auina kêe bèepwiri, âna é jèe nye coo ba kâjè nabàni. Êkaa na jè ipwacôoco, ba é péa pitèi pàra tàpé gée goojè wà Pwiduée, ma ina pâ, rà jèe ipâiti.
2Ba jèe nye picémara tâjè ê popai na wâdé goro ê aunao bèepwiri pwacèwiirà. Êco na wàilà, âna ticè pumara ê popai na rà têre, gée goro na càra caa tòpi goro cèikî.
3Â wàépwiri ê majoroé ma é ina wà Pwiduée pâ: Go putàmu naa goorà. Go ipwataâboro pâ: O càra mwa caa me naa na ére aunao, ére kâra pinaanapô na go jèe pwabwàti! Psaume 95.11 Êco na wàijè na jè cèikî, âna jè o tòpi ê âji nao ma pinaanapô kà Pwiduée, na é jèe nabwé pwabwàti wà Pwiduée, gée na biu. Ba êdiri auniimiri kêe goro pâ wakè na ée mwa pacoo, âna tâbawêe, béaa kâra pai tòpò kêe ê gòropuu.
4Jè pûra mwara naa na jè ére gée goro ê *Tii Pwicîri i pwi ia é pwa wà Pwiduée naa na autapoo goo. Ba jèe wii pâ: É nao wà Pwiduée na bé 7 kâra tòotù, gée na càùru ê pâ wakè na é pwa. Wàépwiri pwi bé 7 kâra tòotù kâra nadàpàra pwapwicîri.
5Jè wâjué côwâ naa goo i pwi nee tii, na ina pâ: O càra mwa caa me naa na i ére aunao, ére kâra pinaanapô na go jèe pwabwàti! Psaume 95.11
6Na jè pûra pwiri, â jè nye tâmogòori pâ nye pwa ê aunao ma pinaanapô na ia é pwabwàti wà Pwiduée. Jèpwi, âna jè jèe côo pâ, wà tàpé na rà mara tòpi ê popai goo, âna càra caa tò naa na, ba càra caa pitêre dèe.
7Â wàépwiri na é câmuri jè tòotù wà Pwiduée, ba na rà o tòpi ê âji pinaanapô kêe, wà pàra tèpa âboro. Â ê pwi tòotù bèepwiri, âna i pwi tòotù na ia ina naa na i pwi nee tii wâna ê Tii Pwicîri. Ba é ina pâ: Wiàna guwà têre pwâra to kà Pwiduée, na tòotù bèeni, â guwà pitêre dèe! Psaume 95.7–8 Â ê popai bèepwiri, âna wà ukai *Davita, na é pinaigé mee, jèe dau wâme côwâ kâra ê pai pâra kà tèpa jojoorojè naa namaré.
8Êkaa na jè côo pâ ê aunao ma pinaanapô bèepwiri âna càcaa ê napô na ia é poparà pâ naawê wà Iosua. Ba wiàna wàrapwiri, â pwiri câé mwa caa ina côwâ cè jè tòotù wà Pwiduée.
9Â gée goo pwiri, â pwa ê aunao ma pinaanapô ba kâjè tèpa âboro kà Pwiduée. Â, na jè o too naa na, â jè o mwa bàra nao jii ê wakè kâjè. Â jè o ipwacèwii wà Pwiduée, na ia é nao naa na bé 7 tòotù, gée na càùru pai tòpò kêe ê gòropuu.
11Wiàna wàrapwiri, â wâdé na jè ipwadàrapwa ma jè tòpi ê âji pinaanapô kà Pwiduée. Â jè cibwaa pwaduwà kà tèpa jojoorojè, tèpa *Isaraéla na ia rà ipwatàu. Ba wà pwina câé caa pitêre dà Pwiduée, âna é pâiti.
12Ê popai kà Pwiduée, âna dau pwa pàtàmee, ba na é wakè goojè. Ba é pwacèwii ê tàuwa na nye dau éa kaa ê du piére, ba é tapàgà tiagoro pâ aupitòobàra ma tiagoro pâ âraduujè. Ba é gée tiagoro pâ câbawâdé ma auniimiri na tàbinyiri nigée na pwâranümajè. Â é pwa ma pwéelaa goorà ma tèirà.
13Ba nye ticè jè muru, ma âboro, cèna pâri ma é cârü goo wà Pwiduée. Ba wàé na é tòpòrà diri, â é tâmogòori ê âji pai pwa goorà. Â nye wàé kaa na jè o mwa coo araé ma paari têe diri ê pwina jè pwa.
14Go gére ina tàwà pâ wà Iésu, *Pwina naî Pwiduée, âna é pwi a pwa *ârapwaailò maina kâjè, na é jèe too naa *napwéretòotù, ba na é pwi a-ipa popai nabibiu kâjè ma wà Pwiduée. Êkaa na wâdé na jè tà tâjùru ba mwü ê cèikî kâjè naa gooé.
15Câé caa pwi a pwa ârapwaailò na é wâiti jiijè. Ba é tâmogòori bwàti ê pai ticè nii kâjè, â jèe tacaié, naa goro diri ê pwina tacaijè goo. (Êco na wàé, âna câé mu caa pipanuâê, â câé mu caa pwa na èpà.)
16Gée goo kaa pwiri, â o câjè caa piwâ, na jè me na ara Pwiduée, Pwi Ukai, na é naigé mee wà Iésu. Ba jè o mwa tòpi gée gooé ê *pimeaari imudi kêe. Â ée mwa pitu tâjè, wàijè na piticè nii kâjè â ée mwa dau pwa na wâdé tâjè, na pàara kêe.
