Hebreos 4

1

2

3

4

5

6

7

8

9

10

11

12

13

¹Akka Epa Niospa noko yoiyoni iskafakĩ: “Mã ea Ifofaino ẽ mato anã inimamatiro. Akka mã ea Ifofayamakẽ ẽ mato inimamatiroma,” ixõ noko yoiniki. Nãskakẽ keyokõichi nõ Ifofanõkãfe.

²Epa Niospa noko yoia: “Ẽ mato ifipai,” noko fani. Nãskarifakĩ Epa Niospa nõko xinifo yoikĩ iskafani: “Ẽ mato ifipai mato inimamapaixikĩ anã mã fekaxtenõma,” ixõ ato yoini. Ato askafafiaino tsõakai nikasharanima. Kaxpakõi Epa Niospa ato yoini.

³Akka Niospa Moisés shinãmanaino iskafakĩ kirikaki kenekĩ yoini: Ea nikayamaifono ẽ atoki õitifishkikĩ. Nãskakẽ ẽ ato fãsikõi yoia iskafakĩ: “Mã ea nikayamaino ẽ mato mai shara fetsa ano imapakenakama anoax mã isharanõ,” ixõ ato yoini. Akka Epa Niospa keyokõi onifani. Mã keyokõi askafakĩ fetsaxõ teneni. Nãskafakĩri Niospa fichipai afe yorafo isharanõfo anã fekaxteyamanõfo. Iskaratĩari afe yorafo isharamapai afe isharapakexanõfo. Akka nõa nõ Nios chanĩmara faino, Epa Niospa noko ifisharai nõ inimapakexanõfo.

⁴Akka kirikaki Moisés keneni pena tenetiõnoa yoikĩ. Iskafakĩ keneni: Seis nia yonokĩ Epa Niospa keyokõi onifani. Nãskaxõ pena fisti teneni, ixõ keneni.

⁵Askatari anã kirikaki keneni, iskafakĩ yoikĩ: Efe isharapakenakafoma, ixõ kirikaki kenekĩ yoini.

⁶Askafiano ranãri afe isharapakenakafo. Akka nã Niospa meka nikakaspaifo afe ipanakafoma.

⁷Nãskakẽ Niospa shinãmanainori chipo David kirika kenekĩ yoini iskafakĩ: Iskaratĩa Niospa meka nikakĩ mãto shinãmã shinãsharakãfe. Anorima shinãkakima, ixõ David yoini.

⁸Mã Moisés naano, Josué israelifo iyoni Canaán mai ano isharanõfo. Nãskaifono Niospa iskafakĩ yoini: “Nã ea Ifofaafo efe nai mẽra isharapakenakafo,” ixõ yoini.

⁹Nãskakẽ mã nõ tãpia nõ Ifofaax, nõ afe isharapakenaka. Epa Niospa afe yorafo inimamasharapai isharapakexanõfo.

¹⁰Epa Niospa keyokõi onifaxõ inimayanã teneni. Nãskarifiai nõ Epa Nios ano kaax a nõ iyopaoni keskara nõ anã itiroma, Niospa noko inimamasharakõiaino.

¹¹Akka fekaxfiano nõ Nios Ifofakõitiro afe isharapakexakĩ. Akka nõko xinifãfe nikayamaito Epa Niospa ato mai shara inãpaifikĩ ato inãnima. Nãskakẽ nõri ato keskara ipaima.

¹²Epa Nios nipanaka. Nãskarifiai ãfe meka keyonakama, mitsisipakõi. Akka keno ikikõichi nami potexõ ãfe xaki mẽra nõ õitiro. Nãskarifiai Epa Niospa meka fãsi finakõia. Ãfe meka shara nõ mẽra ikano aõxõ nõ tãpitiro nõ shara ikamãki askayamai nõ chakamãki.

¹³Epa Niospa keyokõi tãpia nõ õtatiroma. A nõ afara shinãxõ nõ amis keskara keyokõi tãpikõia. Akka nõri tãpia a nõ amis keskara. Nãskakẽ nõ Nios pãratiroma.

¹⁴Akka Jesúsfi Niospa Fakekĩ. Askatari noko Nios kĩfixomis. Nãatofi a Nios ato kĩfixomisfo finõkõiaki. Nãskax nai mẽra Nios ano kani. Nãskakẽ nõ kachikiri fatiroma nikakõisharayanã.

¹⁵Nãatori meemis a Satanás noko afara chakafamapaiyai keskara. Nãskakẽ nãato tãpia a nõ meemis keskara fekaxkõi. Akka Satanás Jesúsri afara chakafamapaini. Nãskafekẽ Jesús nikanima. Nãskakẽ nokori axotiro.

¹⁶Nãskakẽ nõ Nioski ranokima nã nõ yoipaiyai keskara nõ yoitiro. Nõ yoiaito Niospa noko noikĩ noko afara axosharatiro.