Hebiraio 4

1

2

3

4

5

6

7

8

9

10

11

12

13

¹Jujumana hae mâreŋ‐ticnao raʒinaŋte mukicne, biŋedâŋ i mi hetâtieme omaewec, irec ŋoŋeraonec moczi hatao sifuckezacte mezac‐nâpozejec.

²Biŋe biaŋ dâŋ jaŋe jazakicne sâc ijaha nâŋâc nâzâkicne. Jaŋe ine dâŋ i manarâ maŋjeŋicko mi râepie hurâ fowecte jaŋerao fârimâc ewec.

³Nâŋâc miti mana ʒakieeŋgopeneŋzi jujumana hae mâreŋko raʒieŋgopeneŋ. E ʒiŋuc muwec: “No kimbeŋ qajarehuc mumupaŋ dâŋ ʒiŋuc mupo: Jaŋe nore jujumana hae mâreŋko moc mi raʒinʒepieŋ”, i mâreŋ hobeteŋne râehuc wiac sasawa bafârerâ sifu iŋuc muwec.

⁴Irec ʒoaŋ namba 7 irec dâŋ moc ʒiŋuc muwec: “Anutu e wiac sasawa bafârereâ ʒoaŋ 7 ira jumanawec.”

⁵Ehame faic honembeneŋ ine ʒiŋuc muwec: “Jaŋe nore jujumana hae mâreŋko moc mi raʒinʒepieŋ.”

⁶Eme ʒi ŋic gâcnezi jujumana hae mâreŋko raraʒinere hata fokac jaha, â mârâc raraʒire biŋe biaŋ jazakicne jaŋe qikiŋnehuc mi raʒimbiŋ;

⁷irec “miŋecgac” ʒâfo i mocwâc bahuc ʒâhec Dawidire micko dâŋ mupac i râeme ʒiŋuc muwec: “Ŋoŋe miŋecgac dâŋticne manaŋgopieŋko maŋbâzic mi junʒepieŋ.”

⁸Josuazi jujumana hae mâreŋ fârine bâfua‐jareme muzac, Anutuzi ʒâhec dameŋ mocte mi muzac.

⁹Irec ʒiŋuc mananʒepeneŋ: Anuture ŋicfâc jaŋere jujumana hombaŋ moc fokac.

¹⁰Anutuzi gie batararâ jumanawec, iŋuc jaha ŋic moc Anuture jujumanao raʒiocmuzi gie‐ticne hetararâ jumanaocmu.

¹¹Eme nâŋâcnaonec moczi docke sâqorec erâ ŋic mârâc qaqatara hata âtembiŋ ijaha âtezacte jujumana hae mâreŋko raʒinaŋte ʒoɋac enʒepeneŋ.

¹²Anuture dâŋ i jujuhec â tâpirihec, erâ sâqe moc bune râpene micnehec irec sâc jâuruhuc mictara jâmbâŋ. Izi nâhuku qâqâtâc â maŋ, bibiric â siec wamboŋ ʒuʒuhuc‐jeŋic nâtâcneekac, ehuc maŋte mamanasu â mamana wosâc irec fuŋne bataniŋkeekac.

¹³Eme wiac bâfuakicne moczi moc Anuture maio soŋsoŋ mi foekac, erao wiac sasawa tâtâc â foŋ tâmiric foekac. Erao hâcne dâŋgie banaŋmu.

¹⁴Taha bapa sâko hahaŋnehec moc junârekac, e sambâŋ fotâcne‐fârerâ fewec jukac, Jesu Anuture Ŋokâ hâcne, eme iŋucne junârekacte ʒâŋe‐ticne murâ rereŋ enʒepeneŋ.

¹⁵Erâ taha bapa sâko‐nâŋec e dodocne enâreme hone qâoma mi enâreekac, nâŋâcnao eesâic fuaekac iŋuc jaha wâc erao eesâic fuŋne fuŋne fuawec, eesâicko dodocke mocjaha ine mi ewec.

¹⁶Irec nâŋâc aki anonoc ŋeŋe rowaŋnao maŋafec jaha fisihuc junʒepeneŋ, eme wiac izi me izi maic maic‐nâpoha eki buuruc enârehuc aki anonoc‐ticnere erâ bafic‐nâpozejec.