Hebreos 13

1

2

3

4

5

6

7

8

9

10

11

12

13

¹Mãfi Cristo afe yorafokĩ. Nãskakẽ mã ranã nõinãi xateyamakãfe.

²Yora fetsafori mai fetsa ariax oaito mãto pexe anoxõ ifisharakãfe. Nãskakẽri tãpixoma fetsafãfe yorayama fiano ãjirifo fiano ifimisfo.

³Nã karaxa mẽra ikafori ato shinãkãfe. Nãskaxõ ato õiti inimamasharakãfe. Askatari ato axosharakãfe. Nã mã ato fe karaxa mẽra ika keskara shinãkõikãfe.

⁴Feronãfakefo, mãto ãfifo fe nõinãsharakãfe. Nãskax isharakãfe. Askatari mãto ãfima fe ipaiyamakãfe, mãto ãfi fisti fe ikãfe. Kẽrofori mãto fenema fe ipaiyamakãfe, mãto fene fisti fe ikãfe. Akka nã ãto ãfima fe ikaifono, kẽrofori ãto fenema fe ikaifono, nãskarafo Niospa ato omiskõimaxii.

⁵Akka kori ichapa noiyamakãfe. Askatamaroko inimakãfe afe tii mã ayamakĩ. Epa Niospa yoinikĩ iskafakĩ: “Ẽkai mato makinoax paxkanakama. Askatari ẽ mato potanakama. Nãskakẽ a mã yopai ẽ mato inãxii,” ixõ yoini.

⁶Nãskakẽ chanĩmakõi nõ yoitiro iskafakĩ: Afara afeskara afiaito ẽfe Ifãfe ea axomis. Nãskakẽ ẽ rateima, Epa Niospamãi ea kexesharaino yorafãfe ea afeskafanõfoma, ixõ nõ yoitiro.

⁷Niospa meka yoimisfãfe mato yoinifo keskara atoõnoa shinãfafãikãfe. Nãfãfe mato shara famisfo. Nãskakaxõ nõko Ifo Jesús chanĩmara famisfo. Nãskakẽ ato keskara ikãfe nõ Jesús Ifofasharakõinõ.

⁸Akka Jesucristo nã ipaoni keskara ĩpanaka. Anãkai iskaratĩa fetsatiroma.

⁹Akka fetsafãfe mato anorima yoipaikani, a tsõa nikamisma keskara. Nãskakẽ ato nikayamakãfe mato iskafakĩ yoipai ani kiki: “Nõko xinifãfe noko yoinifo keskara nõ nami fetsa piaino nõko shinã mẽra noko shinãmasharatiro,” ixõ mato yoipai ani kiki. Akka a nõ piaitokai nõko shinã mẽra noko shinãmasharatiroma. Askatamaroko Niospa noko noixõ noko imasharatiro a keskara shara nõ inõ.

¹⁰Nãskakẽ nõ chanĩmara famis Jesucristo ifi cruz ikakinoax noko nãxoni nõko chaka noko soaxoxiki. Akka Jesucristo chanĩmara fatama nã Moisés ato yoini keskara fisti chanĩmara famisfo. Nãskakẽ afãfekai ato chaka soaxotirofoma.

¹¹Akka nã Moisés ato yoini keskai a ato Nios kĩfixomis xanĩfo fisti, ares fisti pexe kene fetsa mẽra ikipaoni, nã mẽra yoinã ina imiya ikikẽ õikĩ Epa Niospa ato chaka soaxonõ. Akka nã yoinãfãfe ato kaya pexe rasi pasotaixõ koofapaonifo.

¹²Nãskarifiai Jesús Jerusalén pasotainoax noko omiskõixokĩ ãfe imi foax noko nãxoni nõko chaka noko soaxoxiki a keskara shara nõ inõ.

¹³Akka nõri Jesús ipaoni keskara inõkãfe a nõ ipaoni keskara anã ixikima. Nãskaxõ ãfe kaifãfe potanifo keskafakĩ nokori nofe yorafãfe potatirofo. Nãskakaxõ Jesús ĩchaketsanifo keskafakĩ nokori aõxõ ĩchatirofo. Akka Jesúsnoa chaka shinãmisfo keskafakĩ nokori aõxõ chakafatirofo.

¹⁴Nono mai anoax nõ omiskõifikĩ nõ shinãchakaima, mã nõmãi tãpiax nono mai ano nõ ipanakama. Askatari mã nõ tãpia a Nios ika ari nokoax nõ afe ipanaka. Nãskakẽ nã nõ manasharamis.

¹⁵Jesús noko nãxonioxõ nõ Epa Nios aicho fai. Akka nõ yoikĩ iskafatiro: “Aicho Epa Niosi, mĩ Fake Jesús ẽfe Ifokõi. Aõxõ ẽ mia aicho fai,” ixõ nõ yoitiro.

¹⁶Askatari ato shinãmakiyamakãfe mã afarayaxõ a afaamaisfo ato inãsharakãfe. Mã ato askafaito õikĩ Nios matoki inimasharakõi kiki.

¹⁷Akka nã ichanãti pexe anoxõ Niospa meka mato yoimisfo ato nikasharakõifafãikãfe. Nãskax nã mato yoiaifo keskakõikãfe. Nãfãfe mato kexesharamisfo mã Jesús nikasharanõ. Akka nãfãferi tãpiafo Nios ari nokoaifãfe ato yõkaxii iskafakĩ: “¿Mã ẽfe meka mã ato tãpimasharamismẽ?” ixõ ato yõkaxii. Nãskakẽ ato nikasharakãfe inimakõinõfo. Akka mã ato nikayamaino inimatirofoma, shinãchakatirofo. Nãskaxõ mato axosharatiroma.

¹⁸Nokori Epa Nios kĩfixokãfe. Epa Niospa noko amapaiyai keskara mã nõ apaimiski. Nãskaxõ nõko shinã mẽraxõ nõ afaa chaka shinãima. Nõ isharapaikõi.

¹⁹Eari Nios kĩfixokãfe matoki ea samama nĩchinõ ẽ anã mato fe inõ.

²⁰Epa Niospa noko inimamakõimis nõ afaa shinãchakanõma. Nõko Ifo Jesús mã nokoõnoax nafiakẽ Apa Niospa otofani Jesús keyokõi finõax noko kexemis inõ. Jesús noko nãxoniõnoax Epa Nios fe nõ afe yora ipanaka. Nãskakẽ mã afara shara yopaito Epa Niospa mato inãtiro a mato apaiyai keskara shara mã anõ. Ãfe Fake Jesucristoõxõ nõko shinã mẽra noko shinãmasharax nokoki inimakõixii. Nãskakẽ keyokõichi Jesúsnoa nõ yoisharapakenaka. Nãskara sharakõi ĩpanaka.

²²Efe yora mĩshtichi, nã ẽ mato ichapama yoia keskara nikasharakãfe fena fenakãkima. Nã ẽ mato kenexona keskai mãto shinã mẽra mato shinãmasharaxii kiki.

²³Ẽ mato yoipai mã nofe yorashta Timoteo iskaratĩa karaxa mẽranoax mã tsekea. Akka samamashta ekeki oano ẽ afe kai mato ari.

²⁴Keyokõi ichanãkaxõ a mato Niospa meka yoixomisfo yafi a mato kexemisfori nõ ato yoisharai. Akka nono Italia anoxori nã Nios Ifofaafãferi mato yoisharakani.

²⁵Epa Niospa keyokõi mato noikĩ mato shara faxõfafãinõ. Nã tii.