GWAY GI IDAWUU’D 62:7-12

⁷Eya Arumgimis mo tani mom pem jin sika/ is gom mony’cuḵ mo dhali montaḵ mo tani ’kon e a’dim pem jin ta wosh jin eḵa/ eḵ mo, dhali a’dim pem jin hurga/ jwa mo tani a’di ita’da Arumgimis mo be.

⁸Gami gwo is e a’di ka tee i’baar mo, ayy ’kwani. Woli adum bum ibwambori a’di mo. Haali/ Arumgimis ta a’di jin mina ana hur jwa icine/ mo. Doshi ma dhali ’cunycuri yan mo.

⁹’Kwani kun hatha moŋ’ko ’ko’d ki ha’th mo tani hili ’kon jasi ari’ceenne/ mo. ’Kwani kun ’kon e mo jin kap̱a ’penkap̱an mo tani suskunu this e mo eya dum buni mo. Dhali mombar buni ’deke’thki’d isi mis mo. Uni tawasha tawash mo mmobola wulp̱e/ e mo.

¹⁰Dhalku/ ki dhu mo jin wunu awuny jwa i is e mo jin dilu to mo. Dhalku/ ki dhu mo ma ’te/ ma kap̱em bum ki p̱e’th e mo jin ḵwalu to mo. Waḵki/ mo jin tanu pa ki pa mar is mo tani dhalku/ ki dhu adum bum ’ko’di uni mo.

¹¹Me’d ’de/ Arumgimis oki gwo mo. Me’di su/ mo tani aha/ ciḵkina gwo yansan mo ki mom’bi’th ta jima Arumgimis mo

¹²dhali e /e mo tani ayy Tap̱a, mo/en jin ṯelu sho’k mo cila /e mo. Haali/ /e ki raḵ wathi/ to ibway mo isi ki miin to jin miina a’di mo be.