SALMOS 62:7-12

⁷San Toteco Dios hueli nechmaquixtis huan sampa nechhueyitlalis iniixpa sequinoc. Yajaya nechtlatía huan nechfuerzajmaca. Nechmocuitlahuía para ma ax nechajsi tlen fiero.

⁸¡Innotlacajhua, nochipa ximotemachica ipan Toteco Dios! Xijpohuilica nochi tlen eltoc ipan imoyolo, pampa san yajaya hueli techmocuitlahuis ica tlen ax cuali.

⁹Ax tleno nelía ininpati tlacame iixpa Toteco, yonque tlen tominpiyaj o tlen teicneltzitzi. Intla se quintlalisquía ipan balanza para quinyejyecosquía intla etique queja se tlamantli tlen tlahuel ipati, momacas cuenta para melahuac ax etique pampa tlacame itztoque san queja ajacatl.

¹⁰Tlacame, amo ximoilhuica para intlatehuise para inquitlanise más tomi. Amo ximoilhuica para intlaxtequise para inmoricojchihuase. Huan intla inmochihuase rico, amo ximohueyimatica, niyon amo ximotemachica ipan imotomi.

¹¹Nijmati ya ni, pampa miyac hueltas Toteco Dios nechilhuijtoc: san yajaya quipiya nochi chicahualistli.

¹²San ta, Toteco, titeicnelía mojmostla. Huan tiquintlaxtlahuía sesen tlacatl queja quinamiqui ica tlen quichijtoque.