GWAY GI IDAWUU’D 26:2-11

²Nyo/i aha/ mo ma, ayy Tap̱a dhali pali aha/ mo. ’Cunycuri adum pem mo dhali bwam pem mo.

³Haali/ mo/en pini iṯeli sho’k ibwambori em pem mo. Dhali aha/ yana e ya ma isiŋ gana/ e /e mo.

⁴Aha/ dinaki nyaḵ c̱a’b ki ’kwani kun ta imanṯor gwonthus mo, walla aha/ dinaki ce e ki ’kwani kun ḵal mii ka bor mo.

⁵Aha/ shi/a mo jin cenu e ki imanmii tonthusi e mo, dhali aha/ mina diki nyaḵ c̱a’b ki a’di jin ta thus ki thus mo.

⁶Aha/ mina ’thur me’d pem mo gom aha/ dina ka p̱o/ mo, dhali ya mo e mo ma gwaṯam pini jin ’ciṯẖu/ to ’kus mo, ayy Tap̱a,

⁷mmoyuḵ gway ki ’kall ’kall mo, gway jin ’boruwa ’bor bwa i is mo, dhali mmoṯora ris miiny jarom pini kun miina /e mo.

⁸Ayy Tap̱a, aha/ ena mo kun ’konu e gu’b pini mo, dhali e mo jin dina monycam pini mo.

⁹Dhalku/ ki tor aha/ sho’k ka pupush nyaḵki imanmii miinthus mo, walla mondiki/em pem nyaḵki ’kwani kun ’kosha ṯe/ ma nyor mmowol ’kwani abasa ’cesh mo,

¹⁰’kwani uni gun nyo/a me’d ki nyo/ gom tonthus kun p̱ishinkina uni ki mii mo dhali me’da bim poros buni uni ’tu’dkunu ki mowan ’kwani is mo.

¹¹Hili gom aha/ mo tani aha/ yana ki yam pem ki ya jin dar ki ŋadhum mo. Wani aha/ ’ba/ mo dhali miiyi mii ma ’the e aha/ mo.