Ester 7

1

2

3

4

5

6

7

8

9

10

¹Entonces e rey y e Amán ixiobꞌ tama e wiar lo que ustabꞌir umen e reina Ester.

²Y tama e wiar era, cay ojron e rey taca e Ester y che: —Cꞌajtin lo que acꞌani y nen cꞌani inwajqꞌuet, motor que iꞌxin acꞌajti mitad tama tunor lo que ayan tacaren, che e rey.

³Entonces ojron e Ester y che: —Pues jay war itzay awiren, niwinquiret, y jay aquetpa imbꞌutz toit tunor lo que cꞌani inwaret, cꞌani incꞌajti tacaret que iꞌxin acorpesen tuaꞌ machi inchamesna y que acorpes ucuxtarobꞌ nichinam ubꞌan.

⁴Pues nen y tunor nichinam xeꞌ turobꞌ tama nichꞌajnarir war caquetpa bꞌan cocha cora aracꞌobꞌ xeꞌ chombꞌiron tuaꞌ cachamesna y tuaꞌ casajta inyajrer. Pues jay chojnon ani tuaꞌ taca caquetpa cora man xeꞌ mambꞌir inyajrer, nen matucꞌa ani inwaret, y nien machi ani aquetpa tuaꞌ inyopa toit tuaꞌ incꞌajti atacarsiaj tama tunor era, che e Ester.

⁵Entonces e rey Asuero uyubꞌi tuaꞌ e Ester y che: —Y ¿chi canic uyacta oꞌchoy e bꞌijnusiaj tuaꞌ uche inteꞌ nuxi mabꞌambꞌanir cocha era tama uyalma, y que nienix abꞌacta? Y ¿tiaꞌ turu? che e rey.

⁶Entonces ojron e Ester y che: —Pues xeꞌ war ixto aqꞌuijna uwiron yaꞌ jax e tzuc Amán era, che e Ester. Y tama e momento era e Amán cay chincha meyra umen e bꞌajcꞌut tiaꞌ turu tut e rey y tut e reina Ester.

⁷Entonces qꞌuijna meyra e rey, y achpa wacchetaca y locꞌoy tama e otot, y ixin patir tiaꞌ ayan cora teꞌ tor e tinaj. Y e Amán cꞌotoy unata wacchetaca que e rey war ubꞌijnu tuaꞌ uyare achamesna, y tamar era jaxir quetpa macu tiaꞌ turu e Ester tuaꞌ ucꞌajti tacar tuaꞌ machi achamesna.

⁸Y conda sutpa tari e rey tiaꞌ turu patir y ochoy tama e otot otronyajr tiaꞌ war uchiobꞌ e wiar, uwira que e Amán cotor tuyejtzꞌer e sillón tiaꞌ chꞌar e Ester. Entonces ojron e rey y che: —¿O warto ca abꞌijnu tuaꞌ ache forzar e reina conda turuto tama niotot? che e rey. Y conda cꞌapa ojron e rey cocha era, uyare umanobꞌ tuaꞌ uqꞌuechiobꞌ axin e Amán. Y wacchetaca jaxirobꞌ ujuriobꞌ inteꞌ saco tujor y uqꞌuechiobꞌ locꞌoy.

⁹Y entonces ojron e Harboná xeꞌ jax inteꞌ tujam umanobꞌ e rey y che: —Pues tuyejtzꞌer uyotot e Amán ustabꞌir inteꞌ nuxi teꞌ xeꞌ ucojco veintidós metro tama uwatar xeꞌ war ucꞌani tuaꞌ achꞌubꞌna e Mardoqueo tamar. Y e Mardoqueo jax xeꞌ cay ucorpes acuxtar tama inyajr, che e Harboná. Entonces ojron e rey y che: —Chꞌubꞌanic e Amán tamar, che e rey.

¹⁰Pues bꞌan cocha era cꞌotoy chamesna e Amán conda chꞌubꞌna tamar taca e teꞌ xeꞌ uyare tuaꞌ oꞌstana tuaꞌ ani achꞌubꞌna e Mardoqueo tamar. Y bꞌan cocha era sisa uqꞌuijnar e rey.