1Ŋicwofuŋte mumutâc â sâcmutâc i mosa namba 12, ʒâŋene Adari irec ʒoaŋ gie bapa 13 ira fârinehec eocte mukicne. Erâ ine Judaŋic râsifâc‐jeŋic jaŋe Judaŋic bawahac‐jopahuc jopa qâʒâic ejareniŋte mukicne ʒoaŋ ira hâcne Judaŋic jaŋe râsifâc‐jeŋic bawahac‐jopahuc jopa qâʒâic ejareniŋte mana‐jarekicne.
2Irec Judaŋic jaŋe ʒoaŋ ira hâcne ŋicwofuŋ Ahasiwero ere mâreŋ dâkâne dâkâne forawec ira hae‐jeŋic sâc tumaŋnehuc râsifâc‐jeŋic jumbiŋ ŋic i jaŋe hâcne bâsirowec‐jopambiŋ. Iŋuc epie ŋic jaŋe hâwic‐jopame moczi moc mi sanaŋkembiŋ.
3Ehame mâreŋ dâkâne dâkâne irec ŋic fekicne erâ mâreŋ soŋaŋ â guriŋ bapa erâ ŋicwofuŋ kiafâc‐ticne jaŋe Morodekai ere boc hâwic‐jopame Judaŋic bafic‐jopambiŋ.
4Morodekai e ŋicwofuŋte ficko ŋic tâpiri sâkohec juwecte ere boc manapie feme ʒâŋe biŋe‐ticne mâreŋ dâkâne dâkâne haŋ bawec.
5Iŋuc fuame Judaŋic jaŋe râsifâc‐jeŋic ʒikazi jopa qâhâmoc ejarehuc, juwicnao qaisoc‐jopambiŋ ŋic i jaŋe kosa qa imac ejarembiŋ hâcne.
6Ehuc Susa hae qizecko ine ŋic 500 jopa miziembiŋ.
7Erâ Hamedatare ŋokâ, Judaŋic jaŋere râsi qizec Hamaŋ hâcne, ere ŋokâfâc 10 kecʒiŋuc jaŋe wâc qâhâmoc‐jopambiŋ: Parasandata, Dalafoŋ, Asipata, Porata, Adalia, Aridata, Pamasita, Arisai, Aridai erâ Wajeʒata. Judaŋic jaŋe iŋuc ehuc râsifâc‐jeŋic jaŋere mafa wiac ine sifu ro rauc mi embiŋ.
11Eme Susa hae qizecko ŋic qâhâmoc‐jopakicne jaŋere ʒare i ʒoaŋ ijaha ŋicwofuŋ mufuacnembiŋ.
12Iŋuc epie ŋicwofuŋzi ŋokac wofuŋ Esite kecʒiŋuc âzâcnewec: “Judaŋic jaŋe Susa hae qizecko ŋic 500 jopahuc Hamaŋ ŋokâfâc‐ticne 10 mâmâc qâhâmoc‐jopambiŋ. Jaŋe ʒira iŋuc ehuc ine nore mâreŋ dâkâne dâkâne forakac ira weniŋuc embiŋ? Erâ sifu go wiac irec me irec numu‐naretec mana‐garepemu.”
13Iŋuc mume Esitezi muwec: “Ŋicwofuŋ, go manatec sâckekacko ine Susa haeo Judaŋic juŋgopieŋ jaŋe mana‐jaretec ʒoaŋ ʒirec sâcmutâc fokac irec sâc jaha tomâcko wiac enʒepieŋ. Ehuc wâc mana‐jaretec Hamaŋ ŋokâfâc‐ticne 10 bituac‐jopanʒepieŋ.”
14Âzâcneme ŋicwofuŋzi iŋuc hâcne fuaocte mutâcnewec, ehame Hamaŋ ŋokâfâcne 10 bituac‐jopambiŋ.
15Eme Judaŋic jaŋe mosa Adari irec ʒoaŋ gie bapa 14 ira Susa haeo tumaŋnehuc ŋic 300 mocwâc qâhâmoc‐jopambiŋ. Ehuc sifu mafa wiac‐jeŋic ine ro rauc moc mi embiŋ.
16Judaŋic gâcne ŋicwofuŋte mâreŋ dâkâne dâkâne forawec ira jumbiŋ jaŋe iŋuc jaha juju‐jeŋic ŋezickeniŋte tumaŋnembiŋ, ehuc qaisoc‐jopambiŋ ŋic i jaŋe okacne bazu‐jarehuc ŋic 75 tauseŋ qâhâmoc‐jopambiŋ, mafa wiac‐jeŋic ine sifu ro rauc moc mi embiŋ.
17Wiac i mosa Adari irec ʒoaŋ gie bapa 13 ira ekicne; ʒoaŋ gie bapa 14 ira ine ŋemanarâ tiwâ bâzi nâhuc ʒeri bari embiŋ.
18Judaŋic Susa haeo jumbiŋ jaŋe ine ʒoaŋ gie bapa 13 â 14 ira mâmâc qâturerâ ʒika gie bambiŋ. Erâ ʒoaŋ 15 ira ine ŋemanarâ tiwâ bâzi nâhuc ʒeri bari embiŋ.
19Eme irec hâcne Judaŋic hae pitic sâc ʒoricko juraŋgopieŋ jaŋe mosa Adari irec ʒoaŋ gie bapa 14 ira hombaŋ ŋerâ tiwâ bâzi nâ nareŋ gareŋ ehuc ʒeri bari eeŋgopieŋ.
20Eme Morodekai e wiac fua‐fârewec irec dâŋ qâreŋke‐fârewec. Ehuc ŋicwofuŋ Ahasiwero ere mâreŋ dâkâne dâkâne bembeŋko me ʒoricko forawec ira Judaŋic jumbiŋ jaŋerao papia râeme rafârewec.
21E iŋuc ehuc Judaŋic jaŋe jarane jarane mosa Adari irec ʒoaŋ gie bapa 14 â 15 ira hombaŋ ŋeniŋte mupaŋke‐jarewec.
22Jaŋe mosa â ʒoaŋ gie bapa ira hâcne râsifâc‐jeŋic bawahac‐jopapie ʒâic busâqoc‐jeŋiczi ŋerisieme ʒeri bubiaŋ bâfuambiŋ, erâ ki busâqoc dameŋ‐jeŋic herisierâ hombaŋ dameŋ fua‐jarewec. Irec jaŋe ʒoaŋ ira tiwâ bâzi nâhuc ʒeri bari eniŋte â nânâ wiac biaŋne nâ nareŋ gareŋ ehuc hapetacfâc‐jeŋic wâc jare gumec eniŋte jazawec.
23Judaŋic jaŋe Morodekaizi qâreŋke‐jarewec irec sâcko hombaŋ ŋembiŋ iŋuc jaha ʒuhuckerâ ŋerahuc juniŋte mupaŋkembiŋ.
24Jaŋe Hamedata ŋokâ‐ticne, Judaŋic jaŋere râsi Agagi ŋic Hamaŋ, eki hâcne Judaŋic jopa sipiric ejarehuc bâsirowec‐jopaocte manasurâ ɋâsâi ʒâŋene Puri qawec irec iŋuc embiŋ.
25Esitezi Hamaŋte fuŋne ŋicwofuŋ âzâcneme manarâ dâŋ kecʒiŋuc mutâcnehuc qâreŋkewec: Hamaŋ e Judaŋic wiac repicne ejareocte manasu biric ewec i ŋerisierâ e jahacne faio fezejec, ehame e jahacne â ŋokâfâcne jaŋe mâmâc bibitua wâtuŋko bituac‐jopanʒepieŋ.
26Eme Judaŋic jaŋe irec hâcne ɋâsâi ʒâŋene Puri irec manasuhuc hombaŋ‐jeŋicte ʒâŋe Purim hombaŋ mumbiŋ. Ehuc papiao dâŋ sasawa qâreŋkekicne fowec, erâ wiac sasawa fua‐jareme hone manac embiŋ irec erâ â jaŋe jaŋacne â ɋâricfâc‐jeŋic erâ bâjâpecfâc‐jeŋic jaŋere erâ mâmâc hombaŋ i jarane jarane mumupaŋte sâcko â dameŋ mukicnao ŋeniŋte mupaŋkembiŋ wâc.
28Ehuc mimiŋzi ɋâric fic sâc â hae sâc erâ mâreŋ sâc hombaŋ irec manasuhuc juhapie Judaŋic ŋondeŋ‐jeŋicko Purim hombaŋzi mi sifuckeocte â ɋâricfâc‐jeŋic jaŋe hombaŋ irec wâc manasuhuc juniŋte mâmâc mupaŋkembiŋ.
29Eme ŋokac wofuŋ Esite, Abihaire otâ hâcne, eki Judaŋic Morodekaizi Purim hombaŋte papia namba 2 qâreŋkekicne fowec i basanaŋkeocte manacnehuc qâreŋkewec.
30Ehuc wâc Ahasiwerore uucmaŋko mâreŋ dâkâne dâkâne 127 ira Judaŋic sasawa jurambiŋ jaŋerao wama â dâŋ fâri qizecne fosanaŋkeocte papia râeme rawec.
31I Morodekai â ŋokac wofuŋ Esite jahe mutâcne‐jarepire irec sâcko mecne, erâ jaŋe jaŋacne â ɋâricfâc‐jeŋic jaŋere erâ sowa juju â ki busâqoc eere dameŋ mupaŋkembiŋ irec sâcko mâmâc Purim hombaŋ i dameŋ‐ticnao jaha ŋeniŋte mu bâmoc ejarehuc qâreŋke‐jarewec.
32Ŋokac wofuŋ Esitere sâcmutâc dâŋ izi Purim hombaŋte dâŋ i basanaŋkewec hâcne. Erâ dâŋ i papiao wâc qâreŋkekicne fokac.
