1Eme ʒoaŋ ira ŋicwofuŋ Ahasiwero e Judaŋic jaŋere râsi, Hamaŋ hâcne, ere fic i ŋokac wofuŋ Esite râcne tahac ewec. Ehame Esitezi Morodekaire fuŋne ŋicwofuŋ âzâcneme manarâ Morodekai hefâreme ŋicwofuŋte maio fuawec.
2Eme ŋicwofuŋ e meo fefe‐ticne maqâreŋhec Hamaŋ jâoc rowec i meticnaonec rorâ Morodekai râcnewec. Eme Esitezi ine Hamaŋte fic irec soŋaŋ Morodekai âkendâŋnewec.
3Esite e iŋuc erâ ŋicwofuŋ fodapecnerâ kiohuc Agagi ŋic Hamaŋ e Judaŋic bâsirowec‐jopaocte sâcmutâc dâŋ hehesicne bâfuawec i ŋicwofuŋzi bârârieocte numucnewec.
4Iŋuc eme Ahasiwerozi ŋicwofuŋ gunu‐ticne golzi bakicne i Esiterao sicnewec.
5Eme Esitezi faharerâ ŋicwofuŋte maio domawec. Ehuc kecʒiŋuc âzâcnewec: “O ŋicwofuŋ, go nore manatec biaŋkeha dâŋ mukopac irec wâc manatec sâckeme ine mutec sâcmutâc dâŋ moc qâreŋkerâ râepie rarâ Hamaŋte dâŋ qâsuazejec. Agagi ŋic Hamaŋ e Hamedatare ŋokâzi hâcne ŋicwofuŋ gore mâreŋ dâkâne dâkâne ira Judaŋic juraŋgopieŋ jaŋe bâsirowec‐jopa‐fâreocte dâŋ qâreŋkeme rawec.
6Eme ʒi ŋicfâc‐nane jaŋere faio wiac hâhâwicne fezo ekac i no hone manac erâ weniŋuc epemu, me soctofafâc‐nane bâsirowec‐jopapie no weniŋuc erâ sâcne jupemu?”
7Iŋuc mume ŋicwofuŋ Ahasiwerozi ŋokac wofuŋ Esite â Judaŋic Morodekai ʒiŋuc jasawec: “Manakopirec, Hamaŋ e Judaŋic bâsirowec‐ŋopaocte muwecte mupe bituambiŋ, erâ wâc ficticne i Esite go gare tahac epac.
8Irec ŋohe ŋicwofuŋ nore ʒâŋeo âkehotahuc Judaŋic jaŋere dâŋ iŋuc me iŋuc moc qâreŋkezo murâ qâreŋkezepirec, ehuc nore maqâreŋ râezepirec. Sâcmutâc dâŋ moc i ŋicwofuŋ nore ʒâŋeo âkehotahuc qâreŋkerâ maqâreŋ‐nane râeniŋmu i mocwâc qâsuapie moc rârâene mi eocmu.”
9Ŋicwofuŋ e dâŋ iŋuc mutarame mosa namba 3, ʒâŋene Siwaŋ, irec gie bapa 23 ira qâreŋŋicfâc‐ticne hetumaŋ‐jopambiŋ. Eme jaŋe Morodekaizi mutâcne‐jarewec irec sâc Judaŋic jaŋere erâ sâcmutâc dâŋ moc qâreŋkembiŋ. Ehuc India mâreŋkonec fuŋkerâ raku Etiopia mâreŋko tarakac mâreŋ ŋondeŋ ira mâreŋ dâkâne dâkâne forawec irec soŋaŋ â guriŋ bapa ŋic â ŋic fekicne jaŋerao râepie rawec. Mâreŋ dâkâne dâkâne forawec ine 127. Sâcmutâc dâŋ i ine mâreŋ dâkâne dâkâne ŋic jurambiŋ jaŋere qâreŋ hawario â dâŋmaracko qâreŋkehuc Judaŋic jaŋere qâreŋ hawario â dâŋmaracko wâc mâmâc qâreŋkembiŋ.
10Papia i ŋicwofuŋ Ahasiwero ere ʒâŋeo âkehotahuc qâreŋkerâ ere maqâreŋ mâmâc râembiŋ. Eme sâcmutâc dâŋ irec papia i becâsicko rara kiŋaŋŋic jaŋe gasacke sâqorehuc barambiŋ. Becâsicfâc‐jeŋic jaŋe ŋicwofuŋte becâsicfâc jumbiŋ jaŋeraonec.
11Sâcmutâc papia ira ŋicwofuŋzi Judaŋic jaŋe sanaŋkerâ juju‐jeŋic ŋezickeniŋte mana‐jarewec. Erâ i sawa mâcne, mâreŋ dâkâne moc irec rune jaŋe Judaŋic râsi ejarehuc jopaniŋte fisipie okacne bazu‐jarehuc ŋokac naru motecfâc‐jeŋic jaŋehec bâsirowec‐jopa‐fârehuc mafa wiac‐jeŋic wâc jowac roniŋte mâmâc mana‐jarewec.
12Wiac i ine ŋicwofuŋ Ahasiwero ere mâreŋ dâkâne dâkâne forawec ira mosa namba 12, ʒâŋene Adari, irec gie bapa 13 ira hâcne iŋuc eniŋte mukicne.
13Erâ sâcmutâc dâŋ qâreŋkekicne irec rehacne moc moc mâreŋ dâkâne forawec sâc ira râepie rame ŋic ŋokac wose‐jarepie mananiŋte mukicne. Ehame Judaŋic jaŋe ʒoaŋ ijaha wâc ʒawierâ râsifâc‐jeŋic okacne bazu‐jareniŋte mukicne.
14Dâŋ iŋuc qâreŋke‐fârerâ becâsicko rara kiŋaŋŋic ŋicwofuŋte micte râec‐jopapie rambiŋ. Ehame sâcmutâc dâŋ i Susa hae qizecko ira wâc ŋic ŋokac mâmâc wose‐jarembiŋ.
15Eme Morodekai e ŋicwofuŋ ŋaqi keŋkeŋne â qaŋqaŋ, erâ golzi eri hendiŋ bakicne â ŋaqi sahacne moc qoruc hahameŋne â âmuc âmucne i sasawa heme hume ŋicwofuŋte fickonec wahahame Susa hae qizec irec rune jaŋe ofac hecnehuc ʒeri bari embiŋ.
16Judaŋic jaŋerao wama fuame ʒâŋe biŋehec erâ bubiaŋ manahuc ʒeri embiŋ hâcne.
17Erâ mâreŋ dâkâne dâkâne forawec â hae sâko ŋerawec sâc ira ŋicwofuŋte mumutâc â sâcmutâc fisime Judaŋic jaŋerao ʒeri bubiaŋ fuame hombaŋ ŋehuc tiwâ bâzi nâmbiŋ. Ehame mâreŋ irec ŋic ŋokac bocjaha jaŋe Judaŋic jaŋere hâwic‐jopame ʒiŋuc mumbiŋ: Nâŋe Judaŋic jaha.
