1Eme wiac i tara‐fâreme ŋicwofuŋ Ahasiwero e Agagi ŋic Hamedatare ŋokâ Hamaŋ sâsehuc ŋic fekicne gâcne ehec mâmâc jumbiŋ jaŋere micne âkendâŋnewec.
2Ehame ŋicwofuŋte kiŋaŋŋicfâc sacmotâcko domambiŋ jaŋe sasawa dieŋzi hecnehuc fodapecnembiŋ; i ŋicwofuŋzi iŋuc eniŋte mutâcne‐jarewec hâcne. Morodekaizi ine dieŋzi hecnehuc mi fodapecnewec.
3Iŋuc eme ŋicwofuŋte kiŋaŋŋicfâc sacmotâcko domambiŋ jaŋe ʒiŋuc wiocnembiŋ: “Go wemocte ŋicwofuŋte dâŋ qatarakomec?”
4Eme jaŋe ʒoaŋne ʒoaŋne iŋuc âzâcnepie Morodekaizi mi manawec. Eme ere qaqatara i okac tâmiric foocmu me okacnehec eocme irec fuŋne bataniŋkeniŋte Hamaŋ âzâcnembiŋ. Morodekaizi “No Judaŋic jukopac” iŋuc hâcne jazawec.
5Eme Morodekai e dieŋzi henarehuc mi fodape‐narekac, Hamaŋzi iŋuc honerâ aaricke sâqorewec.
6Erâ ine Morodekai bucticne bâsiroweocte mi manasuwec. Hamaŋ e Morodekaizi Judaŋic jukac, iŋuc âzâcnepie manarâ Morodekai qomâfâc‐ticne â âgo soctofafâc‐ticne Ahasiwerore uucmaŋko jumbiŋ jaŋe sasawa bâsirowec‐jopa‐fâreocte maŋkewec.
7Ahasiwero e ŋicwofuŋ jume jara 12 eha mosa namba 1, mosa Nisaŋ hâcne, ira Hamaŋte maio ɋâsâi ʒâŋene Puru i qambiŋ. Erâ ʒoaŋne ʒoaŋne â mosane mosane qafekupie mosa 12, Adari mosa i hâcne wahawec. Ehame irec ʒoaŋ gie bapa 13 maickeme behembiŋ.
8Behepie Hamaŋzi ŋicwofuŋ Ahasiwero ʒiŋuc âzâcnewec: “Uucmaŋgao mâreŋ dâkâne dâkâne forakac ira ŋic guru fuŋmoc jaŋe siŋsaŋ qarâ juŋgopieŋ jaŋere sâcmutâc dâŋ i ŋicguru gâcne nâŋâcne sâcmutâc fokac irec sâc aricne. Jaŋe ŋicwofuŋ gore sâcmutâc dâŋ mi reŋkeeŋgopieŋ. Iŋuc ehuc juhapie go sifu mana‐jaretec ʒuhuckerâ jupie mi sâckeocmu.
9Irec go manatec sâckeha mumutara dâŋ qâreŋkerâ râetec rame bâsirowec‐jopa‐fârenʒepieŋ. Ehame no siliwa moneŋ teŋ tauseŋ ŋic gore moneŋ mafa wiac soŋaŋkeeŋgopieŋ jaŋere meo râepe jaŋe gore moneŋ katapao behepie huzejec.”
10Iŋuc mume ŋicwofuŋzi meo fefe‐ticne manehec i batararâ Hamedatare ŋokâ Judaŋic jaŋere râsi juwec, Agagi ŋic Hamaŋ hâcne, e râcnewec.
11Ehuc ʒiŋuc âzâcnewec: “Moneŋ i gore biŋe, â ŋic ŋokac keci jaŋe gore biŋe jaha, irec go gahac manakic sâc ejarezemec.”
12Eme mosa wâŋ irec gie bapa 13 ira ŋicwofuŋte qâreŋŋic hetumaŋ‐jopapie jaŋe Hamaŋzi mutâcnewec irec sâcko ŋicwofuŋte mâreŋ soŋaŋ â guriŋ bapafâc‐ticne mâreŋ dâkâne dâkâne jurambiŋ erâ ŋic gurune gurune fekicnefâc‐jeŋic jaŋere sâcmutâc dâŋ moc qâreŋkembiŋ. Ehuc mâreŋ dâkâne dâkâne ŋic jurambiŋ jaŋere qâreŋ hawario â dâŋmaracko qâreŋkembiŋ. Sâcmutâc dâŋ i ŋicwofuŋ Ahasiwerore micte qâreŋkerâ tataranao ere ma hembiŋ.
13Papia i mosa namba 12, ʒâŋene Adari, irec gie bapa 13 ira Judaŋic sasawa, kâcɋene â piticne erâ ŋokac naru motec bâsirowec‐jopa‐fârerâ mafa wiac‐jeŋic fiuckeniŋte kiŋaŋŋic jaŋe ŋicwofuŋte micte mâreŋ dâkâne dâkâne forawec ira picpac jaha barambiŋ.
14Ehame mâreŋ dâkâne sâc irec ŋic ŋokac jaŋe ʒoaŋ dameŋ ira ʒawierâ juniŋte sâcmutâc dâŋte papia irec rehacne moc i hae sâc râepie rafârewec.
15Eme hae qizecko sâcmutâc dâŋ i ŋic ŋokac wose‐jarehapie kiŋaŋŋic jaŋe ŋicwofuŋte micte bâruŋ jaha hae sâc barambiŋ hâcne. Ehame ŋicwofuŋ â Hamaŋ jahe waiŋ opâ nâhuc ŋehapire Susa hae rune jaŋe sâcmutâc dâŋ i manarâ fâfâre sâqorembiŋ.
