1Eme ŋicwofuŋ â Hamaŋ jahe ŋokac wofuŋ Esite ehec tiwâ bâzi nânicte rapic.
2Erâ ʒoaŋ namba 2 ira waiŋ opâ nâhuc ŋicwofuŋzi Esite mocwâc ʒiŋuc muhuc wiocnewec: “O ŋokac wofuŋ Esite, go wemo wiacte numu‐narekomec? Go wiac irec me irec numu‐naretec garepemu. Wemo wiacte mukomec? Go uucmaŋ‐nane ŋifecnere mutec wâc garepemu.”
3Iŋuc mume ŋokac wofuŋ Esitezi dâŋ ʒiŋuc bâtikiecnewec: “O ŋicwofuŋ, go nore manatec sâcke biaŋ ekacko ine nunumu‐nanere erâ no nahac â ŋicfâc‐nane nâŋe akic‐nâpozemec.
4Nâŋe sipiric‐nâporâ qâhâmoc‐nâpohuc bâsirowec‐nâponiŋte furi bacnâpokicne hâcne. Nâŋe moneŋzi furi bacnâpohuc kiŋaŋ ŋic ŋokac sawa bacnâponʒapiŋ muzac irec dâŋ moc mi muzapo, â ʒârâ hâriŋ iŋucnere erâ wemocko ŋicwofuŋ micneneŋ ecnezapo.”
5Iŋuc mume ŋicwofuŋ Ahasiwero e ŋokac wofuŋ Esite ʒiŋuc muhuc wiocnewec: “Mo ŋiczi wena juhuc wiac iŋucne ezo maŋkekac?” Eme Esitezi muwec: “Ŋic repic qapicne keci Hamaŋ hâcne eki râsi enârehuc iŋuc ekac.”
6Iŋuc âzâcneme Hamaŋ e ŋicwofuŋ â ŋokac wofuŋ jahere maio bipicne tarame ɋarac ɋarac qawec.
7Ehame ŋicwofuŋ e aaric sâko manarâ tiwâ bâzi nâhuc ŋembiŋkonec faharerâ hae ʒoŋao huwec; â Hamaŋ e ine ficmaŋkoa ŋehuc, ŋicwofuŋ e wiac hâhâwicne enareocmu iŋuc manahuc Esitezi akickeocte numucnewec.
8Eme ŋicwofuŋ e waiŋ opâ nâhuc ŋembiŋko risierâ ʒiŋuc honewec: Hamaŋ e Esite foweckoa waha fodapecnewec. Iŋuc honerâ kecʒiŋuc muwec: “Hâc, ŋic keci e ficnaneoa ŋokac wofuŋ bâbieocte ekac me?” Ŋicwofuŋ e dâŋ iŋuc muha muha izia Hamaŋ ʒâŋe maine qofackembiŋ.
9Iŋuc epie ŋicwofuŋte kiŋaŋ qahuc domambiŋ jaŋeraonec moc ʒâŋene Harebona e kecʒiŋuc muwec: “Manaŋgopieŋ, Morodekai e ŋicwofuŋte kiŋaŋ biaŋne qawec, eme ere bibituare wâtuŋ Hamaŋzi mume kubi 50 irec sâc biac bakicne i Hamaŋte hae ʒoŋao wisepie huwec domakac.”
10Ŋic e iŋuc mume ŋicwofuŋzi muwec: “Ajoc, ira bituaniŋ.” Eme jaŋe Morodekaire bibitua wâtuŋ bakicne ira hâcne Hamaŋ bituambiŋ. Iŋuc epie ŋicwofuŋte aaric fâre wahawec.
