Erubasa 30:7-15

⁷Nengazen, duen dezuwa he ebuyuen ku ziyà te kenikew. Emun egkehimu ne edhangyù a he iveǥey nu kediey heini te kenè e pa ebpatey.

⁸Iyan heini: iyan ka metau he kenà a meketarùtarù. Ikezuwa, iyan ka metau he kenà a mehimu he utew egkeey-eyuwi etawa mehimu he sepian su iyan dà egkesuatan ku he zuen ku mekaan te kada andew.

⁹Su emun utew zekelà is ketiǥeyunan ku kela ke iyan ku haazà meseriǥi ne iyan ku sikew egkeiniyuǥan; ne emun pubri a, kela ke mekepemenakew a ne egkepeel-elezan ku sikew.

¹⁰Kenè nu pemeyunga is suluǥuen emun ebpekedlalag kew te egalen din, su emun ed-ul-ulahan nu heeyan ne ebpenrewakan ka zutun te suluǥuen ne egkepigedahan ka.

¹¹Duen menge etew he kenà ebpekehimu he ebpengemuyù he tuvazi te Megbevayà is menge ǥinikanan dan, kekenà, nasì dan dà ebpenrewaki.

¹²Duen daan menge etew he egkeisip dan he wazè en igkesewayi kandan, piru is tutuu meremerik is ulaula zan.

¹³Duen menge etew he utew en hembugiru, minsan is kebpenirapsirap dan ne henduen te hentei sikandan.

¹⁴Duen menge etew he henduen te vuaya, iyan baal zan is kebpemintahà te menge pubri.

¹⁵Is etew he zekelà is kadar zin ne iring te limatek. Layun dà egkaǥi te, “Beǥayi a!” Duen daan tetelu etawa heepat he kenà egkeperahan: