Erubasa 29:6-27

⁶Is lalung he etew egkelitag te keugelingen din he salà, iyan, is etew he metazeng, ne egkanta te kegkelipey zin.

⁷Is etew he metazeng midlevanan din is ketenged te menge pubri. Kenà heini egkesavut te etew he lalung.

⁸Is menge etew he sumpalit iyan edretem te kesamuk te sevaha he inged, iyan, ebmelinew mulà is inged pinaaǥi te etew he uluwanen.

⁹Wazà egkepeveyaan emun ebpeked-etuvang diyà te hukmanan is uluwanen he etew wey is tulebung, ne wazà kelinew zutun su haazà is tulebung ebpelelanget wey ebpemenulà.

¹⁰Is etew he utew egkesuat he ebunù, ne minsan is etew he ebpeninidtuwan edumutan din, ne edtinguhaan din te edhimatey.

¹¹Is etew he tulebung kenè din egkeeǥen is pauk din, iyan, is etew he uluwanen egkeeǥen din mulà is kandin he pauk.

¹²Emun ebpemineg is pengulu te tarù he menge tudtul, ne egkehimu he lalung is langun he menge upisyal zin.

¹³Is pubri wey is ebpendaagdaag kandin neked-iiring dà su imbeǥey zà te Nengazen is mata zan.

¹⁴Emun metazeng is kukuman te sevaha he hadì diyà te menge pubri, epedayun is kedumala zin wey egkelig-enan heini.

¹⁵Is kebmensuwa te vatà pinaaǥi te kedlegkuta kandin, ebpekepenurù kandin ne egkehimu he uluwanen, iyan, emun pinesagdan is batà, egkepeel-elezan din is iney zin.

¹⁶Emun lalung is ebpemendumala, ne ed-uswag daan is ked-ulaula te salà. Piru heini sikandan egkezeetan, ne egkemetmetahan heini te menge metazeng.

¹⁷Mensuwa nu is anak nu, ne ebpekeveǥey sikandin kenikew te kelinew te ǥehinawa wey kelipey.

¹⁸Emun wazà lalag te Megbevayà he ebpenurù te sevaha he inged, wazà kayi kegkelinew. Utew zeyzey is menge etew he edtuman te menge ibpenurù te Megbevayà.

¹⁹Duen suluǥuen he kenà egkesuat he ebpenuruen pinaaǥi te kegkeǥiyi nu kandin, su minsan ebpekesavut ne kenè ke zin ebpemineǥen.

²⁰Deyzey pa is egkepengkusan te tulebung he etew, kenà te etew he ebpengaǥi te wazà pulus.

²¹Emun ibpaangè nu is suluǥuen nu puun pa te kengunguhezi zin, iyan egkepengkusan is ebpekeveǥey sikandin te seeng kenikew.

²²Is etew he melemu he egkepauk, ebpeketuvù te kesevaan, ne layun dà ebpekehimu te salà.

²³Tenged te kebpelavew te etew, ebminus is pid-etawan din; iyan, tenged te kenè din kebpelavew, edtehuzen wey edeliǥen sikandin.

²⁴Is etew he kumpeniya te tekawen, iyan ebpekezezaat te keugelingen din. Minsan ibpepenangdù pa sikandin he iketug-an din ke hentei is duma zin, ne kenà sikandin edtug-an.

²⁵Is kegkahandek, ebpekezezaat te etew; iyan, ke edsarig ki zà te Nengazen, ne wazè ta igkemenu.

²⁶Mahabet is edsarig te hukum te pengulu, iyan, Nengazen dà is ebpekeveǥey te hustu he kukuman.

²⁷Is menge metazeng egkeepesan dan is menge lalung, ne is menge lalung egkeepesan dan daan is menge metazeng.