Zinama Tumatumae 29:6-27

⁶Sa tie kaleana si sipata pule nia koari nana sinea, ba sa tie toṉoto si boka kera meke qetuqetu.

⁷Sa tie toṉoto si hiva tavete va leana la koari pu malaṉa, ba sa tie kaleana si korona galagala.

⁸Sari tie va karikaridi si va gevuru vinevehe pa vasileana, ba sari tie gilae si va bulea sa ṉinoveoro.

⁹Be turaṉa la nia sa tie gilaena sa tie pekipeki pa vinaripitui, sa tie pekipeki si kote turu meke zama hoboro meke loketoṉa si boka toṉoto.

¹⁰Sari tie va matemate tiedi si kana hola i rini sari tie toṉoto, meke hata ginugua pude va matei sari tie ṉoṉo.

¹¹Sa tie pekipeki si zama vura ni sari nana tinaṉaziri, ba sa tie gilagilana si kopu pule nia meke lopu bugoro.

¹²Be sa baṉara si va avoso la koari na koha, si sari nana tie tavetave varitokae si na tie kaleadi mo.

¹³Guahe si vari kekeṉoṉo nia ri tie malaṉa meke ri tie ṉoṉovala, sapu e Zihova va dodogorae i matadi.

¹⁴Be pitui sa baṉara sari tie malaṉa pa tinoṉoto, sa nana binaṉara si kote habotu va nabu doduru totoso.

¹⁵Sa kolu ginegese si va karovo ginilagilana, ba totoso lopu hoke ta gegese sa koburu si va kurekure ia sa sa tinana.

¹⁶Totoso vagi ṉiniraṉira sari tie kaleadi, si gigiri sa sinea, ba sari tie toṉoto si kopu aqa nia sa dia hinoqa.

¹⁷Pana tarae nia goi sa tumu, si kote ponigo binule sa; kote va qetua sa sa maqomaqomu.

¹⁸Vasina lopu koa sari zinama te Tamasa si luara pania rina tie sa tinarae; ba tamanae si asa pu kopu nia.

¹⁹Na zinama moka si lopu kaqu va toṉotia sa nabulu; kote tumae nia nana ba lopu kote va tabe si asa.

²⁰Dogoria goi sa tie sapu lopu balabala paki meke tuturei zama? Na tie pekipeki ba boka tava tumatumae, hola nia sa tie asa.

²¹Pana ta tatarue va hola sa nabulu podalae hitekena, pa vina betona si kote va talotaṉigo sa.

²²Sa tie bubugorona si va gevugevuru vinari zamai, meke sa tie tuturei ta ṉaziri si vata evaṉi soku sinea.

²³Sa tie vahesi pule nia si kamo kurekure, ba sa tie tago maqomaqo vina pepekae si tava lavata.

²⁴Sa baere tanisa tie hikohiko si kana pule nia sa nana tinoa soti; pa vinaripitui si lopu boka tozia sa sa hinokara, ba koe Tamasa si ta levei si asa.

²⁵Na pude matagutu nia sa tie si guana sipata, ba asa pu raṉea se Zihova si ta kopue.

²⁶Soku tie si hiva tepatepa tinokae koa sa baṉara, ba koe Zihova mo boka ta vagi sa tinoṉoto.

²⁷Sari tie toṉoto si korodi ni sari tie kokohadi, meke sari tie kaleadi hakohako ni sari tie toṉotodi.