Erubasa 17:4-22

⁴Is lalung, egkesuat he ebpemineg te mezaat he menge lalag, ne is teruen, egkesuat he ebpemineg te tarù.

⁵Is etew he ed-un-undahan din is menge pubri, iyan din egkesudì is Megbevayà su iyan man midlimbag kandan, ne is igkesuat din is kegkehitevua te mezaat diyà te sengeetew, siguradu edsilutan sikandin.

⁶Dengeg te meǥurang is menge apù din ne zengeg daan te menge vatà is ginikanan dan.

⁷Wazà igkepegalbu te tulebung ne kenè dait he edtarùtarù is pengulu.

⁸Is etew he edsipsip, kunaan din ke iring te kegkeselemengkiru is kedsipsip su pinaaǥi zutun, egkehimu kun minsan is kenà pezem egkehimu.

⁹Is etew he ebpeseyluwen din is ebpekesalà diyà te kandin, igkepenurù din pinaaǥi zutun he iyan hustu he ed-ul-ulahan is kegiǥineǥawa, ne is ed-uman egkeyungkat dutun te sayep ne ebpekebulang te utew teleemiǥu.

¹⁰Is etew he meudseb, kesevaha zà edsewaya ne egkepenurù en, iyan, is tulebung, minsan penletiguwa pa ne kenà egkepenurù.

¹¹Is lalung he etew, edsukul te gubirnu, ne zuen daan edsuǥuen wey mekaasdang kandin.

¹²Piligru pa is kebpekesinuǥung te engey kenà is kebpekesinugung te bir he ed-uraingen tenged te veǥu pa he midawi te sengelelanggam is menge anak din.

¹³Emun mezaat is ibales ta te meupiya ne is mezaat kenà egkaawà diyà te valey ta.

¹⁴Is puunà te kesevaan, ne iring te zeisey he vudsi ziyà te teleǥuey te wahig; umbe edsengsengen heini te wazè pa medekelà.

¹⁵Is kedlibriya te nekesalà wey is kedsiluti te wazà mekesalà, ne pudu kenà igkesuat te Nengazen.

¹⁶Wazà pulus te selapì he egkeǥastu tenged te kebpetunghaa te tulebung su wazè din man tinguhà he mebmetau sikandin.

¹⁷Is elukuy nu, ne egkehizuwan kezin te langun he timpu, wey iyan ketuyuan ke maan is duen nu perinti, para zuen edtavang kenikew te timpu te kelised.

¹⁸Is etew he kenà metau he ed-isip ke hengkey is hustu, ne segugunè din ebpeseriǥa is beleyazan te zuma zin.

¹⁹Is etew he zekelà diyà te ǥehinawa zin is samuk, ne zekelà diyà te ǥehinawa zin is salà; ne is etew he lalung ne ebpen-ahà te kegkezeeti zin.

²⁰Kenà ed-uswag is etew he layun mezaat is ed-isipen din, ne ebpekaagbur ziyà te kesamuk is etew he layun mezaat is ebpengeǥiyen din.

²¹Emun engey is anak ta egkeveǥayan ki te seeng, ne wazè ta kelipey.

²²Emun layun duen kelipey he egketaǥù diyà te ǥehina ta, ebmeupiya is kedlelawa ta, iyan, emun layun dà seeng is egketaǥù diyà te gehinawa ta, egkezeetan is kedlelawa ta.