Tinata Valavalar 17:4-22

⁴A tena pait ra kaina i kapupi ra bilak na tinata, Ma ra tena vartuam i nuk pa ra pirpir maul.

⁵Nina i kulume ra tolong i vul nina i ga vaki ia, Ma nina i gugu ta ra magit na varmonong pa na pila ta ra varkurai.

⁶A umana bul mur dia da ra kere pire ra umana patuana, Ma ra umana bul dia langlang ta ra umana tama i diat.

⁷A bo na tinata pa i topa ra lunga; Ma damana ra vaongo pa i topa tuna ra luluai.

⁸A vartabar i da ra ngatngat na vat pire nina i tul tar ia; A lavur gunan ba i vana tana i tavua.

⁹Nina i tuba ra kaina mangamangana i tikan upi ra varmari, Ma ga nina i vaarike milat pa ra magit i varbaiane diat dia ki na bartalaina.

¹⁰A varpit i ki muka ta ra uru i ra tutana ba i matoto, Ma ra lunga pa i boina ta ra mar na mememene.

¹¹A tena varongongoi i mainge ke ra vinarubu na varpiam, Ma da tulue ra dekdek na tultul pirana.

¹²I boina a ik ba tika na tutana dir a varkuvo ma tika na bear ba di ga long ra umana natuna kan ia, Ma pa i boina ba na barat ra lunga.

¹³Nina i bali ra boina ma ra kaina, Ra kaina pa na vana kan ra kubana.

¹⁴A vunapai ra varngangar i da ra tua na tava ka, Kari una nur vue ra ik. a vartoto ba pa ta varngangar boko.

¹⁵Nina i kure valangalanga ra tena varpiam, ma nina i kure vakaina ra tena takodo, Dir par ra Luluai i milikuane dir.

¹⁶Ta ra ava ra lunga i vatur vake ra mani upi na kul ra kabinana me, Ma ra nuknukina pa i tale?

¹⁷A talai dat tuna i varmari vatikai, Ma di kava tura i dat ure ra bung ba na tup dat.

¹⁸A tutana ba pa i kabinana i vavalima, Ma i tur kia ure ta tikai ta ra luaina mata i talaina.

¹⁹Nina i mainge ra varpiam i mainge ra varngangar; Ma nina i pait vangala ra matakilalat ta ra kubana urama i tikatikan upi ra vinirua.

²⁰Nina i gegagege ra nuknukina pa na gire tadav ra bo na magit, Ma nina ba i rara ra karameana na bura ta ra magit na varmonong.

²¹Nina i vangala ra lunga na lingligur tana, Ma nina dir tamana ma ra lunga pa na gugu.

²²A gugu ta ra nuknuk i dat i valagar dat, Ma ra tinabun ta ra bala i dat i vapalaur dat.