Tɛnɛ Faalaaliiti 17:4-22

⁴Zɔi é faa ɲɔi ɠɛɛzu, toɠa ɗa woilo faa ɲɔu ɠɛ nuiti goo ma, zɛɛ nui ɠa ɗa woilo, woo ɲɔu wo nɛgiti goo ma.

⁵Ɗa ɲɛɛɠulana bala nui zu, Kpɛtɛ Nui ɠa è unfesu, zɔi é ɠoozunɛɛzu seiɲɔɠɔi ná-maanɔɠɔ vai zu, salalalai la yɛga.

⁶Nu ʋɔlɔiti ta-lɛbiya wɔɔlɔgi ɠa é ga ti-lounlointi, lointi ma zaalai ɠa é ga ti zɔlɔɔ nuiti.

⁷Nu woozuɠɛzɛi la zolooni faaɠaaɠaalala nui ma, zekana nɔ, zɛɛi la zolooni la kundiɠii ma.

⁸Tanigaa ta ɗa ɠisiɛ ga, lobɛanii ɠa ɠɛ ti ʋɛ ga undaanɛɛi, naa ɠa ta ɓɔɠɔ zɔlɔɔ su, ta-vai pɛ su.

⁹Zɔi é pɔ é nɛɛ nuiti bɛ, naa ɠa ɗa tɔ koloɠologiti suvaayɛ, niiti ti ɠɛai la, tɔɔzei ɗa ɠɛna suɠulaa kenein, naa ɠa ɗa è-wɔɔlaiti maaɠooza è ʋa.

¹⁰Zeliloma ɠilagi ɠa ɗa faa ʋaa keleɠele nui ma, é leʋe kpakɔ ɲɛ ungila (100) ba, ta faaɠaaɠaalala nui loɠa la.

¹¹Nu ɲɔi ɠa ɗa buzeɠe daalɔɠɔma vai nɔ ɠaiziɛ, keelai é la maawɔinɠa ɠɛa, naa ɠa ɗa leʋe daalɔɠɔma.

¹²Nu ɠomi ga filɛ zua leei, nii ná-ziʋoiti kulaai zea, naa vizɔgɛ, è ʋa ɠomi ga faaɠaaɠaalala nui é ná-titidai zu.

¹³Ni nu a faa ʋagɔi zalana ga faa ɲɔi, maanɔɠɔi la zeɠea maala pɛ.

¹⁴Sakpegi lɔɔzei, naa ɠa é ga è ziɛi luɠɔlosuʋɛ laavie, zeɠe ná, aisa kpɔɛi ʋa leʋe.

¹⁵Nii é losu faa ɲɔu ɠɛ nui ʋolu, ta zɔi é telebo nui ʋeelalazu, ti felegɔ pɛ ti maayoseɠeʋɛ Ɠɔoɠɔ GALAGI ʋɛ.

¹⁶Walii a ɠɛna ɠimalala nui ya, leeni ɠa a kɛ la? Toɠa zoo é ɠimalai ɠeya la ɓaa? Kɛlɛ ɠi pagɔ la zea.

¹⁷Bɔɔla nui ɠa ɗa nɛɛbɛi ɠɛ yeenɔpɛ. Ɠɛɛɠɛloin ɠa ɗa kpɔbai ɠɛ, faaɓaagi a ʋaana.

¹⁸Kɛni nui balagai ɠigi ma, naa ɠa a ɗa minazeɠe, é ɓɔɠɔ ɠɛ ga zeelagai, nu ɠiligi ná-kuyei zala vai zu.

¹⁹Nui kpɔɛba vai nɛai bɛ, tɔ koloɠologi nɛɛʋɛ bɛ. Zɔi kibɔɔlɔmai su, naa wɔinʋɛ ga é ɓɔɠɔ ɠoloɠolo.

²⁰Nui yaavai ziimaʋɛ, é la undaanɛ zɔlɔɔga, zɔi é ga nɛ felegi, naa ɠa lɔ nimizai zu.

²¹Zɔi é faaɠaaɠaalala loun zunui zɔlɔɔsu, ziizoolɛi ɠa ɗa ɠɛ ma. Ɠimalala loun zunui, kɛɛɠɛ ɠoozu la ga nɛ.

²²Ziilaai ɠa ga kɛdɛya zaɓu wola, kɛlɛ kiteʋei ɠa ɗa nui zuɲɛgi ɓe.