Ekaresia 26:25-32

²⁵Setiri, Paul sisira, “Tefo, Kotofuko! Na jo daghaeri. Na dubo kotise, geka beká resena amo, eviri.

²⁶Kini Agrippa, na nimokena isagha resena. Ainda beká mo: geka setena emo, ni anakora kasama usesi. Na kasama erena: ni ainda bino niningusesi. Ainda susu mo: roera setena emo, evetu genembo da dombuda sirorusira.

²⁷Na kasama erena: namane Jusi embokena, God da feroveta rea sedo ghusera ava tumonderaesa,” aminge sisira.

²⁸Aminge setiri, Kini Agrippa Paul kena sisira, “Ni erekotesa amo, ni geka tufako evia saso, na Iesu da dorevare eni arena, ai? Amo erá koteose!” aminge sisira.

²⁹Setiri, Paul sisira, “Resesa, nanda uju a nanda benunu God kena: ni a evetu genembo isambu totorugeteva emo, ne nangedo namongava aetevu. Na jo seiniimi (chains) bundetevo fetirena, eindae saeri. Na Iesu tumonderaena, aminga ava aovo dae resena.”

³⁰Aminge setiri dadabetiri, Kini Agrippa nu, frovensi da kotofughae, Bernice a natofo isambu dabade eredo,

³¹era isaghada buvudo tofo tofo se nininguseri, “Genembo emo dara eni jo aeri. Ava sedo, numo diburada jo fitae aeteri, o jo saoro ambae aeti.”

³²Aminge sedo, Agrippa nu Festus kena sisira, “Ni genembo emo doyaso yaeti. Avata makasí, nu namonde Rome embo da kotofukena yari dae sisira. Ava sedo, mutaso aminda yarira,” aminge sisira.