HECHOS 26:25-32

²⁵Aj Pablo u yäli: ―No'on mach ajlocojon, Festo, ane tä' rete utz a c'ajalin. Ni cäle' no'onba toj une, y t'oc chich cä c'ajalin.

²⁶Ajnoja Agripa yuwi upete jinda, mach quisnon cäle' bajca an une u yubin. Cuwi chich cache' une yuwi upete jinda, uc'a mach uti tan otot mucu.

²⁷¿A tz'onän cua' u yäli ajt'anob ta Dios, aneba Agripa? No'on cuwi que a tz'onän chich.

²⁸De ya'i aj Agripa u yälbi aj Pablo ca'da: ―Tz'ita' yo a wäc'benon ochicon tuba u yajcänt'an aj Cristo.

²⁹Aj Pablo u yäli: ―Mach u che si tz'ita' yo o q'uen yo, yuwi Dios cache' tä' co ajniquet ca' chich ayanon, namás que mach ajniquet cächä, y mach sec' ane, apetela täcä machcatac ya'anetla a ubinla cä t'an bada.

³⁰Jinq'uin u tzupsi aj Pablo u yäle' ni t'anda, ch'oyi ajnoja, y gobierno, y ix Berenice, y upete machcatac ajni chumujob t'oc.

³¹U tz'eji ubajob, u maläc chen t'anob u yäle'ob ca'da: ―Niump'e cua' mach u chi ni winic jini tuba chämic, ni tuba ajnic tä cárcel.

³²Aj Agripa u yälbi aj Festo: ―U ch'e' chajcac ica ni winic jini si fuera mach u c'atän xic bajca an aj César.