Loc Hechos 26:25-32

²⁵Jira Pablo uai ote: —Fɨ́gomɨe Festo, cue uáɨricoɨñedɨcue. Mei jɨáɨfodo cue daɨnáuai ñue comécɨdo facádorede. Aféfuiaɨ uafue.

²⁶Benori illaɨma Agripa ite, bífuiaɨna ñue onódɨmɨe. Ie jira comecɨ mánaɨnafuedo afémɨe uiécori úritɨcue. Afémɨe nana bífuiaɨna ie onónana ñue onódɨcue. Afémɨe nana bífuiaɨ báinino izúgumo lloñégaza onode.

²⁷Illaɨma Agripa, ¿uai jino llóraɨnɨ llogáuaimo ɨ́ɨnotɨo? O ɨ́ɨnuana onódɨcue, —daɨde Pablo.

²⁸Jira Agripa daɨde: —¿Jesucrístomo afe dɨbénemo cue jaɨnáillena raɨre cuena íficaitaacadɨo? —daɨde.

²⁹Jira Pablo íena daɨde: —Raɨre Crístomo jaɨnáidɨmɨena o íficaiadɨ, o are íllamona Crístomo jaɨnáidɨmɨena o íficaiadɨ, naɨ birui Juzíñamui uaillaɨ ñue jeire o ollɨfue jɨcádɨcue. Afe izói dama óɨeñedeza mei íadɨ cue Jesucrístomo ɨ́ɨnua izói nana cue úrillamo cacáreidɨno Crístomo ñue ɨ́ɨnotɨnona jitáidɨcue. Mei íadɨ llójeina cue máɨina izói ómoɨna maɨtátaacañedɨcue, —daɨde.

³⁰Pablo aféfuiaɨ llua meífomo, illaɨma Agripa caifo náidacaide, afe caifóidɨllaɨma Festo dɨga. Afe llezica ie aɨ Berenice nana dɨnó ráɨiedɨno dɨga caifo náidacaidiaɨoɨ.

³¹Náidacaillano baɨ eneno jáidiaɨoɨ aféfuiaɨdo úrillena. Dɨnomo jofo conímana daɨdíaɨoɨ: —Baie cómemo ie tɨtállɨfuena iñede. Daje izói llavéracomo ie llavéillɨnona iñede, —daɨdíaɨoɨ.

³²Jira Agripa Féstona daɨde: —Bímɨe naui jamánomo ocuídɨllaɨma íemo jɨcánollena jɨcáñeniadɨ ja birui zuitárede, mei íadɨ báillaɨmamo jɨcádeza zuitánide, —daɨde.