Aposotolo Adi Hewau 26:25-32

²⁵Na Paulo i ene, “Peseto, abi‐lolo tauna e, eau nige ea koakoarere, riba mamohoina eo nua malapai ribadi ea ribaedi ede meta.

²⁶Wasawasa ia riba ta abidi ie ata, gonoagu ia arinai ea riba adiadidiri, paana ea nuatuiyao wau riba wa nige esau i hekau; wau ginauri wa nige se ginauri eamuyamuidi.

²⁷Guiau Ageripa e, peroveta edi riba oa u nuatuwataidi, e nige’e? Ea nuatuiyao oa taunuatuwataidi.”

²⁸Ageripa abo i ribalau Paulo arinai i ene, “Begana mo abo oa bena nuagu u buihetaiiri ea hemala Keristian!”

²⁹Paulo i ene, “Eaubada ea awanorini, nige oabom mo, isi gamagaridi wau ta egu riba se ataiei, taba gamagarimiu doha hinage eau — teina agu auau mo ta i otawa.”

³⁰Wasawasa wa abo i toro, eo gavana, eo Bereniki, eo isi hinage maediyao taubabawa;

³¹se lausuara abo isibom se oioiriba si ene, “Teina tau ta nige mate laulauna esau e auau laulauna esau ie abi.”

³²Ageripa abo i ribalau Peseto arinai i ene, “Ena tau ta nige Kaisara esana i atai wa, nuana taba ta iairigabaei.