ACTUUM APOSTOLORUM 26:25-32

²⁵Et Paulus: Non insanio, inquit, optime Feste, sed veritatis et sobrietatis verba loquor.

²⁶Scit enim de his rex, ad quem et constanter loquor: latere enim eum nihil horum arbitror. Neque enim in angulo quidquam horum gestum est.

²⁷Credis, rex Agrippa, prophetis? Scio quia credis.

²⁸Agrippa autem ad Paulum: In modico suades me christianum fieri.

²⁹Et Paulus: Opto apud Deum, et in modico et in magno, non tantum te, sed etiam omnes qui audiunt hodie fieri tales, qualis et ego sum, exceptis vinculis his.

³⁰Et exsurrexit rex, et præses, et Bernice, et qui assidebant eis.

³¹Et cum secessissent, loquebantur ad invicem, dicentes: Quia nihil morte aut vinculis dignum quid fecit homo iste.

³²Agrippa autem Festo dixit: Dimitti poterat homo hic, si non appellasset Cæsarem.